کاتێک خودا دەبێتە پشتیوانی هاوسەرگیریکاران.! لە گەردەلوولی تاقیکردنەوەکانی سەردەم و لەناو هەڵچوونی شەپۆلەکانی ماددەگەراییدا، زۆرن ئەو گەنجانەی خەون بە بونیادنانی هێلانەیەکی پاک و خێزانێکی بەختەوەرەوە دەبینن، بەڵام هەنگاوەکانیان بەهۆی ترسی بژێوی و ڕێگرییەکانی ژیانەوە لەرزۆک دەبێت. بەڵام ئایا دەزانیت لەناو ئەم هەموو تەمومژەدا، پەیمانێکی خودایی هەیە کە وەک تریفەی مانگ ڕێگەکە ڕووناک دەکاتەوە؟ پەیامبەری میهرەبانی (دروودی خودای لەسەر بێت) پەردە لەسەر ڕاستییەکی مەزن لادەبات؛ ئەویش ئەوەیە کە هاوسەرگیری لەپێناو داوێنپاکی تەنها بڕیارێکی مرۆیی نییە، بەڵکو پەیمانێکی دوولایەنەیە لە نێوان بەندە و پەروەردگارەکەیدا. کاتێک مرۆڤ بە نییەتی پاکی ڕوو لە هاوسەرگیری دەکات، خودای گەورە یارمەتیدانی ئەو کەسە دەکات بە مافێک بەسەر زاتی خۆیەوە. ئەمە لوتکەی پشتیوانی و دڵنیاییە؛ کاتێک پەروەردگاری گەردوون دەبێتە کەفیلی ماڵە نوێیەکەت، ئیتر چ ترسێک لە تەنگیی ڕزق و چ دڵەڕاوکێیەک لە ئایندە دەمێنێت؟ هەروەك پێغەمبەری خوا دەفەرمووێت: (ثلاثةٌ حقٌّ على اللهِ عونهم : المجاهدُ في سبيلِ اللهِ ، والْمُكَاتَبُ الذي يريدُ الأداءَ ، والناكحُ الذي يُرِيدُ العفافَ). ( پێشەوا ترمزی بە ژمارە 1655 گێڕاویەتییەوە، فەرموودەیەكی – حسن -)ە. واتە: سێ کەس هەقە لەسەر خودا کە یارمەتییان بدات: كەسێك لە پێناوی خوای گەورەدا تێبكۆشێت، ئەو کۆیلەیەی کە (لەگەڵ خاوەنەکەیدا) ڕێککەوتووە بۆ ئازادکردنی خۆی و دەیەوێت بڕە پارەکەی بدات، وە ئەو کەسەی کە هاوسەرگیری دەکات و مەبەستی پاراستنی داوێنپاکیی خۆیەتی.
لێرەدا مەبەستمان بڕگەی كۆتایی فەرموودەكەیە كە گەنجێك یان كەسێك هەوڵی هاوسەرگیری دەدات، تەنها بۆ ئەوەی نەکەوێتە ناو حەرام و زیناوە، ؛ خودا ڕێگەی بۆ ئاسان دەکات و فەڕو بەرەکەت دەخاتە ناو ڕزق و رۆزییەوە. پەند و وانەكان: 1- نییەت، کلیلی بەدەستهێنانی یارمەتی خودایە. سەرەتای یارمەتییەکە لە دڵەوە دەست پێ دەکات. کاتێک گەنجێک مەبەستی تەنها خۆپاراستن لە گوناهـو تاوان بێت، خودا دەبێتە پاڵپشت و پشتیوانی. ئەمە فێرمان دەکات کە لە هەر کارێکدا نییەتی پاکمان هەبێت، خودا ڕێگەکانمان بۆ ئاسان دەکات. .2- هاوسەرگیری هۆکاری دەوڵەمەندی و بەرەکەتە زۆر کەس لەبەر بژێوی ژیان و دەستکورتی لە هاوسەرگیری دەترسن، بەڵام ئەم فەرموودەیە پێمان دەڵێت: "تۆ هەنگاو بنێ، خودا بەڵێنی یارمەتیدانی داویت." یارمەتی خوداش تەنها پارە نییە، بەڵکو بەرەکەت خستنە ناو کەمەکە و ئاسانکردنی ئیشوکارەکانە. 3- پاراستنی داوێنپاکی (العفاف) بەرزترین ئامانجە. ئەم بڕگەیە نیشانی دەدات کە "پاکیزەیی" لای خودا زۆر بەڕێزە. کۆمەڵگەیەک کە گەنجەکانی بەدوای پاكیزەییدا بگەڕێن، کۆمەڵگەیەکی تەندروست و پارێزراو دەبێت لە لادان و نەخۆشییە دەروونی و جەستەییەکان. 4- خودا خۆی بە قەرزاری بەندەکەی دەزانێت کاتێک دەفەرموێت "حَقٌّ على الله" (مافە لەسەر خودا)، ئەمە لوتکەی میهرەبانییە. خودا هیچ شتێکی لەسەر واجب نییە، بەڵام خۆی بە فەزڵ و چاکەی خۆی، یارمەتیدانی ئەو کەسەی کردووە بە ئەرک لەسەر زاتی خۆی بۆ ئەوەی دڵی بڕواداران خۆش بکات. 5- گەشبینی بەرامبەر بە ئایندە ئەم فەرموودەیە چارەسەری ترس و دڵەڕاوکێی گەنجان دەکات. پەیامەکەشی ئەوەیە: ئەگەر متمانەت بە خۆت نییە، متمانەت بە بەڵێنەکەی خودا هەبێت؛ چونکە ئەو هەرگیز بەڵێنی خۆی ناشکێنێت. ئا – مافناس: یاسین ئەحمەد زەنگەنە راوێژكاری خێزانی و پەروەردەیی _شیخ_احمد_کاکە_محمود پڕۆژە بانگەوازییەکانی شێخ احمد کاکە محمود رحمه الله.