"ئیعجازى زانستی" ئه‌نفلۆنزاى باڵنده‌ له‌ قورئانى پیرۆزدا ئاشكرا ده‌كات
وه‌رگێڕانی : سایه‌ فارس

به‌ناوى خواى گه‌وره‌و میهره‌بان .. درودو سه‌لام بۆ سه‌رگیانى پێشه‌وامان و هاوه‌ڵان و شوێن كه‌وتوانى ....

توێژه‌رێك كه‌ هه‌ستاوه‌ به‌ توێژینه‌وه‌ى ئه‌م بابه‌ته‌ ده‌ڵێت:
كاتێك ده‌نگو باسى ئه‌نفلۆنزاى باڵنده‌ سه‌رى هه‌ڵدا، ئایه‌تێكم به‌رچاوكه‌وت كه‌ ماوه‌ى دوو ساڵه‌ له‌به‌رم كردووه‌، هه‌ستم كرد په‌یوه‌ندى به‌ ئه‌نفلۆنزاى باڵنده‌وه‌ هه‌یه‌...
په‌له‌م نه‌كرد بۆ بڵاوكردنه‌وه‌ى ئه‌م باسه‌، له ‌به‌ر ئه‌وه‌ى وته‌ى قورئانى پیرۆز وه‌ك هه‌موو وته‌یه‌كى ئاسایى نییه‌، پێویسته‌ پێش هه‌موو شتێ ته‌ئكید بكه‌ینه‌وه‌ و به‌بێ بوونى زانیارى هیچ شتێك نه‌دركێنین، بۆیه‌ پرسیارم له‌ زانایه‌ك كردو ئه‌و هه‌سته‌ى هه‌م بوو پێموت: به‌سه‌رسوڕمانێكه‌وه‌ وتى: (سبحان الله) وه‌ ئامۆژگارى كردم كه‌ بڵاوى بكه‌مه‌وه‌، چونكه‌ ئه‌وه‌ى كه‌ هه‌ستم پێكرد ڕاست ده‌رچوو.

ئایه‌تێكى قورئان باس له‌وه‌ ده‌كات كه‌ له‌ كات و زه‌مانێكدا خه‌ڵكى زۆر تامه‌زرۆى گۆشتى باڵنده‌ ده‌كه‌ن به‌هۆیه‌كى نادیار (له‌وانه‌یه‌ به‌هۆى نه‌خۆشییه‌كه‌وه‌ كه‌ به‌خواردنى ئه‌و باڵنده‌یه‌ دروست بێت یان به‌هۆى له‌ناوچوون و نه‌مانى به‌هۆى نه‌خۆشییه‌وه‌ كه‌ به‌كۆمه‌ڵ له‌ناو ببرێن) بۆ ئه‌مه‌ش خواى گه‌وره‌ له‌به‌هه‌شتدا پاداشتى موسڵمانان گۆشتى باڵنده‌یه‌ كه‌ تامه‌زرۆى بوون له‌ دونیادا له‌پاداشتى ئه‌و باوه‌ڕه‌ى كه‌ هه‌یانبوو‌.
خواى گه‌وره‌ ئه‌وه‌ى باس كردووه‌ بۆ گۆشتى باڵنده‌ واته‌ ناوى گۆشتى مانگا یان حوشتر .... هتد نه‌بردووه‌.
خواى گه‌وره‌ له‌و به‌ڵگانه‌ى كه‌ نیعمه‌تن بۆ به‌نده‌كانى له‌سوره‌تى (الواقعة) ده‌فه‌رموێ:
وَفَاكِهَةٍ مِّمَّا يَتَخَيَّرُونَ(20) وَلَحْمِ طَيْرٍ مِّمَّا يَشْتَهُونَ(21)

چ شتێك وا له‌ خه‌ڵك ده‌كات كه‌ تامه‌زرۆى گۆشتى باڵنده‌ ببن له‌به‌هه‌شتدا؟
ئه‌گه‌ر به‌هۆى ئه‌وه‌ نه‌بێت له‌ دونیادا لێى بێ به‌ش بوون؟
ئایا ئێمه‌ ته‌نها بۆ گۆشتى باڵنده‌ تامه‌زرۆ ده‌بین؟ بۆنموونه‌ تا مه‌زرۆى میوه‌ نابین له‌ كاتێكدا ناوى میوه‌ش له‌ قورئاندا باس كراوه‌؟
جیاوازیه‌كه‌ لێره‌ ده‌رده‌كه‌وێت: كاتێك خواى گه‌وره‌ باس له‌ میوه‌ ده‌كات له‌گه‌ڵ ئه‌وه‌دا باسى له‌ تامه‌زرۆیى و ئاره‌زووى خه‌ڵكى بۆ میوه‌ ناكات، له‌كاتێكدا له‌گه‌ڵ گۆشتى باڵنده‌ به‌كارى هێناوه‌، له‌گه‌ڵ ئه‌وه‌شدا ئێمه‌ زۆر جار ئاره‌زووى خواردنى میوه‌ و گۆشت و خوارده‌مه‌نى به‌تامتر له‌ گۆشتى باڵنده‌ ده‌كه‌ین !!

باشه‌ بۆچى باسى گۆشتى باڵنده‌ به‌گشتى كراوه‌ ،بۆ نمونه‌ نه‌وتراوه‌ گۆشتى مریشك یان مراوى یان كۆتر؟؟
له‌ ئایه‌ته‌كه‌دا ئه‌وه‌ ده‌رده‌كه‌وێت كه‌ هۆكارى ئاره‌زووى خه‌ڵك بۆ گۆشتى باڵنده‌ به‌ هه‌موو جۆره‌كانیه‌وه‌‌یه‌تى له‌به‌ر له‌ده‌ست چوونیان بۆى.
واته‌ هۆكارى ئه‌و ئاره‌زووه‌ بۆ نه‌خۆشیه‌ك ده‌گه‌ڕێته‌وه‌ كه‌ هه‌موو جۆره‌كانى باڵنده‌ ده‌گرێته‌وه‌، نه‌ك ته‌نها جۆرێك یان دوو جۆر، ئه‌وه‌ش به‌ هۆى تواناى باڵنده‌ بۆ گه‌شت كردن و كۆچ كردنى و گواستنه‌وه‌ى ئه‌و نه‌خۆشییه‌ى كه‌ تووشى بووه‌ بۆ هه‌موو جۆره‌كانى ترى له‌ هه‌موو شوێنێكى جیهان دا، هه‌روه‌ك ئه‌وه‌ى كه‌ ئێسته‌ ڕوو ده‌دات.
ئه‌مه‌ش به‌ پێچه‌وانه‌ى شێتى مانگا كه‌ ده‌توانرێت سه‌یته‌ره‌ بكه‌ى به‌سه‌ریدا و گه‌مارۆى بدرێت به‌ هۆى ئه‌وه‌ى كه‌ تواناى فڕین و گواستنه‌وه‌ى نییه‌ وه‌ك باڵنده‌كان.

ئه‌مڕۆ ئێمه‌ ئه‌وه‌ به‌ چاوى خۆمان ده‌بینین كه‌ خه‌ڵكى هه‌موو جۆره‌كانی باڵنده‌ له‌ مریشك و مراوى و كۆتر و چۆله‌كه‌ ....هتد به‌ زیندوویى یان به‌به‌ستوویى فڕێ ده‌ده‌ن، له‌گه‌ڵ ئه‌وه‌ى كه‌ پێویستیشیان به‌ گۆشتى باڵنده‌ هه‌یه‌ بۆخواردن.
له‌گه‌ڵ مندا ئه‌و ئاماژه‌ قورئانیه‌ ده‌بینن كه‌ ئێستا ڕوو ده‌ده‌ات؟
ئه‌گه‌ر ئه‌وه‌ به‌رده‌وام بێت له‌ وڵاته‌كاندا به‌ له ‌ناوبردنى ئه‌و باڵندانه‌ بێگومان ڕێگه‌یه‌ك ده‌بێت بۆ له‌ناو چوونیان به‌ته‌واوى، هه‌روه‌ك چۆن هه‌ندێ له‌ گیانه‌وه‌ران له‌ناوچوون.
به‌و شێوه‌یه‌ گۆشتى باڵنده‌ ده‌گمه‌ن ده‌بێت یان هه‌ر نامێنێت واده‌كات كه‌ تامه‌زرۆى ببین.
له‌ به‌هه‌شتدا گۆشتى باڵنده‌ دیاری یان پاداشت ده‌بێت بێجگه‌ له‌ جۆره‌كانى ترى گۆشت كه‌ له‌به‌هه‌شتدا هه‌یه،‌ به‌ڵام خواى گه‌وره‌ ئاماژه‌ى به‌وه‌ نه‌كردووه‌ كه‌ تامه‌زرۆى ده‌بین.
هه‌روه‌ك ده‌بینین كه‌ خه‌ڵكى وازى له‌گۆشتى باڵنده‌ هێناوه‌ و به‌ره‌و گۆشتى گیانه‌وه‌رانى تر هه‌نگاو ده‌نێت، ئه‌مه‌ش به‌ڕاست زانینى وته‌ى خواى گه‌وره‌یه‌، به‌بێ بوونى ئه‌و مه‌به‌سته‌ى كه‌ گۆشتى باڵنده‌ ده‌بێته‌ ئه‌وه‌ى كه‌ تامه‌زرۆى بكه‌ن به‌گشتى.....
پاك و بێگه‌ردى بۆ خواى گه‌وره‌ بۆ ئه‌و به‌ڵگه‌یه‌ى كه‌ له‌ ئایه‌تى: ولحم طير مما يشتهون باسى لێوه‌ ده‌كات.

له‌ كۆتاییدا سوپاسى خواى گه‌وره‌ ده‌كه‌م كه‌ ڕێگه‌ى بۆ ڕووناك كردمه‌وه‌ هه‌تا گه‌وره‌یى قورئانى پیرۆز ببینم و ئه‌وه‌ى كه‌ تێیدایه‌ له‌و موعجیزانه‌ى ئێمه‌ نایزانین و شاره‌زا نین، له‌گه‌ڵ ئه‌و موعجیزانه‌ى پێغه‌مبه‌ر (صلى الله عليه وسلم) له‌ كاتێكدا كه‌ نه‌یتوانیوه‌ بخوێنێته‌وه‌ و بنوسێت -درودى خواى له‌سه‌ر بێت- .
و اخر دعوانا ان الحمد لله رب العالمین.
ــــــــــــــــــــــــــــــــــــــــــــــــــــــــــــــــــــــــ
سه‌رچاوه‌ : منتدى الشذور