هه‌ندێك له‌و بێڕێزیانه‌ی ڕووبه‌ڕووی ئیسلام بوونه‌ته‌وه‌ هه‌ر له‌ ساڵی ٢٠٠٠ه‌وه‌ تا ئه‌مڕۆ
ڕه‌نگه‌ هه‌ندێك كه‌س كه به‌وردی شاره‌زای قسه ‌و لێداوانی هه‌ندێك له‌ سه‌رانی ئایینی و سیاسیی ڕۆژئاوا نه‌بن، پرسیارێك لایان دروست بووبێت؛ بۆچی وا به‌م شێوه‌یه ‌و به‌كتوپڕی به‌ ناوی ئازادی ڕاده‌ربڕینه‌وه‌ كه‌وتنه‌ دژایه‌تیكردنی پێغه‌مبه‌ری ئیسلام و هه‌رایه‌كیان له‌سه‌ر دروست كرد؟ ئایا ئازادی بیروڕا مانای ئه‌وه‌یه‌ به‌ بێ هیچ به‌ڵگه ‌و پاساوێك هه‌ستی به‌رامبه‌ره‌كه‌ت تا سه‌ر ئێسقان بڕووشێنیت و هیچ مانایه‌ك بۆ پێكه‌وه‌ژیانی ئاشتییانه‌ نه‌مێنێت؟! یان ئازادیش وه‌ك هه‌موو بنه‌ماكانی تری ژیان سنووری خۆی هه‌یه ‌و ده‌بێت به‌پیرۆز بگیرێت و نه‌شكێنرێت؟
به‌ڵام خۆ ئه‌مانه‌ به‌ڕاستی هه‌ر كاری ئێسته‌یان نییه؛ له‌وه‌ته‌ی ئیسلام بۆته‌ دیارده‌یه‌كی به‌رچاو له‌ گۆڕه‌پانی جیهاندا و دوای هه‌ره‌سهێنانی سه‌ربازگه‌ی كۆمۆنیستی به‌پێی قسه‌ و لێدوان و لێكۆڵینه‌وه‌كانی ڕۆژئاوا، ئه‌گه‌ر به‌ربه‌ستێك دروست نه‌كه‌ن، دوور نییه‌ چه‌ند ده‌یه‌یه‌کی تر نه‌بات ئایینی ئیسلام له‌ ئه‌ورووپاوه‌ سه‌ر هه‌ڵبدات. بۆیه‌ ده‌بینین كه‌ به‌رده‌وام و له‌سه‌ر ئاستی سیاسی و ئایینیدا هێرش ده‌كرێته‌ سه‌ر ئایینی ئیسلام به‌تایبه‌ت پێغه‌مبه‌ری خۆشه‌ویست (صلى الله عليه وسلم). هه‌ڵبه‌ت له‌ گه‌ڵ ئه‌وه‌دا كه‌ ئه‌مه‌ ڕا و بۆچوونی هه‌موو له‌وانه‌ نییه، به‌ڵكوو وه‌ك خوای گه‌وره‌ ده‌فه‌رموێت: ليسوا سواء (هه‌موو یه‌كسان نین.) كه‌سان و خه‌ڵكی بیرمه‌ند و به‌ویژدان و ژیریان زۆره‌ كه‌ ئه‌مه‌ به‌ ده‌ستدرێژییه‌ك ده‌زانن بۆ سه‌ر ئیسلام و پێیان ڕه‌وا نییه‌.(١)

ئه‌مه‌ی خواره‌وه‌ سه‌رژمێرییه‌كی‌ ئه‌و بێڕێزی و خراپه‌كارییانه‌ی به‌رامبه‌ر ئایینی ئیسلام وتراون پێش بڵاوكردنه‌وه‌ی ڕوژنامه‌ی (یولاند-پوستێن)ی دانیماركی و (ماگازینێتی) نه‌رویجی:

• تشرینی دووه‌م (نۆڤه‌مبه‌ر)ی ٢٠٠٠: ڕۆژنامه‌ی (كالاگاری) كه‌نه‌دایی وتارێكی بڵاو كرده‌وه‌ كه‌ تێیدا گومانی ئه‌وه‌ ده‌بات كه‌ ئیسلام هانی كوشتنی جوله‌كه‌ ده‌دات.
• تشرینی یه‌که‌م (ئۆكتۆبه‌ر)ی ٢٠٠٢: قه‌شه‌ی به‌ناوبانگی ئه‌مریكایی جیری فالۆیل له‌ به‌رنامه‌ی به‌ناوبانگی "(٦٠) خوله‌كدا" كه‌ زیاتر‌ له‌ ١٠ ملیۆن كه‌س سه‌یری ده‌كات گوتی: «من له‌و باوه‌ڕه‌دام موحه‌ممه‌د كه‌سێكی تۆقێنه‌ر (إرهابي)ه‌.»
• له‌ هه‌مان ساڵدا: له‌ به‌رنامه‌ی (Hannity & Colmes) كه‌ كه‌ناڵی (Fox News)ی ئه‌مریكایی په‌خشی ده‌كات قه‌شه‌ی به‌ناوبانگی ئه‌مریكی (پات ڕۆبێرتسۆن) گوتی: «موحه‌ممه‌د ته‌نها توندڕه‌وێكی چاوشه‌ڕانی بووه ‌و به‌رده‌وام بێهوده‌ به‌دوای شێتیدا وێڵ بووه‌.»
• نۆڤه‌مبه‌ری ٢٠٠٢: قه‌شه‌ی به‌ناوبانگی ئه‌مریكایی (جیمی سواگارت) وتی: «موحه‌ممه‌د كه‌سێكی شاز بووه‌ له‌ ڕه‌گه‌ز (جنس)دا.» (سه‌رلێشێواو بووه‌ و له‌ ڕێی ڕاست لای داوه.‌)
• تشرینی دووه‌م (نوڤه‌مبه‌ر)ی٢٠٠٣: فه‌ره‌نسا هه‌ڵمه‌تێكی توند و به‌هێزی ده‌ستپێ كرد بۆ قه‌ده‌غه‌كردنی حیجابی ئیسلامی له‌ قوتابخانه‌كانی ئه‌و وڵاته‌.
• كانوونی دووه‌م (ژانیوه‌ری)ی ٢٠٠٤: (نیك جریفن)ی ئه‌ندامی پارتی نیشتیمانی بریتانی وه‌سفی ئیسلام ده‌كات به‌وه‌ی كه‌ "بیروباوه‌ڕێكی به‌دفه‌ڕ (فاسد) و بێكه‌ڵكه" و "خاڵییه‌ له‌ هه‌موو گۆڕه‌پانێك بۆ چاكسازی (تسویة‌)یه‌كی پێویست له‌ كۆمه‌ڵگایه‌كی ئازاددا و له‌گه‌ڵ دێمۆكراسیشدا یه‌ك ناگرێته‌وه."
• تشرینی دووه‌م (نۆڤه‌مبه‌ر)ی ٢٠٠٤: ده‌رهێنه‌ری سینه‌ماییی هۆڵه‌ندی (ڤان كۆخ) ئیسلام به‌وه‌ تۆمه‌تبار ده‌كات كه‌ ئافره‌ت ده‌چه‌وسێنێته‌وه‌.
• ئایار (مایس)ی ٢٠٠٥: "مایكل گراهام"ی پێشكه‌شكه‌ری به‌رنامه‌ له‌ په‌خشێكی بڵاوكردنه‌وه‌ی ته‌له‌فزێونی له‌ واشنتۆن وه‌سفی ئیسلام به‌ ڕێكخراوێكی تۆقێنه‌ر (إرهابي) ده‌كات و ده‌ڵێت كه‌ ئیسلام له‌ حاڵه‌تی جه‌نگدایه‌ له‌گه‌ڵ وڵاته‌ یه‌كگرتووه‌كانی ئه‌مریكا و جێی خۆیه‌تی كه‌ ئه‌مریكا به‌‌ چه‌كی ئه‌تۆمی له‌ مه‌ككه‌ بدات و خاپووری بكات.
• نیسان (ئاپریڵ)ی ٢٠٠٥: شاژنی دانیمارك له‌ كتێبیكی خۆیدا به‌ ناو ژیاننامه‌ی خۆی ده‌ڵێت: «له‌سه‌ر خه‌ڵكی پێویسته‌ كه‌ هه‌ته‌رانه‌ (جدي) بڕواننه‌ به‌ره‌نگاریی (تحدی)ی ئیسلامی.»
• ته‌ممووز (ژوولای)ی ٢٠٠٥: نوێنه‌ری كۆمیدیی ئه‌مریكی (جاكی میسون) له‌ به‌رنامه‌یه‌كدا بۆ بێژه‌ری به‌رنامه‌كه‌ (جیم بوهانون) گاڵته‌ به‌ ئیسلام ده‌كات و وه‌سفی ده‌كات به‌ ڕێكخراوێك كه‌ هانی كوشتن و ڕقه‌به‌رایه‌تی و تۆقاندن (إرهاب) ده‌دات.
• ئه‌یلوول (سێپته‌مبه‌ر)ی ٢٠٠٥: ڕۆژنامه‌ی دانیماركی Jyllands-Posten چه‌ند وێنه‌یه‌كی كاریكاتۆری بڵاو ده‌كاته‌وه‌ كه‌ گاڵته‌ به‌ پێغه‌مبه‌ری خوا ده‌كات و به‌ شێوه‌یه‌كی ناشیرین وێنه‌ی كێشاوه‌.
• تشرینی دووه‌م (نۆڤه‌مبه‌ر)ی ٢٠٠٥: هێرشكردنه‌ سه‌ر مزگه‌وتێك له‌ ڤیه‌ننای پایته‌ختی نه‌مسا.
• كانوونی یه‌كه‌م (دێسه‌مبه‌ر)ی ٢٠٠٥: بێژه‌ری ئێزگه‌‌ی شیكاگۆی ئه‌مریكایی (پۆل هارفی) وه‌سفی ئیسلام ده‌كات به‌وه‌ی كه‌ هانی كوشتن ده‌دات.
• كانوونی دووه‌م (ژانیوه‌ری)ی ٢٠٠٦: ڕۆژنامه‌یه‌كی نه‌رویجی هه‌مان وێنه‌ی پێغه‌مبه‌ر (صلی الله علیه وسلم) دووباره‌ بڵاو ده‌كاته‌وه‌ به‌ شێوه‌یه‌كی نابه‌جێ و به‌ پاساوی ئازادیی بیروڕا.
• كانوونی دووه‌م (ژانیوه‌ری)ی ٢٠٠٦: بێژه‌ری ئه‌مریكایی (بیل هاندل) له‌ تۆڕی MSNBC cable television network گاڵته‌ به‌ موسڵمانه‌كان ده‌كات له‌ ڕووداوی (منی)دا و به‌ كۆمه‌ڵه‌ ئاژه‌ڵێك وه‌سفیان ده‌كات.
ئه‌مانه‌ و زۆرێكی دیكه‌ش كه‌ ڕوویان داوه‌ ئه‌وه‌ ده‌گه‌یه‌نن ڕق و قینی هه‌ندێك له‌ سه‌رانی سیاسی و ئایینی ڕۆژئاوا ته‌نها بۆ چینێكی تایبه‌ت له‌ موسڵمانه‌كان نییه‌، به‌ڵكوو هێرشیان بۆ سه‌ر خودی ئیسلام و باڵاترین و پیرۆزترین كه‌سێكه‌ له‌ ناو موسڵماناندا كه‌ پێغه‌مبه‌ری خوایه‌ (صلى الله عليه وسلم).
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
(١) هه‌ر بۆ نموونه سه‌یری ئه‌م بابه‌ته‌ بكه‌ به‌ زمانی عه‌ره‌بی: [www.islamonline.net]

سه‌رچاوه‌ی هه‌واڵه‌كان:
الجزیرة.نت
گوڤاری (البیان)
پێگه‌ی بی‌بی‌سی