كچێك دواى هه‌فته‌یه‌ك زیندوو ده‌بێته‌وه‌!!
من كچێكم ماڵم له‌ یه‌كێك له‌ گه‌ڕه‌كه‌كانى شارى هه‌ولێره‌، دایكم ئافره‌تى ماڵـه‌و باوكیشم وه‌فاتى كردووه‌، برایه‌كى له‌ خۆشم گه‌وره‌ترم هه‌یه‌ له‌گه‌ڵ خوشكێك.
من له‌ كۆلێژ له‌ به‌شى ئینگلیزى بووم، زۆر خۆم ماندوو ده‌كرد له‌ خوێندن، كه‌ هه‌موو كاته‌كانم ته‌رخان كردبوو بۆ خوێندن هه‌موو شتێكم له‌ بیروهۆشى خۆم ده‌رهێنابوو ته‌نها خوێندن نه‌بێت.

هه‌ر بۆیه‌ش كاتێك له‌ زانكۆ ده‌مبینى هه‌ندێَ له‌ قوتابیان خوێندنیان به‌لاوه‌ ناوه‌و خه‌ریكى عیشق بازین زۆرم پێ سه‌یر بوو چۆن پشتیان له‌ خوێندن كردووه‌ و به‌ دواى ئه‌و كاره‌ بێهوودانه‌ كه‌وتوون زۆرجاران هاوڕێیه‌ كچه‌كانم ده‌یانگوت: باشه‌ تۆ بۆ ئاوا خۆت ماندوو ده‌كه‌ى!! بۆ خۆت به‌ دوور گرتووه‌ له‌ جیهانى عیشق و ئه‌وین!! بۆ نایه‌ى ته‌نها بۆ جارێكیش بێت تامى ئه‌وین بكه‌یت ئه‌وكات ده‌زانى چه‌ند دابڕاوى له‌و خۆشى و تامه‌ جوان و قه‌شه‌نگه‌!!
زۆر جاریش هه‌ر ئه‌و هاوڕێیه‌ كچه‌كانم ده‌یانگوت: فلانه‌ كوڕ داواى لىَ كردووین كه‌ په‌یوه‌ندى له‌گه‌ڵ ببه‌ستى.
به‌لاَم من زۆر به‌ توندى داوا كه‌یانم ڕه‌ت ده‌كرده‌وه‌، به‌رده‌وام بووم تاكو قۆناغى كۆتای زۆر به‌ پوختى خوێندنى خۆم ته‌واو كرد، پاشانیش به‌ مامۆستا دامه‌زرام، ئه‌و موچه‌یه‌ى وه‌ریشم ده‌گرت نیوه‌م ده‌دایه‌ ماڵه‌وه‌ ئه‌وه‌ى تریشم بۆ خۆم هه‌ڵده‌گرت یان به‌ زێڕم ده‌دا چه‌ند ساڵێك به‌و شێوه‌ به‌رده‌وام بووم له‌ ده‌وامه‌كه‌م، تا ئه‌و رۆژه‌ ره‌شه‌م به‌سه‌ر هات كه‌ هه‌موو خۆشیه‌كانى لێكردم به‌ یه‌ك پارچه‌ له‌ بێئومێدى و فرمێسك و ناخۆشى، ئه‌ویش ئه‌وه‌ بوو ڕۆژێكیان یه‌كێك له‌ هاوڕێكانم كه‌ مامۆستابوو له‌گه‌ڵم ته‌له‌فۆنى بۆ كردم وتى: به‌یانى براكه‌م ژن دێنىَ حه‌زده‌كه‌م تۆش بێى بۆ ئاهه‌نگه‌كه‌ منیش وتم: باشه‌، به‌یانى چووم بینیم ئاهه‌نگێكى گه‌وره‌یه‌ و چه‌ندین كوڕ و كچ تێكه‌ڵ ببوون هه‌ریه‌كه‌ و جۆره‌ جل وبه‌رگێكى له‌به‌ر كردبوو، هه‌ڵپه‌ركىَ و زه‌ماوه‌ندێكى زۆر گه‌رم ده‌ستى پێكرد.
چاوم به‌ كوڕێك كه‌وت زۆر به‌ وردى له‌ منى ده‌ڕوانى، منیش بایه‌خم پێ نه‌دا و چوومه‌ ناو شایى و ده‌ستم كرد به‌ هه‌ڵپه‌ڕكىَ، بینیم ئه‌و كوڕه‌ى سه‌یرى ده‌كردم هاته‌ ده‌ستم ماوه‌یه‌ك له‌ ده‌ستم ماوه‌، دواتر من له‌ ناو شایى هاتمه‌ ده‌ر پشوویه‌كم دا، ئینجا دیسان چوومه‌وه‌ ناو شایى بۆ جارى دووه‌م دیسانه‌وه‌ ئه‌و كوڕه‌ هاته‌وه‌ ده‌ستم كاغه‌زێكى خسته‌ ناو گیرفانم، ئه‌و كوڕه‌ به‌ جۆرێك هه‌ڵس و كه‌وتى له‌گه‌ڵم ده‌كرد ده‌یویست سه‌رنجى من بۆ لاى خۆى ڕابكێشێت.. دواى ئه‌وه‌ى ئاهه‌نگه‌كه‌ ته‌واو بوو چوومه‌وه‌ بۆ ماڵ، نامه‌كه‌م كرده‌وه‌ نوسرابوو: من بۆ تۆ لێدراوم و ئه‌ویندارى تۆ بوومه‌ حه‌زده‌كه‌م بێمه‌ خوازبێنیت ئه‌گه‌ر ڕازى ئه‌وه‌ش ژماره‌ى مۆبایله‌كه‌مه‌ به‌ بوون و نه‌بوون وه‌ڵامم بده‌وه‌، ئه‌وه‌ى ڕاستى بێت من ئه‌و كوڕه‌ كه‌وتبووه‌ دڵم بۆیه‌ بۆ به‌یانى تۆله‌فۆنم بۆ كوڕه‌كه‌ كرد تاكو بزانم نیازى چییه‌!!
ته‌له‌فۆنم بۆ كرد ئه‌ویش زۆر به‌ گه‌رمى وه‌لاَمى دامه‌وه‌، ئه‌و جاره‌ به‌ جۆرێك قسه‌ى له‌گه‌ڵ كردم كه‌ دڵى منى بۆ خۆى راكێشا.. بۆ به‌یانى ئه‌و ته‌له‌فۆنى بۆ كردمه‌وه‌ و باسى له‌ خۆشه‌ویستى خۆى بۆ من ده‌كرد و باسى ئه‌وه‌ى ده‌كرد كه‌ ده‌بێته‌ پیاوێكى باش بۆ من و من به‌خته‌وه‌ر ده‌كات.. ماوه‌ى مانگێك به‌و شێوه‌یه‌ قسه‌مان ده‌كرد.. پاشان له‌ په‌یوه‌ندى ته‌له‌فۆنى بوو به‌ یه‌كتر بینین.. دواتر بوو به‌ پیاسه‌.. چه‌ند جارێكیش وێنه‌مان پێكه‌وه‌ ده‌گرت ده‌یووت به‌ دایكم پیشان ده‌دم، ئه‌و په‌یوه‌ندییه‌ به‌م شێوه‌ چوار مانگى خایاند، من له‌و ماویه‌دا وام لێهات پڕ به‌ دڵ ئه‌و كوڕه‌م خۆش ده‌ویست زۆر جاریش پێم ده‌ووت: كه‌ى دێیه‌ داوام ئه‌ویش هه‌ر جاره‌ى به‌ بیانوویه‌ك خۆى ده‌دزیه‌وه‌ لێم تا ئه‌و كاته‌ى ڕۆژێكیان كاتژمێر هه‌شتى به‌یانى بوو ته‌له‌فۆنى بۆ كردم و وتى: وه‌ره‌ له‌مه‌وبه‌دوا چیتر چاوه‌ڕوانى نه‌ما وه‌ره‌ با گفتوگۆى كۆتایى بكه‌ین، من وام زانى ده‌ڵێت وه‌ره‌ باسى ماره‌بڕین بكه‌ین، چووم بۆلاى ڕاسته‌وخۆ پێی وتم: ده‌مه‌وێت بچمه‌ هه‌نده‌ران پێویستم به‌ نه‌وه‌ت وه‌ره‌قه‌ دۆلار هه‌یه‌ بۆم په‌یا بكـه‌، كه‌ واى گوت زۆرم پێ سه‌یر بوو..
وتم: بۆ من بۆت په‌یا بكـه‌م؟!
وتى: كاتىَ گه‌یشتم دێمه‌وه‌ دتخوازم و له‌گه‌ڵ خۆم ده‌تبه‌م.
وتم: بیـر له‌ شتى وا مه‌كه‌وه‌.. من یه‌ك دۆلارت ناده‌مىَ.. دیاره‌ تۆ منت بۆ پاره‌ ده‌ویست!!
هه‌ڵسام ویستم بڕۆم، به‌لاَم ئه‌و به‌ تووڕه‌ى ده‌ستى گرتم وتى: ده‌ته‌وێت ئاوا به‌ ئاسانى بڕۆى!! مۆبایله‌كه‌ى ده‌رهێنا ئه‌و قسانه‌ى كردبوومان هه‌مووى ته‌سجیل كردبوو پێى
وتی: ئه‌گه‌ر نه‌وه‌ت وه‌ره‌قه‌ دۆلارم نه‌ده‌یه‌ وێنه‌كانت به‌ براكه‌ت ده‌ده‌م و بڵاوى ده‌كه‌مه‌وه‌، ئه‌وجا هه‌ستاو ڕۆى.
كه‌ ئه‌وه‌م بیست هیچم پێ نه‌كرا ته‌نها ئه‌وه‌ نه‌بێت كه‌ ده‌ست بكه‌م به‌ گریان.. زۆر گریام.. به‌ چاوى گریانه‌وه‌ ئه‌وێم به‌ جێهێشت و به‌ره‌و ماڵ گه‌ڕامه‌وه‌.. حاڵم زۆر شپرزه‌ بوو ڕقم له‌ هه‌موو شتێك ده‌بۆوه‌، هه‌ر بۆیه‌ هه‌فته‌یه‌ك له‌ ماڵ نه‌متوانى بێمه‌ ده‌ره‌وه‌ و بچمه‌ ده‌وام.. دواى هه‌فته‌یه‌ك كوڕه‌كه‌ ته‌له‌فۆنى بۆ كردم وتى: هه‌فته‌یه‌ك مه‌وعیدت ماوه‌ ئه‌گه‌ر نه‌وه‌ت وه‌ره‌قه‌ دۆلارم بۆ په‌یا نه‌كه‌ى ئه‌وه‌ وێنه‌ى خۆت له‌سه‌ر مۆبایلى براكه‌ت و هه‌موو گه‌نجێك ده‌بینیه‌وه‌.
ئه‌و قسانه‌ واى لێكردم بارى ده‌رونیم زۆر خراپ بوو، چه‌ندین جار بیرم له‌ خۆكوشتن ده‌كرده‌وه‌ و بیرم ده‌كرده‌وه‌ بزانم چۆن خۆم بكوژم تا ڕزگارم بێت له‌و كێشه‌یه‌، چوومه‌ ده‌ره‌وه‌ تاكو بچمه‌ لاى دكتۆر له‌ ڕێگادا چاوم به‌و كچه‌ى جیرانمان كه‌وت له‌ قوتابخانه‌ ئه‌هاته‌وه‌، ئه‌و كچه‌ له‌ قۆناغى ئاماده‌یى بوو، ئه‌و كچه‌ هه‌ر چه‌نده‌ له‌ من گجكه‌ تربوو به‌ڵام كچێكى زۆر به‌دین و له‌ خواترس و ژیربوو، منیى بینى له‌ ئه‌حواڵى پرسیم سه‌یرى كردم بینى په‌شۆكاوم وتى: ئه‌وه‌ چیته‌؟
وتم: هیچ نییه‌ كه‌مێك دڵم تونده‌.
ئه‌و ده‌یزانى گرێیه‌كى گه‌وره‌ له‌ دڵمدایه‌ بۆیه‌ وتى: به‌خوا وازت لێناهێنم تاكو ئه‌و گرفته‌ى خۆتم پىَ نه‌ڵێى.. به‌ڵكوو بۆت چاره‌سه‌ر بكه‌م.
سه‌یری ڕۆخساریم كرد ته‌نها پاكى و دڵسۆزیم له‌ ڕوخسارى ئه‌و كچه‌ به‌دى ده‌كرد پێمووت: كێشه‌ى من به‌ تۆ چاره‌سه‌ر ناكرێت.. پێویست ناكات تۆش خه‌فه‌ت بار بكه‌م.. به‌ڵام ئه‌و هه‌ر سوور بوو له‌سه‌ر ئه‌وه‌ى پێى بڵێم، منیش ده‌مازانى ئه‌و ئه‌مان ده‌پارێزێت بۆیه‌ كێشه‌كه‌ى خۆم بۆ باس كرد، كه‌مێك بىَ ده‌نگبوو پاشان وتى: بابچینه‌ ماڵى ئێمه‌ قسه‌یه‌كى لێده‌كه‌ین.
چوومه‌ ماڵیان به‌رداخێك ئاوى بۆ هێنام و له‌ به‌رانبه‌رم دانیشت و به‌ ڕوویه‌كى خۆشه‌وه‌ به‌م شێوه‌ كه‌وته‌ قسه‌ له‌گه‌ڵم: خوشكى به‌ڕێزم ئه‌زانى خواى گه‌وره‌ به‌رنامه‌یه‌كى بۆ مرۆڤ ناردووه‌ هه‌ر له‌و به‌رنامه‌یه‌دا هه‌ر شتێك سوودى هه‌بێت بۆ مرۆڤ خودا فه‌رمانى پێداوه‌، هه‌ر شتێكیش زیانى هه‌بێت قه‌ده‌غه‌ى كردووه‌، ئینجا ئه‌گه‌ر بێت و مرۆڤ پابه‌ندى فه‌رمانه‌كانى خودا بێت ئه‌وه‌ پارێزراو ده‌بێت، ئه‌وه‌تا پێغه‌مبه‌رى خۆشه‌ویستمان (صلى الله عليه وسلم) ده‌فه‌رموێ: سنووره‌كانى خوا بپارێزه‌ خوداش تۆ ده‌پارێزێت، به‌ڵام داخى گرانم خه‌ڵكى به‌ گوێى خودا ناكه‌ن، جا كاتێك لێیان ده‌قه‌ومێت ئه‌وكات دێن داوا له‌ خوا ده‌كه‌ن و رووى تێده‌كه‌ن.. كاره‌ساته‌كه‌ لێره‌دایه‌ ئێمه‌ شته‌كه‌مان به‌سه‌ر دێت ئه‌وكاتى په‌شیمان ده‌بینه‌وه‌.. ئه‌ى بۆ له‌سه‌ره‌تاوه‌ په‌شیمان نه‌بینه‌وه‌ و به‌ گوێى شه‌یتان نه‌كه‌ین و ساویلكه‌ نه‌بین هه‌ر كه‌سێك بیه‌وێت یاریمان پىَ بكات به‌ گوێى نه‌كه‌ین..
پاشان هه‌ڵسا چوو نامیلكه‌یه‌كى بۆ هێنام وتى: ئه‌وه‌ ڕووداوێكه‌ ڕێك له‌و ڕووداوه‌ى تۆ ده‌چێت، ئه‌وه‌ بخوێنه‌وه‌ ان شاء الله تا به‌ یانى بیر ده‌كه‌ینه‌وه‌ چاره‌یه‌ك ده‌دۆزینه‌وه‌.
قسه‌كانى ئه‌و كچه‌ به‌ڕاستى كارى گه‌رى تێكردم، ڕاستى ئه‌كرد ئێمه‌ى كچان ئه‌وه‌نده‌ به‌ ساویلكه‌ى به‌ دواى شته‌كان ده‌كه‌وین باشان كه‌ تووشى كاره‌ساتێكى گه‌وره‌ ئه‌وكات به‌شیمان ده‌بینه‌وه‌.. له‌وێ هه‌ستام و هاتمه‌وه‌ ماڵ تا نامیلكه‌كه‌ بخوێنمه‌وه‌، ئه‌و نامیلكه‌ش هى براى به‌ڕێز مامۆستا فه‌رمان نه‌جـار بوو به‌ ناوى ((گه‌نجێك ئابڕوى پارستم)) كه‌ ده‌ستم كرد به‌ خوێندنى هه‌ر ئه‌وكاتى ته‌واوم كرد، ته‌واوم كرد زۆر په‌شیمان بوومه‌وه‌ له‌و هه‌ڵه‌ى كردبووم، به‌ڵام له‌ خوێندنه‌وه‌ى ئه‌و نامیلكه‌یه‌ شتێك به‌ مێشكم داهات، چووم ئه‌و شته‌ى به‌ مێشكم داهات به‌و كچه‌ى جیرانمان بڵێم، كه‌ چووم پێمووت ئه‌ویش وتى: منیش هه‌ر ئه‌و شته‌م به‌ مێشك داهاتووه‌، ئه‌و شته‌ش ئه‌وه‌بوو ته‌له‌فۆن بۆ مه‌لا فه‌رمان بكه‌م بزانم چى ده‌ڵىَ، ئه‌و كچه‌ى جیرانمان وتى: شتێكى باشه‌ له‌وانه‌یه‌ ئه‌و ڕێگایه‌كت پێشاندات چوو ژماره‌كه‌ى بۆ په‌یا كردم.. ته‌له‌فۆنم بۆ م: فه‌رمان كرد زۆر به‌ ڕێزه‌وه‌ وه‌ڵامى دامه‌وه‌.. پێمووت نامیلكه‌یه‌كى تۆم خوێندۆته‌وه‌ زۆر كارى تىَ كردم منیش كێشه‌یه‌كى له‌و چه‌شنه‌م به‌سه‌ر هاتووه‌، ئه‌وجا له‌سه‌ره‌تاوه‌ تا كۆتاى هه‌موو كێشه‌كه‌ى خۆم بۆ باس كرد.. ئه‌ویش به‌و شێوه‌ وڵامى دامه‌وه‌ كه‌ تۆمارم كردبوو..
وتى: خوشكم پێش هه‌موو شتێك به‌ دڵێكى پاكه‌وه‌ ته‌وبه‌یه‌كى ڕاستگۆیانه‌ بكـه‌، چونكه‌ خواى گه‌وره‌ زۆر پێى خۆشه‌ به‌نده‌كانى ته‌وبه‌ بكـه‌ن، به‌س بیرت نه‌چێت به‌ دڵه‌وه‌ بێت، دواى ئه‌وه‌ى به‌دڵه‌وه‌ ته‌وبه‌ت كرد، پێت ده‌ڵێم دوو شت ئه‌نجام بده‌ پشتیوان به‌ خوا ئه‌م ناخۆشیه‌ت له‌سه‌ر لا ده‌چىَ:

1/ دره‌نگى شه‌و هه‌ڵسه‌ و ده‌سنۆێژ بشۆره‌ و شه‌و نوێژ بكه‌ دواى نوێژه‌كه‌ت به‌ زلیلى و چاوى فرمێسكه‌وه‌ ده‌ستت به‌رز كه‌وه‌ بۆ ئاسمان و داوا له‌ خوا بكه‌ ئه‌و ناخۆشیه‌ت له‌سه‌ر لابه‌رێت، چونكه‌ ئه‌و كاته‌ خودا دێته‌ ئاسمانى دنیا ده‌فه‌رموىَ: كه‌س هه‌یه‌ داوام لێ بكا وه‌ڵامى بده‌مه‌وه‌.

2/ بگه‌ڕێ بزانه‌ كه‌سێكى دڵسۆز و خواناس بدۆزه‌وه‌ با بڕوات ئه‌و كوڕه‌ به‌ تووندى ته‌هدید بكات و وێنه‌ و ده‌نگه‌كانیشى لێ بسه‌نێته‌وه‌.. پێشى بڵێت ئه‌گه‌ر یه‌ك شت بلاَوبێته‌وه‌ ئه‌وه‌ بۆ خۆى ده‌زانێت، چونكه‌ ئه‌وانه‌ى ئه‌و كارانه‌ ده‌كه‌ن زۆر بىَ وره‌ و ترسنۆكن! به‌ڵام ته‌ئكیدى ده‌كه‌مه‌وه‌ ئه‌و كه‌سه‌ى پێى ده‌ڵێى به‌ ماناى كه‌لیمه‌ دڵسۆز و خواناس بێت، نه‌ك خوانه‌كا كێشه‌كه‌ت لىَ ئاڵۆزتر بكات و ئیستغلالت بكات، به‌ڵام به‌رده‌وامبه‌ له‌ نزاكانى شه‌وانت و له‌ بیرت نه‌چێت.
پاشان مامۆستا زۆر دوعاى خێرى بۆ كردم و خواحافیزى كرد.
منیش ئه‌و قسانه‌ى مامۆستا فه‌رمانم بۆ كچه‌كه‌ى جیرانه‌كه‌م گێڕایه‌وه‌ وتى: كه‌س ده‌ناسى پێى بڵێى؟
وتم: نازانم..!!
وتى: بڕۆ پشوویه‌ك بده‌ و بیر بكه‌وه‌ سبه‌ینىَ ان شاء الله خوا ده‌رگایه‌ك ده‌كاته‌وه‌، بڵام ئامۆژگاریه‌كانى مامۆستا (فه‌رمان)ت بیر نه‌چێت.
وه‌ك مامۆستا وتى شه‌و دره‌نگ هه‌ستام و ده‌ستى په‌شیمانیم بۆ خوا به‌زر كرده‌وه‌ و به‌ گریانه‌وه‌ داواى په‌شیمانى و یارمه‌تیم له‌ خوا ده‌كرد، تا نوێژى به‌یانى به‌م شێویه‌ به‌رده‌وام بووم، دواتر نوستم.
من نوستبووم به‌یانى سه‌عات نۆ ئه‌و كچه‌ى جیرانمان ته‌له‌فۆنى بۆ كردم وتى: كه‌ست نه‌دۆزیه‌وه‌؟
ووتم: نه‌خیر.
وتى: مژده‌ت لێبێت ‌وه‌ره‌ كه‌سێكم دۆزیه‌ته‌وه‌.
به‌ په‌له‌ چووم، وتم: كێیه‌ ئه‌و كه‌سه‌؟
وتى: پیاوى خوشكه‌كه‌م زاواكه‌مان ناوى هونه‌ره‌ پیاوێكى تا بڵێى موسڵمان وخواناس و دڵسۆزه‌، چۆن له‌ خۆت دڵنیاى ئاواش له‌و دڵنیا به‌.
وتم: ده‌ترسم.. ده‌ترسم كێشه‌كه‌م لىَ ئاشكرا بكات و ئابڕووم بچێت.. به‌ ڕاستى من هیچ متمانه‌م به‌ پیاو نه‌ماوه‌.
وتى: خوشكم ئه‌وه‌ چى ده‌ڵێى!! بۆ وا ده‌زانى كاك هونه‌ر‌ له‌و كه‌سانه‌یه‌ تۆ دۆستایه‌تیت له‌گه‌ڵ كردوون!! پاشان واده‌زانى هه‌موو پیاوان وه‌ك یه‌كن!! ئاخر ئێمه‌ بۆیه‌ تووشى گرفتى وا ده‌بین چونكه‌ به‌ ساویلكه‌یى بۆ شته‌كان ده‌ڕوانین.
كه‌ دڵنیا بووم له‌ قسه‌كانى وتم: باشه‌ پێى بڵێ.
ته‌له‌فونى بۆ كاك هونه‌ر‌ كرد دواى نیو كات ژمێر به‌ په‌له‌ هات، ته‌نها ئه‌و سێیه‌مان دانیشتبووین، ئه‌و كچه‌ كێشه‌كه‌ى منى بۆ باس كرد و وتى ده‌بێت بچى ئه‌و شتانه‌ له‌و كوره‌ بسه‌نیه‌وه‌.
كاك هونه‌ر‌ كه‌مێك بێده‌نگ بوو ئه‌وجا وتى: تۆ مه‌وعیدى بدێ له‌ شوێنێك، پێى بڵىَ پاره‌كه‌م بۆ په‌یا كردى، منیش هاوڕێیه‌كى زۆر دڵسۆزم هه‌یه‌ له‌گه‌ڵ ئه‌و ده‌چمه‌ لاى كوڕه‌كه‌ ته‌مێی ده‌كه‌ین.
ئه‌وه‌ بوو ته‌له‌فۆنم بۆ كوڕه‌كه‌ كرد وتم به‌یانى كاتژمیر ئه‌وه‌نده‌ له‌ فلان شوێن ئاماده‌به‌ وێنه‌ و شته‌كانیش له‌گه‌ڵ خۆت بێنه‌ پاره‌كه‌م بۆ په‌یاكردووى.. وتى باشه‌.
ژماره‌ى ته‌له‌فۆنه‌كه‌ی كوره‌كه‌شم دایه‌ كاك هونه‌ر‌، بۆ به‌یانى كاك هونه‌ره‌ له‌گه‌ڵ هاورێكه‌ى چووبوون نوكه‌یان بۆ كردبوو بینیبویان كوڕه‌كه‌ هه‌ڵى گرتبوو، ئه‌وانیش چووبونه‌ لاى وتبوویان ئێمه‌ براى ئه‌و كچه‌ین ئه‌گه‌ر به‌بێده‌نگ ئه‌و مۆبایله‌ى خۆتمان ده‌ده‌یه‌ باشه‌ ئه‌گه‌ر نا ئه‌وه‌ ده‌تكوتین و ڕاپێچى پۆلیست ئه‌كه‌ین، كوره‌كه‌ش له‌ ترسا مۆبایله‌كه‌ى پێدابوون، پێشیان وتبوو یه‌ك شتیشت له‌وانه‌ بڵاوكردبێته‌وه‌ ئه‌وه‌ بۆخۆت ده‌زانى!!
ئه‌وجا گه‌ڕانه‌وه‌ و مۆبایله‌كه‌ی له‌ كوڕه‌كه‌یان ساندبوو دایانه‌ ده‌ستى ئه‌و كچه‌ى جیرانمان و ئه‌وان ڕۆیشتن، ئه‌و كچه‌ش مۆبایله‌كه‌ى به‌ من دا كه‌ بینیم ئه‌و هه‌موو ده‌نگ و وێنه‌ى منى تیایه‌ به‌ گریانه‌وه‌ به‌ زه‌ویم دادا و وردم كرد، ئه‌و گرێیه‌ى له‌ دڵم بوو بۆوه‌، وام ده‌زانى ئه‌و مردنه‌ى بۆخۆم دانابوو تیاى زیندوو بۆتمه‌وه‌، هه‌ر له‌ له‌سه‌ر ده‌ستى ئه‌و كچه‌ په‌یمانم به‌ خوا دا كه‌ له‌مه‌ودوا ببم به‌ پالاَپۆش و ئیلتزام به‌ دینه‌وه‌ بكه‌م و ببمه‌ خزمه‌ت كارێكى ئه‌م دینه‌.
ئێستاكه‌ش ئه‌وه‌ ساڵێك به‌سه‌ر ئه‌و درووداوه‌ تێپه‌ریووه‌ ئیلتزامێكى چاكم به‌ دینه‌وه‌ هه‌یه‌ و خزمه‌تى ئه‌و دینه‌ ئه‌كه‌م، ئه‌گه‌ر خوا هیدایه‌تى نه‌دابام ئێستا من خۆم كوشتبوو چونكه‌ ڕێگایه‌كى ترم شك نه‌ده‌برد رزگارم بكات له‌و كێشه‌یه‌، به‌لاَم من دڵم مردبوو دواى ئه‌و هه‌فته‌یه‌ زیندوو بۆوه‌ به‌ هیدایه‌ت.
من ئه‌و به‌سه‌رهاته‌ى ژیانى خۆم نووسیه‌ته‌وه‌ ئه‌مه‌وێت تا هه‌موو ئافره‌تێكى ژیر په‌ندى لىَ وه‌رگرێت و ڕیگاى من نه‌گرێت و تامى هیدایه‌تى خوا بزانێت.
له‌ دوا وته‌مدا داوا ده‌كه‌م له‌ خوداى گه‌وره‌ مامۆستا فه‌رمان نه‌جـار و ئه‌وانه‌ى بوونه‌ هۆى ڕزگاربوونم له‌ ئاگر، خودایه‌ ڕزگاریان بكه‌ى له‌ ئاگر و به‌ به‌هه‌شتیان شادیان بكه‌ى.. امـین.