لە نیشانەكانی مێردی شكستخواردو! چەند تایبەتمەندی و هەڵسووكەوت و كردارێك هەن وا لە پیاوێک دەکەن ببێتە مێردێکی شکستخواردوو نەک لەبەر لاوازی كەسەكە، بەڵکو لەبەر نەزانینی رێساو بنەمای پەیوەندی هاوسەرگیری تەندرووست. چۆن بزانیت کە تۆ مێردێکی شکستخواردووی؟ 1- ئەگەر بە ڕووخساری مڕومۆچ بگەڕێیتەوە ماڵەوەو سڵاو نەکەیت، وهەستی ئارامی بە هاوسەرەکەت نەدەیت، چونکە ماڵ پێویستی تەنها بە خاوەن نییە، بەڵکو پێویستی بە کەسێکە کە گەرمی و سۆزو دڵنیایی پێبەخشێت. 2- ئەگەر وا بزانیت کە ماندووبوون لە کار ئازادت دەکات لە ئەرکی سۆزداری و مرۆیی بەرامبەر بە هاوژینەکەت. دەبێت بزانیت ئەویش ماندوو دەبێت، ئەگەرچی ماندووبوونەکەی نەبینرێت. 3- ئەگەر دەنگت بەرز بکەیتەوە بەسەر هاوسەرەکەتدا یان شەرمەزاری بکەیت لەبەردەم خەڵکیدا. پیاوی ڕێزدار کەرامەت و شكۆی هاوژینەكەی دەپارێزێت، وەک چۆن حەزدەکات کەرامەتی خۆی بپارێزرێت. 4- ئەگەر بەراوردی بکەیت بە ژنانی تر، یان گاڵتە بە شێوە یان ڕەفتارەکانی بکەیت، بەراوردکردن خۆشەویستی دەکوژێت، و ڕێزگرتن بنەمای خۆشەویستی ڕاستەقینەیە. 5- ئەگەر نهێنی ماڵەکەت بکەیتە بابەتی قسەکردن لەگەڵ هاوڕێ یان خزمەکانت، پیاوێتی بە گلەیی وگازندە پێوانە ناکرێت، بەڵکو بە دانایی لە بەڕێوەبردنی ئەوەی لە پشت دەرگا داخراوەکانەوەیە. 6- ئەگەر پێداویستی دەروونی و سۆزدارییەكانی هاوژینت پشتگوێ بخەیت، و وا بزانیت پارەو ماڵ بە تەنها بەسە. وشەی جوان و شیرین، تەماشاکردنی سۆزدارانە، و گرنگیدانی دڵسۆزانە بەنرخترە لە هەر دیارییەکی تر. 7- ئەگەر گوێ لێی نەگریت کاتێک قسە دەکات، یان راو بۆچوونەكانی بەسووک بزانیت، بزانە هاوبەشی خێزانی لەسەر گفتوگۆ بنیات دەنرێت نەک لەسەر فەرمانكردن. 8- ئەگەر منداڵەکانت ببینن کە تۆ دڵڕەق و زبری یان زاڵیت بەسەر دایکیاندا، کاتێک لەبەردەمیاندا سووکایەتی بەدایكیان دەکەیت، بەم رەفتارە خراپەت ترس دەچێنیت لە دڵی منداڵەكانتدا نەک ڕێزو خۆشەویستی. 9- ئەگەر هەمیشە بۆڵەبۆڵ بكەیت و، خێرا تووڕە بیت، کەم سوپاس و دەستخۆشی لێ بکەیت. مێردی سەرکەوتوو ئەوەیە کە ڕەزامەندی دەچێنێت، نەک ببێتە مایەی ناڕەحەتی بەردەوام. 10- ئەگەر هەستی بەرپرسیارێتیت لەبەرامبەر بەدیهێنانی بەختەوەریی هاوبەش لەدەستدا. پەیوەندی خێزانی بە هەوڵی لایەنێک سەرناكەوێت، بەڵکو بە تێگەیشتن و هەوڵی دوولایەنە دێتە دی. بە کورتی: مێردی شکستخواردوو ئەوەیە کە خۆی بە گەورەی ماڵ دەبینێت، بەڵام مێردی سەرکەوتوو كارێك دەكات کەهاوژینەکەی هەست دەکات ماڵەکەی وەك بەهەشتەو پڕ لەئارامی ودڵنیاییە. ئا: یاسین ئەحمەد زەنگەنە پڕۆژە بانگەوازییەکانی شێخ احمد کاکە مەحموود رحمه الله.