گه‌نج و ڕێبازی به‌ره‌نگاربوونه‌وه‌ی له‌ گه‌ڵ دوژمنان
نووسینی: شێخ سفر بن عبدالرحمن الحوالي.
به‌شێكی وه‌رگیراوه‌ له‌(محاضرات عامة) باسی: ( المؤامرة على الاسلام)
ته‌فسیری ئایه‌ته‌كان وه‌رگیراون له‌: پوخته‌ی ته‌فسیری قورئان، مه‌لا محمد مه‌لا صالح.
وه‌رگێڕانی: نه‌به‌ز عبدالرحمن.

پرسیار: ئایا ده‌بێ‌ گه‌نج بۆ به‌ره‌نگاریكردنی دوژمنانی ئیسلام چ رێیه‌ك بگرێته‌به‌ر، له‌كاتێكدا دوژمنان شه‌و وڕۆژ بۆ رووخاندنی ئه‌م ئاینه‌ هه‌وڵ ده‌ده‌ن؟

وه‌ڵامی ئه‌م پرسیاره‌مان له‌ دوو ئه‌ركدا كۆكردۆته‌وه‌:

یه‌كه‌م: ده‌بێ ئێمه‌ لای خوای گه‌وره‌ شیاوی سه‌ركه‌وتن بین ، ئه‌وه‌ش به‌ خۆپارێزی له‌ تاوان و پابه‌ندبوون و به‌ گوێكردنی فرمانه‌كانی خوای گه‌وره‌ ده‌بێ، هه‌روه‌ها‌ ده‌ست گرتن به‌ رێنومایی و سوننه‌ته‌كانی پێغه‌مبه‌ر صلى الله‌ علیه وسلم و وازهێنان له‌ هه‌موو بیدعه‌و تاوان و كاره‌ شیركییه‌كان، خوای گه‌وره‌ ده‌فه‌رموێ:
وَإِن تَصْبِرُواْ وَتَتَّقُواْ لاَ يَضُرُّكُمْ كَيْدُهُمْ شَيْئًا (ال عمران:120)
واته‌: ئه‌گه‌ر ئێوه‌ به‌ ئارام بن (له‌سه‌ر گوێڕایه‌ڵی خوا) و له‌ خوا بترسن پیلانی ئه‌وان هیچ زیانێكیان پێ ناگه‌یه‌نێ.
كه‌واته‌ هه‌ركات خاوه‌نی ئارام و ته‌قوا بین، ئه‌وا به‌ كۆمه‌كی و مۆڵه‌تی خوای گه‌وره‌ فێڵی پیلان گێڕان زیانمان پێ ناگه‌یه‌نێ، به‌ڵام ئه‌گه‌ر هیچ له ئارامی و ته‌قوامان‌ تێدا نه‌بێت یان لاواز بێت، ئه‌وه‌ به‌هۆی دوژمنانه‌وه‌ تووشی زیان ده‌بین.

ئه‌ركی دووه‌م: ده‌بێ دوژمنانمان بناسین، كۆششیش بكه‌ین هه‌روه‌ك چۆن ئه‌وان هه‌وڵ ده‌ده‌ن، خوای گه‌وره‌ ده‌فه‌رموێ: وَلاَ تَهِنُواْ فِي ابْتِغَاء الْقَوْمِ إِن تَكُونُواْ تَأْلَمُونَ فَإِنَّهُمْ يَأْلَمُونَ كَمَا تَأْلَمونَ وَتَرْجُونَ مِنَ اللّهِ مَا لاَ يَرْجُونَ (النساء:104)
واته‌: سست مه‌بن، له‌ به‌دوا گه‌ڕانی دوژمنتاندا(یان له‌ به‌دوا گه‌ڕانی ئه‌و قه‌ومه‌ كافرانه‌دا)، ئه‌گه‌ر ئێوه‌ ئێش و ئازارتان پێ بگات، بێگومان ئه‌وانیش ئێش و ئازاریان پێ ده‌گات، وه‌ك چۆن ئێوه‌ ئێش و ئازارتان پێ ده‌گات، وه‌ ئێوه‌ ئومێد ده‌كه‌ن له‌ خوا ئه‌وه‌ی ئه‌وان ئومێدی ناكه‌ن( كه‌ پاداشت و سه‌ركه‌وتنه‌).
دوژمنان هه‌رچه‌نده‌ كۆتاییان دۆزه‌خه،‌ به‌ڵام له‌ دوژمنایه‌تیدا درێغی ناكه‌ن و شه‌و وڕۆژ ماڵ ده‌به‌خشن و خۆبه‌خت ده‌كه‌ن، ئیتر چۆن كه‌سێك نه‌به‌خشێ و كۆشش نه‌كات له‌ كاتێكدا ئه‌گه‌ر له‌ نیه‌تدا دڵسۆز‌و له‌كاردا راستگۆ بێت چاره‌ نووسی به‌هه‌شت ده‌بێ، كه‌ هه‌ر ئه‌وه‌ش گرنگه‌.