ئیعجازی زانستی به‌رزترین شێوازی دوواندنی بێ بڕواکانه کوڕی ئیسلام هه‌ندێک له زاناکان نکۆڵی له ووتاری خوایی که قورئانی پیرۆزه ده‌که‌ن و ده‌ڵێن: ئه‌و قورئانه دانراوی موحه‌مه‌ده (صلی لله علیه وسلم)!!! و له‌وانه‌یشه ئه‌وانه هه‌ر بڕوایان به بوونی خوای گه‌وره‌ش نه‌بێت، چونکه ئه‌وان له بارێکی پشێوی تێکه‌ڵی و پێکه‌ڵیدا ده‌ژین، ئه‌وه‌ی سه‌یره ئه‌وه‌یه که خوای گه‌وره باس له‌و باره‌ی ئه‌وانه ده‌کات وه‌ک ده‌فه‌رمووێت: بَلْ كَذَّبُوا بِالْحَقِّ لَمَّا جَاءَهُمْ فَهُمْ فِي أَمْرٍ مَّرِيجٍ. ق/5. واته: ئا ئه‌وانه‌ی که بڕوایان به‌و قورئانه نی‌یه وان له‌سه‌ر سوڕماویی و پشێویی و تێکه‌ڵی هزر و بیر و ناجێگیریی ده‌روونی. به‌ڵام له‌گه‌ڵ ئه‌وانه‌شدا هه‌ر خوای گه‌وره ڕاسته‌وخۆ بانگیان ده‌کات بۆ تێڕوانین و بیرکردنه‌وه له چۆنی‌یه‌تی بینا کردن و جوانکردنی ئه‌م گه‌ردوونه و جه‌خت ده‌کاته‌وه بۆ ئه‌وانه که هه‌ر خۆی واته خوای گه‌وره ئه‌و مه‌جه‌ڕانه‌ی دروستکردووه و ئه‌و جوانسازی‌یه‌ی تێدا ئه‌نجامداوه وه‌ک ده‌فه‌رمووێت: كَيْفَ بَنَيْنَاهَا وَزَيَّنَّاهَا بگره له‌وه‌ش زیاتر خوای گه‌وره هه‌موو هۆکانی تێڕوانین و دۆزینه‌وه‌ی بۆ فه‌راهه‌م هێناون تا له‌و ڕێگایه‌وه به‌دیهینه‌ری ئه‌و بینا گه‌ردوونی‌یه قه‌شه‌نگه بناسن تا له‌و باره واق وڕماوی و پشێویه ده‌روونی‌یه ده‌ربچن و بڕوا بێنن به‌و به‌دیهێنه‌ره به‌توانا و کاربه‌جێ‌یه، ئایا ئه‌وه بانگکردن نی‌یه له لایه‌ن خوای گه‌وره‌وه و به زمانی زانست بۆ بڕواهێنان به‌و به‌دیهێنه‌ره باڵا ده‌سته؟ ئیسلام ئا به‌و جۆره مامه‌ڵه له‌گه‌ڵ نا موسڵمانه‌کان ده‌کات بۆ قایلکردنیان، ئاخۆ ئه‌وه ئاینی دواکه‌وتوویی و تۆقاندنه یان ئاینی زانست و لێبورده‌یی و قایلکردنه؟ ئه‌گه‌ر ئا به‌و شێوازه زانستی‌یه و به ده‌رخستنی ئیعجازی زانستی له قورئاندا گوتاری خوای گه‌وره بێت بۆ بێ بڕواکان، ئیتر ده‌بێت چ زمانێک ئه‌وانه بدوێنێت و یان به مانایه‌کی دی به‌کام زمان ئه‌و بێ بڕوایانه بدوێنرێن له‌م سه‌رده‌مه‌ی زانست و ته‌کنه‌لۆژیایه‌دا و هه‌ندێکش له‌و بێ بڕوایانه وابه‌سته‌ی ئه‌و زانست و ته‌کنه‌لۆژیایه‌ن. خوای گه‌وره ده‌فه‌رمووێت: ادْعُ إِلَىٰ سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ ۖ وَجَادِلْهُم بِالَّتِي هِيَ أَحْسَنُ ۚ إِنَّ رَبَّكَ هُوَ أَعْلَمُ بِمَن ضَلَّ عَن سَبِيلِهِ ۖ وَهُوَ أَعْلَمُ بِالْمُهْتَدِينَ. النحل/125. واته: (ئه‌ی پێغه‌مبه‌ر صلی الله علیه وسلم، ئه‌ی ئیماندار) بانگه‌واز بکه بۆ لای به‌رنامه‌و ڕێبازی په‌روه‌ردگارت به‌حیکمه‌ت و دانایی (بۆ هه‌ندێك) و ئامۆژگاری جوان و به‌جێ، (بۆ هه‌ندێکی تر)و گفتو گۆو موجاده‌له به‌جوانترین شێوه (له‌گه‌ڵ هه‌ندێکی تردا به تایبه‌تی خاوه‌ن کتێبه‌کان)، چونکه به‌ڕاستی په‌روه‌ردگارت هه‌ر خۆی زانایه، که کێ گومڕایه، هه‌روه‌ها هه‌ر خۆیشی زانایه به هیدایه‌ت و وه‌رگران. -------------------------------------------------------------------- سه‌رچاوه: نهێنی‌یه‌کانی گه‌ردوون له نێوان قورئان و زانستدا