به ناوی خوای به‌خشنده‌ی میهره‌بان. سوپاس و ستایش بۆ په‌روه‌ردگار، دروود و ڕه‌حمه‌ت له پێغه‌مبه‌ری ئازیز (صلی الله‌علیه وسلم) و هه‌روه‌ها له ئال و یارانی. بۆ وه‌ڵامی پرسیاره‌که‌ی به‌ڕێزتان: سه‌ره‌تا داوای خێرتان بۆ ده‌که‌ین له‌خوا و تووشی به‌ره‌که‌ت و حه‌ڵاڵ بن هه‌میشه. ئه‌گه‌ر ئه‌و که‌سه‌ی ئه‌و ڕێژه‌یه‌ی ده‌خاته سه‌ر ته‌نها به‌پاره مامه‌ڵه ده‌کات له نێوانتان واته پاره‌ی تۆ ده‌دا و له کڕیاره‌که‌ش مانگانه وه‌ری ده‌گرێته‌وه و به‌و زیاده‌یه‌وه ئه‌وه ڕیبایه و هه‌موو گوناهبارن، هه‌تا ئێستاش که نه‌تانزانیوه تۆبه‌ی پێویسته و ده‌ستبه‌جێ وه‌ستاندنی ئه‌و مامه‌ڵه‌یه. دوو ڕێگا هه‌یه له مامه‌ڵه‌ی به‌شبه‌ش(قسگ) که حه‌ڵاڵ بێت. یان ده‌بێت که‌سێ سێیه‌م که‌لوپه‌له‌که بڕێته‌وه واته مامه‌ڵه له‌پێشدا له‌نێوانی ئێوه و ئه‌ودا بکرێت پاشان ئه‌و خۆی له‌گه‌ڵ کڕیاره‌که ڕێک ده‌که‌وێت که له‌به‌رئه‌وه‌ی به به‌شبه‌ش ده‌یکڕێت ده‌توانن هه‌ردووک ڕێبکه‌ون له‌سه‌ر نرخێکی زیاتر و مانگانه به‌شبه‌ش ده‌یداته‌وه. یاخوود ئه‌گه‌ر خۆتان بێ که‌سی سییه‌م له‌گه‌ڵ کڕیاره‌کان ئه‌و مامه‌ڵه‌یه بکه‌نه‌وه، که هه‌رکه‌سێک به‌به‌شبه‌ش ده‌یه‌وێت ئه‌وا به‌نرخێکی زیاتر ده‌یفرۆشن واته ده‌توانن له‌سه‌ر هه‌موو که‌لوپه‌له‌کانتان دوو نرخ بنووسن، نرخی ده‌ستاوده‌ست له‌گه‌ڵ نرخی به به‌شبه‌ش.. ئه‌وه‌ش له‌سه‌ر بۆچوونی حه‌نبه‌لییه‌کان جائیزه و هیچی تێدا نییه و زۆر له‌زانایانی سه‌رده‌میش پێیان ڕه‌وایه و حه‌ڵاڵه. خوای گه‌وره‌ش زاناتره (جل وعلا). وصلی الله علی نبینا محمد وعلی ێ‌له وصحبه وسلم. - - - - - - - - - - - - - - - - - - - - - - - - - - - - - - - - - لیژنه‌ی وه‌ڵامدانه‌وه‌ی پرسیاره شه‌رعییه‌کان/ ده‌نگی ئیسلام.