بۆ ئه‌وانه‌ی منداڵیان نابێت..
هه‌واڵی خوشک و برایه‌کم پێ گه‌یشت که‌ بۆ ماوه‌ی حه‌وت ساڵه‌ هاوسه‌رن و منداڵیان نییه‌، بێبه‌شن له‌ ئۆقره‌ی دڵ و ڕووناکی ماڵ و گه‌شیی چاوه‌کان..
بێمنداڵی ئه‌و ئازاره‌یه‌ ئیبراهیمی هێنایه‌ دوعارَبِّ هَبْ لِي مِنَ الصَّالِحِينَ[الصافات:100]، ئه‌و(علیه السلام) کاتێک ویستیان فڕێی بده‌نه‌ نێو ئاگره‌وه‌، داوای له‌ خوا نه‌کرد، بڕوای وابوو خوای گه‌وره‌ ئاگای لێیه‌ و ڕازیش بوو به‌ چاره‌نووس، به‌ڵام بۆ ئازاری بێ منداڵی پاڕایه‌وه‌ و خوای گه‌وره‌ش ڕازی کرد..


کاتێک ڕێگاکان و هۆکاره‌کان بنبه‌ست ده‌بن، چاره‌سه‌ری ده‌ستی ئێمه‌ی مرۆڤ ده‌گاته‌ دوایین، هه‌وڵه‌کان شه‌که‌ت و بێ ئه‌نجام ده‌بن، ئا ئه‌و کاته‌ له‌ هه‌موو ساتێکی تر زیاتر ڕووی ئاسمان و ده‌رگای خوا کراوه‌یه‌ هه‌تا ده‌ستی بۆ به‌رز بکه‌ینه‌وه‌ و لێی بپاڕێینه‌وه‌..

دوعا و پاڕانه‌وه‌ به‌ زه‌بوونی و سه‌رکزی له‌ خوای خاوه‌ن و ده‌وڵه‌مه‌ند! ئه‌و ده‌وڵه‌مه‌نده‌ی هه‌تا بدات زیاتری له‌لایه‌ و خۆیشی خاوه‌ن بڕیاره‌.. چی بووێ هه‌ر ئه‌وه‌یه‌ و هیچ هێزێک نییه‌ بتوانێ ڕێ له‌ ویستی بگرێ، ئه‌گه‌ر که‌سێک توانی ڕازی بکا و له‌ ڕه‌حمی بسه‌نێ، پێی ئه‌دا و ئاواتی دێته‌ بوون.

سوێند به‌خوا له‌ دوعا باشتر نییه‌، به‌هێزترین چه‌ک و هۆکاره‌ بۆ هاتنه‌دی ئاواته‌کانمان.

ئێوه‌ ده‌زانن خوای گه‌وره‌ له‌ قورئانه‌که‌ی فه‌رموویه‌تی{لِلَّهِ مُلْكُ السَّمَاوَاتِ وَالْأَرْضِ يَخْلُقُ مَا يَشَاءُ يَهَبُ لِمَنْ يَشَاءُ إِنَاثاً وَيَهَبُ لِمَن يَشَاءُ الذُّكُورَ }الشورى:49. واته‌/ هی خوایه‌ موڵکی ئاسمانه‌کان و زه‌وی و دروستی ده‌کات هه‌رچی بوێ و ده‌یبه‌خشێ به‌ هه‌رکه‌سێ منداڵی مێینه‌ و ده‌یبه‌خشێ بۆ هه‌رکه‌سێ خۆی بییه‌وێ نێریینه‌..

هه‌روه‌ها فه‌رموویه‌تیوَقَالَ رَبُّكُمُ ادْعُونِي أَسْتَجِبْ لَكُمْ[غافر:60]. واته‌/ په‌روه‌ردگارتان فه‌رمووی؛ ته‌نها بانگی من بکه‌ن له‌ پاڕانه‌وه‌کانتان، وه‌ڵامتان ئه‌ده‌مه‌وه‌.

هه‌روه‌ها ده‌فه‌رموێفَنَادَتْهُ الْمَلآئِكَةُ وَهُوَ قَائِمٌ يُصَلِّي فِي الْمِحْرَابِ أَنَّ اللّهَ يُبَشِّرُكَ بِيَحْيَـى مُصَدِّقاً بِكَلِمَةٍ مِّنَ اللّهِ وَسَيِّداً وَحَصُوراً وَنَبِيّاً مِّنَ الصَّالِحِينَ[آل عمران:39]. واته‌/ جوبره‌ئیل بانگی لێوه‌کرد له‌ کاتێک ئه‌و(گه‌وره‌مان زه‌که‌ریا سه‌لامی خوای لێ بێت) نوێژی ده‌خوێند و له‌خوا ده‌پاڕایه‌وه‌.. که‌ خوای گه‌وره‌ موژده‌ی(یه‌حیا)ت پێ ئه‌دا که‌ بڕوا به‌ وشه‌ی خوا ده‌کا(عیسا پێغه‌مبه‌ر سه‌لامی خوا لێ بێت) و گه‌وره‌پیاو ده‌بێ له‌ نێو قه‌ومه‌که‌ی خۆی و نزیکی ئاره‌زوو و گوناهه‌ نابێته‌وه‌ و ده‌بێته‌ پێغه‌مبه‌ر و یه‌کێک له‌ پیاوچاکان..

هه‌روه‌ها ده‌فه‌رموێفَقُلْتُ اسْتَغْفِرُوا رَبَّكُمْ إِنَّهُ كَانَ غَفَّاراً* يُرْسِلِ السَّمَاء عَلَيْكُم مِّدْرَاراً* وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَاراً[ نوح:10-12]. واته‌/ پێم وتن(نوح) داوای لێخۆشبوون له‌ خوا بکه‌ن، ئه‌و به‌ڕاستی لێخۆشبووه‌، ده‌ینێرێته‌ خوارێ له‌ ئاسمانه‌وه‌ بارانی به‌ فه‌ڕڕ و به‌لێزمه‌، پێتان ئه‌دا و زیادی ده‌کا به‌سه‌رتانا ماڵ و منداڵی زۆر و باخ و ڕووباریشتان دێنێته‌ به‌رهه‌م..

هه‌روه‌ها ده‌فه‌رموێوَلَوْ أَنَّ أَهْلَ الْقُرَى آمَنُواْ وَاتَّقَواْ لَفَتَحْنَا عَلَيْهِم بَرَكَاتٍ مِّنَ السَّمَاءِ وَالأَرْضِ وَلَـكِن كَذَّبُواْ فَأَخَذْنَاهُم بِمَا كَانُواْ يَكْسِبُونَ [الأعراف:96]. واته‌/ ئه‌گه‌ر خه‌ڵکی ئاواییه‌کان(میلله‌تانی پێش ئێمه‌) باوه‌ڕیان بهێنایه‌ و به‌ده‌م فه‌رمانه‌کانی خواوه‌ بهاتنایه‌(چاکه‌کار و دوور بوونایه‌ له‌ سه‌رپێچی خوا؛ ته‌قوا) ئه‌وا فه‌ڕڕ و به‌ره‌که‌تمان به‌سه‌ردا واڵا ده‌کردنه‌وه له‌ هی ئاسمان و زه‌وی، به‌ڵام به‌درۆیان خسته‌وه‌(په‌یامی ئێمه‌ و پێغه‌مبه‌ره‌کانمان) ئێمه‌ش به‌ توندی گرتمانن به‌وه‌ی ئه‌نجامیان ده‌دا له‌ کرده‌وه‌ی خراپه‌‌.

ئه‌ی خوشک و برای به‌ڕێزم؛ له‌ ژێر ڕووناکی و فه‌ڕڕی ئه‌م ئایه‌تانه‌وه پێتان ده‌ڵێم که‌ چاره‌سه‌ری ئێوه‌ به‌و قورئانه‌یه‌ و به‌و کرده‌وانه‌یه‌ که‌ له‌و ئایه‌تانه‌ باسیان لێوه هاتووه. پاڕانه‌وه‌ و نوێژ و عیباده‌تی زۆر و پاک و چاکه‌کردن و وازهێنان له‌ سه‌رپیچی و تاوانه‌کان(ته‌قوا) و زۆر داوای لێخۆشبوون(ئیستیغفار)‌..

خوای گه‌وره‌ باسی پێغه‌مبه‌ران ئیبراهیم و ئه‌یوب و یونس و زه‌که‌رییا و نوح و لوط-سه‌لامی خوایان لێ بێت- بۆ ده‌کات له‌ سووره‌تی(الأنبیاء:51-90) که‌ چۆن له‌ دوای ئه‌وه‌ی داوا ده‌که‌ن و ده‌پاڕێنه‌وه‌، خوای گه‌وره‌ دێت به‌ هانایان و ڕزگارییان ده‌کات له‌ ناڕه‌حه‌تی و ناخۆشی.. ئه‌یوب له‌ نه‌خۆشی و یونس له‌ سکی ماسییه‌که‌ و زه‌که‌رییا له‌ ته‌نیایی و نوح و لوطیش له‌ قه‌ومه‌که‌یان..

خوای گه‌وره‌ موژده‌ی منداڵی دایه‌ گه‌وره‌مان ئیبراهیم و زه‌که‌رییا-سه‌لامی خوایان لی بێت- له‌ کاتێکدا ته‌مه‌نیان له‌ پیریدا بوو و خێزانه‌کانیشیان منداڵییان نه‌ده‌بوو، گه‌وره‌مان زه‌که‌رییا کاتێک بینی خوای گه‌وره‌ به‌ بێ حیساب(هۆکار) ڕۆزی ده‌دایه‌ مه‌رییه‌م دایکی عیسا-سه‌لامی خوایان لێ بێت- ئه‌وجا داوای له‌ خوا کرد منداڵی پێ بدا، چونکه‌ وه‌کو هۆکار دڵنیا بوو منداڵی نابێ به‌وه‌ی خێزانی ناته‌واو بوو(عقم)، به‌ڵام له‌ ویستی خوادا ئه‌گه‌ر بیه‌وێ به‌بێ هۆکاریش هه‌رچی بییه‌وێ ده‌کات و ده‌یهێنێته‌ بوون، هه‌ربۆیه‌ یه‌حیای پێ به‌خشی و ژه‌نه‌که‌شی بۆ سازکرد، له‌وه‌ی منداڵی ببێت، فه‌رموویَاسْتَجَبْنَا لَهُ وَوَهَبْنَا لَهُ يَحْيَى وَأَصْلَحْنَا لَهُ زَوْجَهُ[الأنبیاء:90]. واته‌/ وه‌ڵاممان دایه‌وه‌، یه‌حیامان پێ به‌خشی و خێزانه‌که‌یمان بۆ سازکرد.
هاتن و به‌خشینی یه‌حیای خسته‌ پێش شیفای خێزانییه‌وه‌، ئه‌مه‌ش ئه‌وه‌ ده‌گه‌یه‌نێت که‌ به‌ر له‌ شیفای خێزانه‌که‌ی یه‌حیای پێ به‌خشی. له‌به‌ر ئه‌وه‌ بێهیوا مه‌به‌ن له‌ ڕه‌حمه‌تی خوا..

چی بکه‌ین؟
ئێوه‌ ئه‌گه‌ر پێتان بوترێ به‌ پاره‌یه‌کی بێشومار ڕه‌نگه‌ هیوایه‌کتان ببێ بۆ چاره‌سه‌ری، ئایا به‌قه‌رزیش بێ ئه‌و پاره‌یه‌ په‌یدا ناکه‌ن!؟ ئایا ئه‌گه‌ر لێتان داوابکرێ سه‌فه‌ر بکه‌ن بۆ وڵاتێکی دوور ئه‌گه‌رچی زه‌حمه‌تی و تێچوونی زۆری بوێ، ئایا سه‌فه‌ری بۆ ناکه‌ن؟!
ئه‌گه‌ر پێتان بوترێ؛ ده‌بێت بۆ ماوه‌یه‌ک که‌مخۆری و که‌مخه‌وی و وه‌رزش بکه‌ن هه‌تا منداڵتان ببێ، ئایا ئاماده‌ نین خۆتان برسی و تینوو و له‌شسووک بکه‌ن!؟ ئایا ئه‌گه‌ر پزیشکێک هه‌بێ و چاره‌سه‌ری له‌لا بێ، به‌ڵام ماوه‌ی که‌مه‌ یان نایه‌وێ، ناچن زۆری لێ بکه‌ن و له‌به‌ری بپاڕێنه‌وه‌ هه‌تا یارمه‌تیان بدا؟!

ئه‌ی خوشک و برام؛ من پێتان ده‌ڵێم پێویست ناکات ئه‌و ئه‌سته‌مانه‌ ببینن و مه‌چن بۆ لای که‌س و داوا له‌ هیچ به‌نده‌یه‌ک مه‌که‌ن، ده‌رگای خوای به‌ڕه‌حم و به‌خشنده‌تان پێ نیشان ده‌ده‌م، پێتان ده‌ڵێم بۆ ماوه‌ی چه‌ند مانگێک ته‌نها با ژیانتان هه‌مووی بۆ خوا بێ، شه‌و و ڕۆژ و خوله‌کی ئه‌و چه‌ند مانگه‌ به‌رنامه‌یه‌کی چڕوپڕ دابڕێژن له‌ عیباده‌ت و نوێژ و پاڕانه‌وه‌ و ئیستیغفار و خێر و چاکه‌کردن. نوێژه‌کانتان به‌ کۆمه‌ڵ بکه‌ن(پیاوه‌که‌ت له‌ مزگه‌وت و با که‌ هاته‌وه‌ ئیمامه‌تی بۆ تۆ بکات) هه‌موو نوێژه‌ سوننه‌ته‌کان بکه‌ن، هه‌موو شه‌وێک شه‌ونوێژ به‌ تایبه‌تی له‌ دوابه‌شی سێیه‌کی شه‌و(دوو سه‌عاتیک پێش نوێژی به‌یانی)، له‌ خوا غافڵ مه‌به‌ن و هه‌موو کات یادی بکه‌ن(به‌ قورئانخوێندن و کاری باشه‌)، ده‌ستی هه‌ژاران و هه‌تیوان و بێوه‌ژنان و لێقه‌وماوان بگرن پێغه‌مبه‌رمان(صلى الله علیه‌ وسلم) ده‌فه‌رموێ: ئه‌وانه‌ی له‌ زه‌وی به‌زه‌یی و به‌ ڕه‌حمن، به‌زه‌یی دێته‌وه‌ پێیان ئه‌وه‌ی له‌ ئاسمانه‌(خوای گه‌وره‌). ده‌ستی که‌سێ بگرن وا له‌ لێواری تیاچوونه‌ له‌به‌ر نه‌بوونی، دوعا بۆ ئه‌وانه‌ بکه‌ن که‌ منداڵیان نییه‌ به‌دڵ و به‌ گیان، هه‌تا مه‌لائیکه‌ ئامین بکه‌ن بۆ ئێوه‌ش. ئه‌وکات به‌ ئامینی مه‌لائیکه‌ بێبه‌ش نابن.

پێغه‌مبه‌ری خوا(صلى الله علیه‌ وسلم) ڕۆژی(100) جار داوای لێخۆشبوونی کردووه‌ له‌ خوا، ئه‌و تاوانیشی نه‌بووه‌، با ئێمه‌ زیاتر بکه‌ین، به‌ڵکوو دابنیشن به‌ خوله‌ک و دووان ته‌نها داوای لێخۆشبوون بکه‌ین(‌أستغفرالله أستغفرالله).

باشترین هه‌لتان له‌پێشه‌! مانگی ره‌مه‌زان، مانگی عیباده‌ت و ئاسانیی خواپه‌رستی، شه‌یتانه‌کان به‌ستراونه‌ته‌وه‌، ئیوه‌ش ئاره‌زووی خۆتان ببستنه‌وه‌ له‌ گوناهه‌کان و سه‌رکه‌شی و تاوان، با له‌ ماڵتاندا مۆسیقا لێ نه‌درێ، دوور که‌ونه‌وه‌ له‌ به‌فیڕۆدانی کات له‌ ته‌ماشاکردنی ته‌له‌فیزیۆن و فیلیم و ئه‌و به‌رنامانه‌ی دایانڕشتووه‌ بۆ له‌ده‌ستدانی ئه‌و مانگه‌..
له‌ خوا زۆر بپاڕێنه‌وه‌ و زۆریش دووپاتی بکه‌نه‌وه‌، ئه‌گه‌ر له‌ هه‌ر پاڕانه‌وه‌یه‌ک(100) جاریش بڵێی خوایه‌ منداڵمان پێ ببه‌خشه‌ وه‌کو چۆن منداڵت به‌خشییه‌ پێغه‌مبه‌ر ئیبراهیم و زه‌که‌رییا، خوای گه‌وره‌ زیاتری پێخۆشه‌ چونکه‌(ویحب الملحین في الدعاء) واته‌/ ئه‌وانه‌ی جه‌خت له‌ دوعاکانیان ده‌که‌نه‌وه‌ به‌زۆر دووباره‌کردنه‌وه‌ی، خوای گه‌وره‌ خۆشی ده‌وێن. ئه‌گه‌ر خوای گه‌وره‌ که‌سێکیشی خۆش ویست، چۆن ڕه‌حمی پێ ناکات..
له‌ ڕه‌مه‌زان باشترین هه‌له‌، به‌ربانگی چه‌ند ئێواره‌یه‌کی ڕۆژووی به‌نده‌کانی خوا له‌ مزگه‌وتێک ، ئه‌گه‌ر پێیان بڵێن‌ دوعاتان بۆ بکه‌ن له‌ سوجده‌کانایان، یان پێشوه‌خت ئیمام پێیان بڵێ که‌ نانی ئه‌م ئێواره‌یه‌ له‌لایه‌ن خێزانێکه‌وه ئاماده‌کراوه‌ و‌ داوای دوعای خێرتان لێده‌که‌ن هه‌تا خوای به‌ڕه‌حم منداڵیان پێ بدات.. سوێند به‌خوا شتێکی زۆر باشه‌ و به‌رهه‌می ده‌بێت. یان به‌ ئیمامی مزگه‌وت بڵێن له‌دوعای نوێژی جومعه‌ دوعاتان بۆ بکات هه‌تا به‌ر ئامینی ئه‌و خه‌ڵکه‌ زۆره‌ بکه‌ون به‌ڵکوو هی دانه‌یه‌کیان وه‌ربگیرێت.

دوعای دوای ده‌ستنوێژ گرتن و دوای بانگ هه‌تا قامه‌ت ده‌کرێ و به‌ربانگ و دوابه‌شی شه‌و زۆر نێزیکه قه‌بووڵ بێ و ڕه‌ت نه‌کرێته‌وه‌، هه‌روه‌‌ها دوعا له‌ سوجده‌کان.‌

*(10) شه‌وی کۆتایی ڕه‌مه‌زان و شه‌وی قه‌درتان له‌ یاد نه‌چێ و زیاتر خۆتانی تیا ماندوو بکه‌ن له‌ عیباده‌ت و پاڕانه‌وه‌..

له‌ دوای ڕه‌مه‌زان:
له‌ دوای ڕه‌مه‌زانیش هه‌ر به‌و هیوایه‌ و به‌و گه‌رمییه‌(به‌پێی توانا) به‌رده‌وام بن، بڕواتان وابێت خوایه‌کی بیسه‌ر و بینه‌رتان هه‌یه‌ و له‌ خۆتان و دایکتان بۆتان به‌ زه‌ییتره‌.. هیوابڕاو مه‌بن له‌ خوایه‌ک که‌: شه‌رم ده‌کات کاتێک به‌نده‌که‌ی ده‌ستی لێ پان ده‌کاته‌وه‌، به‌ به‌تاڵی بۆیان بگێڕێته‌وه‌! ئه‌و گوناهانه‌ی وازتان لێ هێناوه‌ مه‌گه‌ڕێنه‌وه‌ سه‌ری! ئێوه‌ ئێستا پاک بوونه‌ته‌وه‌ له‌ هه‌موو گوناهه‌کان و پله‌وپایه‌تان له‌لای خوا به‌رزبۆته‌وه‌، زیاتر له‌ جاران دوعاتان قه‌بووڵه‌.. فه‌رزه‌کان و سوننه‌ته‌کانی نوێژ و ڕۆژوو به‌جێ بهێنن، به‌شداری ده‌رس و ده‌ور بکه‌ن و به‌تاڵی له‌ کاتتان مه‌هێڵن و هه‌میشه‌ به‌شتی چاکه‌وه‌ خه‌ریک بن، هه‌تا مۆڵه‌تی گوناهه‌تان بۆ ئاسان نه‌بێت.

دوور که‌وتنه‌وه‌ له‌ تاوان و سه‌رپێچی مانای ڕه‌وینه‌وه‌ی تووڕه‌یی خوایه‌ له‌سه‌رتان، به‌نده‌ش بۆ ئه‌وه‌ی خوای گه‌وره‌ ڕه‌حمی پێ بکات، ده‌بێت خوا خۆشی بوێ یان هیچ نه‌بێ لێی تووڕه‌ نه‌بێ، چۆن ده‌گونجێ خوای به‌زه‌یی به‌ گوناهه‌کانمان تووڕه‌ بکه‌ین و ئومێدیشمان وابێت وه‌ڵامی داوایه‌کانمان بداته‌وه‌!؟

نییه‌تی حه‌ج بهێنن:
له‌ ئێستاوه‌ سه‌فه‌ری حه‌ج بڕیار بده‌ن، له‌وێ زۆر فورسه‌تی قه‌بووڵبوونی دوعا هه‌یه‌، له‌ یه‌که‌م ساتی بینینی که‌عبه‌ی پیرۆز، له‌ خواردنه‌وه‌ی ئاوی زه‌مزه‌م و له‌ پاڕانه‌وه‌ی ڕۆژی عه‌ره‌فه‌، له‌ پاڕانه‌وه‌ به‌گشتی له‌وێ.. چه‌ندین که‌س هه‌بوون له‌وێ شیفایان بۆ هاتووه‌، دوعایان قه‌بووڵ بووه‌،داوایه‌کانیان هاتۆته‌ دی.
هاوه‌ڵه‌کان ده‌ڵێن؛ ساڵێکی تر نه‌ده‌هاته‌وه‌، دوعایه‌کانمان هه‌مووی قه‌بووڵ ده‌بوون!
برامان هه‌یه‌ ده‌ڵێ: منداڵمان نه‌ده‌بوو چه‌ندین ساڵ، چوومه‌ حه‌ج و له‌لای که‌عبه‌ له‌ یه‌که‌م بینین، داوام له‌ خوا کرد، منداڵی پێ به‌خشین!
ئافره‌تێکی ئه‌وروپی له‌ دوای ئه‌وه‌ی موسوڵمان ده‌بێت، نه‌خۆشییه‌کی کوشنده‌ی هه‌یه‌، به‌ نیازی مردن له‌لای ماڵی خوا و که‌عبه‌ی پیرۆزه‌وه‌ سه‌فه‌ری ئه‌وێ ده‌کات، به‌ڵام له‌وێ به‌ ئاوی زه‌مزه‌م و دوعای ئه‌و جێگه‌ پاکه‌ شیفای بۆ دێت و چاک ده‌بێته‌وه‌..
ئه‌گه‌ر بۆشتان ئاسان نه‌بوو بگه‌نه‌ حه‌ج، داوای دوعای خێر بکه‌ن له‌وانه‌ی ده‌چن هه‌تا له‌ ته‌واف و له‌ عه‌ره‌فه‌ بۆتان بپاڕێنه‌وه‌.

ئه‌وه‌ی بۆم باسکردن به‌رنامه‌ی سێ مانگه‌ له‌ نزیکبوونه‌وه‌ له‌ خوا و ته‌نها هاوار بۆ لای ئه‌و و دوورکه‌وتنه‌وه‌ له‌ گوناهه‌کان، له‌ دوای ئه‌وه‌ ئه‌گه‌ر وه‌کو پێویست و به‌ دڵسۆزی ته‌نها ڕووتان کردبێته‌ خوا، دڵنیایی سێ ئه‌نجامتان بۆ ده‌که‌م:
1/ یان ئه‌وه‌یه‌ هه‌ر له‌و ماوه‌یه‌ و به‌زوویی موژده‌ی منداڵتان پێ ده‌درێ..
2/ یان ڕه‌نگه‌ دوا ده‌که‌وێ به‌ڵام هه‌ر دێ.
3/ یان ئه‌گه‌ر خوای گه‌وره‌ هه‌ر بۆی بڕیار نه‌دان، ئه‌وا دڵنیا بن بێمنداڵی چاکتره‌ بۆتان و سه‌بری له‌سه‌ر بگرن ، چاوه‌ڕێی پاداشتی هه‌ردوو دونیا ده‌بن . له‌ هه‌ردوو دونیا پاداشتێکتان ده‌داته‌وه‌ هه‌ستی پێ ده‌که‌ن که‌ له‌ منداڵ باشتر بێت بۆتان. به‌تایبه‌تی له‌ ڕۆژی قیامه‌ت، به‌ری ئه‌و عیباده‌ت و پاڕانه‌وانه‌تان ده‌بیننه‌وه‌ و به‌چاوی خۆتان ده‌یبینن.

دوو ڕووداو:
1- ژن و مێردێک، له‌ نێوانی خۆیان ده‌که‌ونه ئاخاوتن، ده‌ڵێن باشه‌ ئێمه‌ ئه‌وا بۆ بیست ساڵه‌ پێکه‌وین و منداڵمان نابێ، خوای گه‌وره‌ش ده‌فه‌رموێ له‌سه‌ر زمانی پێغه‌مبه‌ر نوح(سه‌لامی خوای لێ بێت) به‌ قه‌ومه‌که‌ی‌فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّاراً* يُرْسِلِ السَّمَاء عَلَيْكُم مِّدْرَاراً* وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَاراً ده‌ڵێن با ئێمه‌ش بۆ ماوه‌یه‌ک ئیستیغفاری زۆر بکه‌ین و زیاتر ڕووبکه‌ینه‌ خوا و دوورکه‌وینه‌وه‌ له‌ گوناهه‌کان. ئه‌نجامی ئه‌وه‌ به‌ ویستی خوای گه‌وره‌ له‌ دوای ماوه‌یه‌ک(زۆریش نییه‌) ئافره‌ته‌که‌ باری تێک ده‌چێ و له‌ دوای پشکنین هه‌واڵی سکی(حمل)ی پێ ئه‌ده‌ن! له‌ پاش ماوه‌یه‌کی تر حه‌زیان به‌ منداڵی تر ده‌بێ، منداڵی دووه‌م و سێیه‌میش هه‌ر به‌ ئیستیغفار له‌ خواوه‌ خه‌ڵات ده‌که‌ن.
2- ژن و پیاوێک هه‌روه‌کو ئێوه‌ی به‌ڕێز، پیاوه‌که‌ی نه‌زۆکی هه‌یه‌ نه‌هۆی که‌موکوڕیی له‌ سپێرمی. پیاوه‌که‌ ده‌ڵێت؛ پزیشکان ئیزنیان دابووم له‌وه‌ی منداڵم ببێت، بۆیه‌ منیش ڕووم کرده‌ خوا و زۆر له‌ خوا پاڕامه‌وه‌ له‌گه‌ڵ ئیستغفاری زۆر، ده‌ڵێ خوای گه‌وره‌ منداڵی پێ داین، له‌ دوای ساڵێک چووینه‌وه‌ بۆلای پزیشکه‌که‌م، پێم وت بمپشکنه‌ به‌ڵکوو ئومێد هه‌بێت مندآڵ ببێ، ده‌ڵێ له‌ دوای پشکنین وتیان ، ئه‌ستمه‌ که‌ تۆ منداڵت ببێت، ده‌ڵێ؛ پێم وتن ده‌ی من منداڵم هه‌یه‌ و فه‌رموو پشکنینی(DNA)ی بۆ بکه‌ن بزانن کوڕی منه‌ یان نا!؟ ده‌ڵێ له‌ دوای پشکنین، زۆریان پێ سه‌یر بوو، وتیان ئه‌مه‌ موعجیزه‌یه‌ ئه‌گینا تۆ ئه‌ستمه‌ منداڵت ببێت..

قورئان و هه‌نگوین و ڕۆنی ڕشکه‌ و زه‌یتوون:
له‌و ماوه‌یه‌ ئه‌و ده‌رمانانه‌ په‌یدا بکه‌ن(هه‌نگوینی ساغ و ڕۆنی ڕشکه‌ و زه‌یتوون) قورئانی به‌سه‌ر بخوێنن به‌ جۆرێ هه‌ناسه‌ت قورئانخوێندنه‌که‌ بیانگاتێ. ئه‌وجا ڕۆژانه‌ که‌وچکه‌ چێشت یان زیاتر به‌یانیان ئێوارن و ئه‌و دوو ڕۆنه‌ش با مێردی به‌ڕێزت لێی بخوات و کۆئه‌ندانی زاوزێی(به‌شی‌ ده‌ره‌وه‌ی) پێ چه‌ور بکات، به‌ ئیزنی خوا شیفای بۆ دێ و کێشه‌ی نامێنێت.

هیوادارم توانیبێتیم به‌ ئه‌رکی برایه‌تیم هه‌ستم و ئێوه‌ش به‌گوێم بکه‌ن، داوا له‌ خوێنه‌رانی به‌ڕێزیش ده‌که‌ین له‌ دوعای خێر بێبه‌شیان نه‌که‌ن له‌ ڕه‌مه‌زان و کاتی به‌ربانگ بۆیان بپاڕێنه‌وه‌.