سەرەتا   |    دەربارە   |    پەیوەندی   |    دەستەی نوسەران   |    من نحن   |    اتصل بنا
       
  سوێند خواردن له‌سه‌ر تاوان ئایا حوكمی‌ چیه‌.؟
السلآم علیکم من زۆرزۆر سوپاستان ده‌که‌م بۆ ئه‌م ما‌ڵپه‌ڕه‌ى ئێوه ‌و هه‌موو بابه‌تاکانيشم به‌دڵه، ‌وه ‌ڕه‌خنه‌شی لێ ناگيرێ، خودا پاداشتی هه‌موویتان بداته‌وه.‌ من پرسیارێکى گرنگم هه‌يه‌ له ‌ئێوه ‌پرسياره‌که‌ تايبه‌ته‌ به‌خۆمه‌وه‌،‌ من سوێندێکم خواردووه‌ ‌له ‌برايه‌کم که‌وا قه‌ت گه‌ردنى ئازاد نه‌که‌م، هه‌تا ڕۆژى مه‌حشه‌ر ده‌سته‌ويه‌خه‌گیرى بم، چونکه ‌گومانی پێ بردم به‌بێ ئه‌وه‌ی واش بێت، بێجگه ‌له ‌چه‌ند ڕووشکاندن و ناحه‌قیيه‌کي تر، هه‌مووي گرنگ نه‌بوو به‌لامه‌وه ‌غه‌یری گومانه‌که ‌نه‌بێت، ئه‌و ‌ڕۆژه ‌گريان ڕێی پێ نه‌دام نوێژ بکه‌م له‌کاتی نوێژکردنم فرمێسکه‌کانم وه‌کو باران ده‌هاتنه‌ خوار بۆيه ‌منيش ئه‌م سوێنده‌م خوارد و وتم خوايه ‌ئه‌م براييه‌ي من هه‌تا ماوه ‌قه‌ت خۆشی له‌خۆی نه‌دينێت، و خوايه ‌تۆ شاهيد به‌ که‌ من گه‌ردنی ئه‌و برايه‌ی خۆم ئازاد ناکه‌م و ئه‌گه‌ر ئازادم کرد تۆ من به‌ کافری بکوژه،‌ ئێستا نازانم چی بکه‌م تاکو ئه‌و سوێنده ‌به‌تاڵ بکه‌مه‌وه‌ و دوايش په‌شیمان ببمه‌وه، ‌ئه‌و برايه‌م ئێستا ژيانێکی هه‌يه‌ خۆزگه ‌بۆ مه‌رگ ئه‌خوازئ من زۆرم خۆش ده‌وێت له‌سه‌ر ئه‌و ‌هه‌موو ناحه‌قييه دڵم هيچ کاري له‌و خۆشه‌ويستییه‌ی نه‌کرد، چی بکه‌م زۆرم خۆش ده‌وێت يارمه‌تيم بده‌ن خێرتان ده‌گات زۆر ئه‌ترسم ئازادی بکه‌م و خۆم به‌کافری بمرم، توخوا پرسياری جديم بۆ بکه‌ن زۆر ده‌مێکه ‌ئه‌مه‌وێت ئه‌م‌ پرساره ‌بکه‌م و له‌م دڵه‌ڕاوکێيه‌ ‌نه‌جاتم بده‌ن، خوا جه‌زاتان بداته‌وه‌.
گۆڕینی فۆنت
وەڵام - ژمارەی پرسیار 877


به ‌ناوی خوای به‌خشنده‌ی میهره‌بان. 
سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

بۆ‌ وه‌ڵامی پرسیاره‌که‌ی به‌ڕێزتان: 

سه‌ره‌تا خوای گه‌وره‌ ده‌رووی خێر و خۆشیتان لێ بکاته‌وه‌ و هیدایه‌تی برایه‌که‌شت بدات بۆ ئه‌وه‌ی ڕزگاری بێت له‌و ته‌نگایه‌تییه‌ی تێیدایه‌. 
ئه‌وه‌ی ئێوه‌ له‌و حاڵه‌ته‌ زۆر ناخۆشه‌ کردووتانه‌ ته‌نها سوێندێکه‌ و له‌به‌ر ئازاره‌که‌ت ئه‌و داوایه‌ت له‌ خوا کردووه‌ ، به‌ڵام بێگومان هه‌رگیز ڕازی نیت ڕۆژێک له‌ ڕۆژان به‌ کافری بمریت، نه‌ده‌بوو سوێندی له‌و چه‌شنده‌ بخؤی له‌ کاتێکدا تۆ ئیمانت له‌ هه‌موو دونیا به‌لاوه‌ نرختره‌ و ئاماده‌ نیت به‌ هیچ بیگۆڕییه‌وه‌ یان وازی لێ بهێنیت. بۆیه‌ داواشت لێ ده‌که‌ین جارێکی تر ئه‌گه‌ر سوێندی توندیشت خوارد ئیمان و ئیسلامه‌که‌ت مه‌خه‌ره‌ مه‌ترسییه‌وه‌. 

ئه‌گه‌ر که‌سێک له‌سه‌ر ئه‌نجامدانی گوناهێک یان وازهێنانی چاکه‌یه‌ک، یان فه‌رمانێکی خوا سوێندی خوارد، ئه‌وا بۆی باشتره‌ سوێنده‌که‌ی بشکێنێ و گوناهه‌که‌ نه‌کات یاخوود فه‌رمانه‌که‌ی خوای جێبه‌جێ بکات، بێگومان له‌گه‌ڵ ئه‌وه‌ش تۆبه‌ و ئیستغیفار و که‌فاره‌تی سوێندێکی ده‌که‌وێت. پاشان گه‌یاندنی سیڵه‌ی ڕه‌حم له‌گه‌ڵ برایه‌که‌ت خوازیاره‌ و خوای گه‌وره‌ پێی خۆشه‌، له‌به‌رئه‌وه‌ ڕه‌وایه‌ سوێنده‌که‌تی بۆ بشکێنی، زیاتر بخوێنه‌وه‌ ٥٩٤ . 
پێغه‌مبه‌رمان(صلى الله عليه وسلم) ده‌فه‌رموێت"من حلف على يمين فرأى غيرها خيراً منها، فليكفر عن يمينه، وليأت الذي هو خير." رواه مسلم. 
واته‌/ هه‌رکه‌سێک له‌ئێوه‌ سوێندی خوارد و پاشان زانی که‌ خێرتر هه‌یه‌ له‌وه‌ی که‌ سوێندی له‌سه‌ر خواردووه‌، ئه‌وا با ڕوو بکاته‌ ئه‌وه‌ی که‌ خێره‌ و که‌فاره‌تی سوێنده‌که‌ی بدات. 
هه‌روه‌ها ده‌فه‌رموێت" من حلف على ملة غير الإسلام كاذبا متعمدا فهو كما قال" رواه‌ البخاري و مسلم. واته‌/ هه‌رکه‌سێک سوێندێکی خوارد به‌وه‌ی له‌ میلله‌تێکی تر بێ و به‌ ئیسلامه‌وه‌ نه‌مێنێ(وه‌ک ئه‌وه‌ی ئه‌گه‌ر وابوو یان وام کرد ئه‌وا من مه‌سیحی بم یان جووله‌که‌، گاپه‌رست...) به‌درۆ و ئه‌نقه‌سته‌وه‌(واته‌ نایه‌وێ ببێته‌ یه‌کێک له‌و میلله‌تانه‌ به‌ڵکوو ته‌نها بۆ مه‌به‌ستی سوێندخواردنه‌که‌یه‌. ئه‌وه‌ ده‌بێته‌ ئه‌وه‌ی وتوویه‌تی، واته‌ سوێندێکی درۆی بۆ ده‌نووسرێ پێی ناچێته‌ ده‌رێ له‌ ئیسلام، چونکه‌ مه‌به‌ستی ئه‌وه‌ نییه‌ بچێته‌ سه‌ر دینی ئه‌وان، به‌ڵام ئه‌گه‌ر مه‌به‌ستی به‌ گه‌وره‌ڕاگرتنی دینی ئه‌وان بێ و یان به‌ڕاستی ده‌یه‌وێت هه‌ڵگه‌ڕێته‌وه‌ ئه‌وا ده‌بێته‌ کافر. 
له‌ ڕیوایه‌تێکی ئیمام ئه‌حمه‌دیش-ڕه‌حمه‌تی خوای لێ بێت- ده‌فه‌رموێت(صلى الله عليه وسلم) " من قال إنه بريء من الإسلام ، فإن كان كاذبا فهو كما قال ، وإن كان صادقا لم يعد إلى الإسلام سالما" . 
واته‌/ هه‌ر که‌سێک وتی من به‌ریم له‌ ئیسلام، ئه‌گه‌ر به‌ درۆ بوو ئه‌وا حاڵی وه‌ک ئه‌وه‌یه‌ وتوویه‌تی، ئه‌گه‌ر ڕاستگۆیانه‌ش مه‌به‌ستێتی؛ ئه‌وا له‌ دوای ئه‌و قسه‌یه‌ی ناگه‌ڕێته‌ بۆ ئیسلام به‌ سه‌لامه‌تی، واته کافر ده‌بێت. 

ئیبن مونزیر-ڕه‌مه‌تی خوای لێ بێت- ده‌فه‌رموێت که‌" زانایان ڕایان جیاوازه‌ له‌سه‌ر که‌سێک بڵێت من کوفر ده‌که‌م به‌ خوا یان هاوشێوه‌ی ئه‌وه‌ ئه‌گه‌ر فڵانه‌ شتم کرد و پاشان کردی، ده‌فه‌‌رموێ که‌ ئیبن عه‌بباس و ئه‌بووهوره‌یره‌ و عه‌طا و قه‌تاده‌ و کۆڕی زانایانی شه‌رعناس-ڕه‌زای خوا و ڕه‌حمه‌تیان لێ بێت- له‌سه‌ر ئه‌وه‌ن که‌ که‌فاره‌تی ناکه‌وێ و کافریش نابێت مه‌گه‌ر له‌ دڵیدا ڕاستی ئه‌وه‌ی شاردبێته‌وه‌ و مه‌‌به‌ستی وا بێت. ئه‌وزاعی و ثه‌وری و حه‌نه‌فییه‌کان و ئه‌حمه‌د و ئیسحاقیش-ڕه‌حمه‌تی خوایان لێ بێت- ده‌فه‌رموون ئه‌وه‌؛ ته‌نها سوێنده‌ و که‌فاره‌تی ده‌که‌وێت". 

له‌ کۆتایی؛ تۆبه‌ و داوای لێ خۆشبوون بکه‌ و که‌فاره‌ی سوێنده‌که‌ت بده‌ و له‌باتی خراپه‌ی برایه‌که‌شت ئێوه‌ چاکه‌ بنوێنن له‌گه‌ڵی، به‌ڵکوو به‌هۆی جوانڕه‌فتاری ئێوه‌وه‌ ئه‌ویش بگاته‌ خێری دونیا و قیامه‌ت. 
ئه‌وه‌ش بخوێنه‌وه‌٣٣٢ . 

خوای گه‌وره‌ش زاناتره ‌(جل وعلا).‌ 
وصلى الله على نبینا محمد وعلى آله وصحبه وسلم. 
- - - - - - - - - - - - - - - - - - - - - - - - - - - - - - - - - 
لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام. 

  ژمارەی بینین 236

  • زۆرترین بینراو
  • نوێترین بابەت
Top
Facebook YouTube Twitter Instagram Google Plus