جێژن و هه‌ندێك له‌ ئاداب و حوكمه‌كانی
الله أكبر الله أكبر، لا إله إلا الله، والله أكبر الله أكبر ولله الحمد
له‌ ناخی دڵمه‌وه‌ ئه‌كه‌م لێتان جه‌ژنــــــــــــــــه‌ پیرۆزه‌
بۆ هه‌موو برا و خوشكێك بێ كه‌ بۆ ئه‌م جێژنه‌‌ دڵسۆزه
پڕ به‌ دڵ جێژنه‌ پیرۆزه‌تان لێ ئه‌كه‌م براو خوشكانی ئیماندارم، (تقبل الله منا و منكم)، هه‌موو ساڵێك به‌ خێرو به‌ره‌كه‌وت و ئوممه‌تی ئیسلام سه‌ربه‌رزو سه‌رفراز، ئاڵای به‌رزی یه‌كخواناسی به‌ سه‌ر شاخ و ده‌شتی كوردستانه‌وه‌ شه‌كاوه‌ بێ.
جێژن مانایه‌كی تایبه‌تی هه‌یه‌ له‌ دڵ و هه‌ست و سۆزی موسڵماندا، خۆشه‌ویستی، برایه‌تی و خوشكایه‌تی، به‌رزڕاگرتنی دروشمی به‌رزی الله اكبر، یه‌ك ڕیزی موسڵمانان، گه‌یاندنی به‌زه‌یی و به‌ سه‌ر كرده‌نه‌وه‌، گه‌ردن ئازایی، لابردنی هه‌رچی ڕق و كینه‌و دڵڕه‌شیه‌ك هه‌یه‌ له‌ ده‌روونی موسڵماناندا، تازه‌ كردنه‌وه‌ی په‌یمانی به‌ندایه‌تی، شیرینی و ده‌م شیرین كردن، زه‌رده‌ خه‌نه‌و بزه‌ی سه‌ر لێو... هتد به‌ ڕاستی جێژنی موسڵمانان جێژنێكی پڕ ماناو دروشمی به‌رزه‌و هه‌قی خۆیه‌تی كه‌ گرنگی پێ بده‌ین به‌ سیفه‌تی ته‌واوی جێژنی بده‌ینێ.

جێژن له‌ مانا ئاینیه‌كه‌یدا سوپاسگوزاری په‌روه‌ردگاره‌ له‌ سه‌ر ته‌واوكردن و به‌ جێهێنانی به‌ندایه‌تیه‌كان، به‌ شێوه‌یه‌ك موسڵمان نه‌ك ته‌نها هه‌ر به‌ زمانی به‌ڵكو به‌ هه‌موو ئه‌ندامه‌كان و هه‌ست و وێژدانی ئه‌كه‌وێته‌ ده‌ربڕینی ئه‌و خۆشیه‌، وه‌ له‌ مانا مرۆییه‌كه‌یشیدا هێزی ده‌وڵه‌مه‌ندو لاوازی هه‌ژار یه‌ك ده‌گرن و به‌ ئیمان و باوه‌ڕی پته‌و ده‌بنه‌ یه‌كه‌یه‌كی لێك نه‌پچڕاو، ئوممه‌تی ئیسلام له‌و ڕۆژه‌دا هه‌ست ئه‌كات كه‌ یه‌ك لاشه‌و هه‌ست و سۆزو خۆشه‌ویستیه‌.
هه‌ریه‌ك له‌و دوو جێژنه‌ی ئێمه‌ له‌ پاش بۆنه‌یه‌كی گه‌وره‌و دروشمێكی به‌رزو بڵند دێن، جێژنی ڕه‌مه‌زان له‌ پاش ماندوو بوون و پاك بونه‌وه‌ی ده‌روون و ڕۆژووی ئه‌و مانگه‌ ئیتر ئاهه‌نگ و خۆشی ئه‌گێڕین به‌ بۆنه‌ی ته‌واو بوونی ئه‌و وه‌رزه‌ پڕ به‌ره‌كه‌ت و پیرۆزه‌وه‌، هه‌ر بۆیه‌ش جێژنی ڕه‌مه‌زان بۆ ئه‌وانه‌یه‌ كه‌ به‌ ڕۆژوو بوون تیایدا، وه‌ شه‌رمه‌زارو ڕوڕه‌شن ئه‌و كه‌سانه‌ی ئه‌و مانگه‌یان بێ به‌ جێهێنانی فه‌رمانی خوا به‌ سه‌ر خۆیان ڕابوورد، هه‌روه‌ها جێژنی قوربانیش، له‌ پاش ئه‌وه‌ی ملێۆنه‌ها موسڵمان ئه‌رك و فه‌رمانی خوا به‌ جێ دێنن و به‌ره‌و ماڵی خوا به‌ ڕێ ده‌كه‌ون و هه‌موو ڕه‌گه‌زو تیره‌و هۆزه‌كان به‌ یه‌كه‌وه‌و به‌ یه‌ك ده‌نگ و یه‌ك به‌رگ و یه‌ك بێ هیچ جیاوازیه‌ك هاوار ده‌ڵێن لبيك اللهم لبيك لبيك لا شريك لك لبيك.......
ئه‌وجا پاش ته‌واو بوونی ئه‌و به‌ندایه‌تیه‌ گه‌وره‌و به‌رز ڕاگرتنی ئه‌و دروشمه‌ پیرۆزه‌، سه‌رجه‌م براو خوشكانی موسڵمانیان له‌ سه‌رانسه‌ری دنیا به‌شداری خۆشی و شادی و ده‌ربڕینی هه‌ست و سۆزیان ده‌بن و ته‌نانه‌ت ڕۆژێك پێش جێژن كه‌ ڕۆژی عه‌ره‌فه‌یه‌و حاجی هه‌موو له‌وێدا به‌ كوڵ و هاواره‌وه‌ له‌ په‌روه‌ردگاریان ده‌پاڕێنه‌وه‌، ئه‌مانیش نه‌ك ته‌نها دڵ و ده‌روون و هه‌ستیان له‌ گه‌ڵیانه‌ به‌ڵكو به‌ لاشه‌ش به‌شدارن و به‌ ڕۆژوو ده‌بن و دوعای خێر بۆ ئه‌وان و سه‌رجه‌م موسڵمانان ده‌كه‌ن.
ئاوه‌ها ده‌بێ پێكه‌وه‌ گرێدان و یه‌ك لاشه‌یی و یه‌كڕیزی ئوممه‌تی ئیسلام (مثل المؤمنين في توادهم و تراحمهم و تعاطفهم مثل الجسد واحد... الحدیث)
جێژن مانای یارمه‌تی و ده‌سگیرۆیی كردنی موسڵمانانه‌ بۆ یه‌كتری، ئه‌وه‌ته‌ له‌ جێژنی ڕه‌مه‌زاندا هه‌موو كه‌سێك ده‌بێ سه‌رفیتره‌ بدات و بیبه‌خشێ به‌ هه‌ژاران بۆ پاك خاوێن بونه‌وه‌ی به‌ندایه‌تیه‌كانی و هه‌روه‌ها پته‌وكردنی په‌یوه‌ندی و خۆشه‌ویستی نێوان مسوڵمانان و له‌ ناو بردن و دژایه‌تیكردنی هه‌ژاریش له‌ ناو كۆمه‌ڵدا، هه‌روه‌ها له‌ جێژنی قوربانیشدا قوربانی دانراوه‌، له‌ گه‌ڵ ڕشتنی هه‌ر دڵۆپه‌ خوێنێكی قوربانیه‌كه‌ پارێزو له‌ خوا ترسان زیاتر ئه‌بێ و گیانی یارمه‌تی و به‌خشین و دڵسۆزی له‌ خاوه‌ن قوربانی و وه‌رگره‌كه‌شیدا پته‌وتر ده‌بێ! لَن يَنَالَ اللَّهَ لُحُومُهَا وَلَا دِمَاؤُهَا وَلَكِن يَنَالُهُ التَّقْوَى مِنكُمْ [(ئو قوربانیه‌) خوێنكه‌ی یان گۆشتكه‌ی به‌ خوا ناگات، به‌ڵكو ته‌قواو پارێزی ئێوه‌ به‌ خوا ده‌گات و خوا ده‌یه‌وێ].