خێزان لە بەردەم هەڕەشەی هەڵوەشاندا گەر کەمێك ورد ببینەوە دەبینین خێزان لە کوردستاندا لەبەردەم هەڕەشەیەکی گەورەی نەمان و هەڵوەشاندایە!! بۆ ڕێگریکردن لە هەڵوەشاندنەوەو لاوازبوون و نەمانی خێزانی نوێ پێویستە ئەم هەنگاوانە بگرینەبەر: 1- دادوەرەکان هیچ گرێبەستێکی نوێ واژۆ نەکەن بەبێ بوونی شەهادەی بینینی خولی هۆشیاری خێزانی. 2- وتاربێژان بایەخێکی زیاتر بدەن بە هۆشیاری خێزانی و چۆنیەتی پاراستنی لە لاوازبوون و هەڵوەشانەوە. 3- وەزاڕەتی ڕۆشنبیری هەموو ئەو دراماو بەرنامانە ڕابگرێ کە هۆکارن بۆ هاندانی خیانەتی هاوسەری و بڵاوکردنەوەی ڤایرۆسی هەڵوەشان و نەمانی خێزان.. 4- پەرلەمانی کوردستان هەمواری یاسای چەند ژنەیی بکاتەوە و ئەو هەموو کۆت و زنجیرەی لەسەریەتی لایببات!! 5- هەڵمەتێکی هۆشیاری ئافرەتان دەستپێبکرێ بۆ زیاتر هاندانی کچان و کەس و کاریان لەسەر سووککردن و کەمکردنەوەی مارەیی.... هتد. 6- دەوڵەمەندەکان هانبدرێن لە سەر یارمەتیدان و زەکات و سەدەقات تەرخانکردن بۆ هاوسەرگیری نوێ.. 7- هەموومان زیاتر چاومان لەسەر خێزان و خانەوادە بێت و پەروەردەی خێزانی بە ئەرکێکی شەرعی و هەنووکەیی بزانین.. 8- خۆزگە کۆمەڵێك حزب و ڕێکخراوو کەسایەتی و خەڵکی بەتوانا لە ئێستادا خۆیان بۆ بواری خێزان و پەروەردەی خێزانی تەڕخان دەکرد... چونکە نەمانی خێزان یەکسانە بە نەمانی ئەخلاق!! وە نەمانی ئەخلاقیش یەکسانە بە نەمانی خێزان!! وە نەمانی هەردووكیان یەکسانە بە هەڵوەشانی کۆمەڵگا!! د. محمد سینەمۆکی