جه‌نابی مامۆستا مه‌لا عومه‌ر عه‌بدولعه‌زیز زانای ناوداری ئیسلامیی كۆچی دوایی كرد


مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ فَمِنْهُمْ مَنْ قَضَى نَحْبَهُ وَمِنْهُمْ مَنْ يَنْتَظِرُ وَمَا بَدَّلُوا تَبْدِيلاً

ئه‌مشه‌و شه‌وی هه‌ینی ئه‌ستێره‌یه‌كی تر له‌ كاروانی ڕابوونی ئیسلامی و زاناو بانگخوازێكی تری كورد له‌ ته‌مه‌نی 97 ساڵیدا كوژایه‌وه‌.
مامۆستا مه‌لا عومه‌ر عه‌بدولعه‌زیز كه‌ برا گه‌وره‌ی هه‌ردوو ڕابه‌ری كۆچكردوو به‌ڕێزان (مامۆستا مه‌لا عوسمان عه‌بدولعه‌زیز و مامۆستا مه‌لا عه‌لی عه‌بدولعه‌زیز)و باوكی ڕابه‌ری ئێستاو سێیه‌می بزووتنه‌وه‌ی ئیسلامی (جه‌نابی مامۆستا مه‌لا موحه‌ممه‌د مه‌لا عومه‌ر)بوو، له‌ پاش ته‌مه‌نێكی پڕ له‌ خێرو خزمه‌تێكی تولانی درێژی ڕابوونی ئیسلامی له‌ ته‌مه‌نی 97 ساڵی به‌ نه‌خۆشی كۆچی دوایی كرد.
مامۆستا مه‌لا عومه‌ر یه‌كێك بووه‌ له‌ بانگخوازه‌ چالاكو بوێره‌كانی نێو ڕابوونی ئیسلامی كه‌ سه‌ده‌یه‌ك له‌ خزمه‌تی بووژانه‌وه‌و گه‌یاندنی په‌یامی پاكی پێغه‌مبه‌رمان  بووه‌و به‌رده‌وام گیانی جیهادو خه‌باتی بێوچانی وه‌ به‌ر لاوانمان داوه‌..

جه‌نابی هه‌ر له‌و ڕۆژه‌ی كه‌ شێخ محه‌مه‌د مه‌حموود سه‌وواف (دامه‌زرێنه‌ری ڕێكخراوی ئیخوانولموسلمین) كه‌ له‌ ساڵی 1952 سه‌ردانی شاری هه‌ڵبجه‌ی كردووه‌، په‌یوه‌ندی پێوه‌ كردووه‌و بۆته‌ ئه‌ندامێك له‌ ڕێكخراوی ئیخوانولموسلمین.
جه‌نابی دوای ئه‌وه‌ كه‌ هه‌ڵه‌بجه‌ جێده‌هێڵێ‌ و به‌ره‌و ئێران سه‌ر هه‌ڵده‌گرێت، له‌وێ‌ وه‌ك درێژه‌و پێده‌ری په‌یوه‌ندی ئیسلامیی كه‌ جه‌نابی مامۆستا شێخ موحه‌ممه‌د به‌رزنجی و پاشان مامۆستا شێخ له‌تیفی ڕه‌حمه‌تی كه‌ ڕابه‌رێتیان ده‌كرد درێژه‌ به‌ خه‌بات ئه‌دات، تا له‌ گه‌ڵ‌ جه‌نابی مامۆستا عوسمان و مامۆستا مه‌لا عه‌لی (خوا لێیان خۆش بێت) و باقی مامۆستایانی تر بزووتنه‌وه‌ی ئیسلامیی ڕاده‌گه‌یه‌نن.
جێگه‌ی باسه‌: جه‌نابی مامۆستا له‌ ساڵی 1911 له‌ گوندی پریسی سه‌ر به‌ قه‌زای هه‌ڵه‌بجه‌ی شه‌هید له‌ دایك بووه‌، قوتابییه‌كی كارای مامۆستا مه‌لا ساڵحی گه‌وره‌و چه‌ندین زانای تری ناوچه‌كه‌ زانسته‌ شه‌رعییه‌كانی ته‌واوكردووه‌.
به‌ڕێزی دوای ململانێیه‌كی زۆری له‌ گه‌ڵ‌ نه‌خۆشیدا ئه‌جه‌ل مه‌ودای نادا تا له‌ ڕۆژی 7 له‌سه‌ر 8ی ساڵی 2008 له‌ شه‌وی هه‌ینی له‌ شاری سلێمانی كۆچی دوایی ده‌كات، واش بڕیاره‌ كه‌ ته‌رمی پیرۆزی له‌ ته‌ك گلكۆی به‌ڕێزان مامۆستا مه‌لا عوسمان و مامۆستا مه‌لا عه‌لی و باقی مامۆستایانی تر كۆچكردووی نێو ڕابوونی ئیسلامی به‌ خاك بسپێردرێت..
هه‌زاران سڵاوو ڕه‌حمه‌ت له‌ گۆڕی پاكی مامۆستا مه‌لا عومه‌رو تێكڕای مامۆستاو ڕابه‌رو پێشه‌وایانی كۆچكردووی ئیسلامیی.
ئێمه‌ لێره‌وه‌ وه‌ك ستاف و به‌ڕێوه‌به‌ری ماڵپه‌ڕی ده‌نگی ئیسلام، پرسه‌و سه‌ره‌خۆشی خۆمان ئاڕاسته‌ی جه‌نابی مامۆستا مه‌لا محه‌مه‌د مه‌لا عومه‌ر عه‌بدولعه‌زیز (ڕابه‌ری گشتیی بزووتنه‌وه‌ی ئیسلامیی) و تێكڕای مه‌كته‌بی سیاسیی و سه‌كردایه‌تی و پێشمه‌رگه‌كانی بزووتنه‌وه‌ی ئیسلامیی ده‌كه‌ین و داوای لێخۆشبوونیش بۆ جه‌نابی مامۆستا مه‌لا عومه‌ر عه‌بدولعه‌زیز ده‌كه‌ین و خوا سه‌بووری خانه‌واده‌و تێكڕای خزمو خوێشانی مامۆستای ڕه‌حمه‌تی بدات. (آمين)
(إنا لله وإنا اليه راجعون)

به‌ڕێوه‌به‌رایه‌تی ماڵپه‌ڕی ده‌نگی ئیسلام