بڕۆ خوا ڕزقت بدات ...!!!‏
زۆرجار بیر ده‌كه‌مه‌وه‌ (به‌تایبه‌تی كه‌مرۆڤ كه‌سانی سته‌مكار و بێویژدان وچاوچنۆك و خۆسه‌پێن ده‌بینێت)‏ گه‌ر بێت و ڕزق و ڕۆزی خه‌ڵك به‌ده‌ست ئه‌وانه‌ بێت، ده‌بێت چ كاره‌ساتێك ڕوو بدات!!؟
چ مه‌رگه‌ساتێك به‌سه‌ر مرۆڤه‌كان بهاتبایه‌!!؟
ئاخر ... هه‌ر له‌ میلله‌تێك زویر ببانه‌، یاخود شتێكیان به‌دڵ نه‌بایه‌، ئه‌وه‌ یه‌كسه‌ر (مرسوم جمهوري) و بریار ‏ده‌درا به‌ سه‌پاندنی سزای مردن له‌ برسان و(حصار اقتصاد)یێكی شامیل و كامیل له ‌به‌ڕ و به‌حر و جه‌و به‌سه‌ریان ‏ده‌سه‌پێنرا!!!‏
یاخود گه‌ر بارانیان به‌ده‌ست بایه‌، ئه‌وه‌ هه‌ر مه‌پرسه‌، نه‌ دوعا دادی ده‌دا و نه‌ خێر و سه‌ده‌قه‌ سوودی ده‌بوو نه‌ ‏نوێژه‌بارانه‌ شتێكی به ‌شتێك ده‌كرد، به‌ڵكوو ده‌بوو خه‌ڵك چاوی مۆله‌ق بوه‌ستایه ‌و ده‌می لێك ‏بكردایه‌وه‌ و(ڕه‌جه‌ب)ئاسا چاوه‌ڕوانی ڕه‌حمه‌تی ئه‌ویان بكردایه‌، تا كه‌ره‌م بفه‌رموێت!!!‏

سه‌یره‌ ... ئاخۆ ده‌بێت ئه‌مانه‌ زاده‌ی چ په‌روه‌رده‌یه‌ك بن!!؟
ده‌بێت ئه‌م جۆره‌ كه‌سانه‌ چ ویژدان و هۆشێكیان هه‌بێت!!؟
ئایا ده‌بێت بیر له‌وه‌ نه‌كه‌نه‌وه‌:
‏* ئه‌وه‌ی دراوه‌ به‌وان كێ پێی داون!!؟
‏* كێ چاودێری ده‌كردن له‌ناو زگی دایكیان و ڕزق و ڕۆزی پێ ده‌دان!!؟
‏* نۆ مانگ و قسوور بمێنییه‌وه‌ له‌ناو ڕه‌حمی دایك و كه‌چی حسابی مرۆڤی بۆ نه‌كه‌ی!!؟
ئه‌مه‌ ئه‌و په‌ڕی بێویژدانی و سفڵه‌یییه‌!!!‏
ئه‌مه‌ی وای كرد ئه‌م چه‌ند وشه‌یه‌ بنووسم، هه‌واڵێك بوو كه‌ له‌ ڕۆژنامه‌ی (ڕوانین) خوێندمه‌وه‌ كه‌ مامۆستایه‌كی ‏هه‌ڵگری بڕوانامه‌ی ماسته‌ر له‌ په‌یمانگای ته‌كنیكی كه‌لار، پاش ئه‌وه‌ی ئه‌مساڵ ده‌چێته‌ حه‌ج، پاش ‏گه‌ڕانه‌وه‌ی یه‌كسه‌ر فه‌سڵ ده‌كرێت. كه‌ ده‌چێته‌ لای ڕاگری په‌یمانگا، ڕاگره‌كه‌ پێی ده‌ڵێت (تا ئێستا ڕزقت ‏لای من بووه، ئیستا ڕزقت ئه‌بڕم، بڕۆ خوا ڕزقت بدات، چونكه‌ تۆ بۆ لای خوا ڕۆیشتووی.)‏

به‌ڵێ ... تاوانی ڕزقبڕینی له‌ لای ئه‌و ڕاگره‌ ئه‌وه‌ بوو كه‌ مامۆستای به‌سته‌زمان (بۆ لای خوا ڕۆیشتووه‌)‏
من دڵنیام گه‌ر ئه‌و مامۆستایه‌ بۆ لای شه‌یتان ڕۆیشتبایه‌، ئه‌وه‌ ئه‌و ڕاگره‌ بێویژدانه‌ ڕزقه‌كه‌ی بۆ دوو‏به‌رامبه‌ر ده‌كرد!!!‏
جا گه‌ر كابرایه‌كی نه‌زان ئه‌و قسه‌یه‌ی بكردابا، ئه‌وه‌ چ كێشه‌یه‌ك نه‌بوو. به‌ڵام ڕاگری په‌یمانگایه‌ك ئه‌و ‏قسه‌یه‌ بكات، ئه‌وه‌یه‌ كاره‌سات!!‏
حه‌ق وایه‌ ئه‌وانه‌ی شتێكیان به‌ده‌سته ‌و به‌رپرسن، كورسییه‌كه‌یان بقۆزنه‌وه‌ بۆ خزمه‌تكردنی خه‌ڵك و ڕزقزیاد‏كردنیان، نه‌ك بۆ ڕزقبڕینی خه‌ڵك. چونكه‌ كورسی مانی بۆ كه‌س نییه‌، گه‌ر بۆ كه‌س ده‌وامی هه‌با، ئه‌وه‌ ‏نه‌ده‌كه‌وته‌ ده‌ستی ئێمه‌!!!
به‌ڵام من له‌وه‌ ده‌ترسم، به‌یانی به‌رپرسی ئه‌و ڕاگره‌ هه‌واڵ بداته‌ ئه‌و ڕاگره‌ كه‌ فه‌سل كراوه ‌و (ڕزقی ببڕێت) ‏ئه‌وجا ده‌بێت بچیت شفتی بفرۆشێت، ئه‌مه‌ش دوور نییه‌ چونكه‌(من دق دق)‏

یاسین مه‌لاعبدالله چۆمبارۆكی‏
Chombarok_2006@yahoo.com