به ‌ناوی خوای به‌خشنده‌ی میهره‌بان. 
سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

بۆ‌ وه‌ڵامی پرسیاره‌که‌ی به‌ڕێزتان:
دوعای شه‌ڕ مه‌گه‌ر سیحرت مه‌به‌سته‌ که‌ له‌ناو کوردا به‌ نووشته‌ ناسراوه‌، ئه‌گینا دوعایه‌ک خوا قه‌بووڵی بکات و شه‌ڕێ تێدا بێت مه‌گه‌ر له‌لایه‌ن دایک و بابه‌وه‌ یان پیاوچاکان له‌ زاڵمان و خه‌ڵکی خراپه‌ بیکه‌ن ئه‌گینا هه‌موو که‌سێ ده‌ست به‌رز بکاته‌وه‌ و له‌ خوا بپاڕێته‌وه‌ هه‌تا زیان به‌ خه‌ڵکی تر بگه‌یه‌نێ ئه‌میان مه‌حاڵه‌ و له‌گه‌ڵ ڕه‌حمه‌ت و میهره‌بانی خوادا پێچه‌وانه‌یه‌، به‌ڵکو ئه‌سڵی دوعا بۆ ئه‌وه‌یه‌ چاکه‌ و خێر بهێنرێته‌ پێش و زیان و ناڕه‌حه‌تی پێ دوور بخرێته‌وه‌. 

ئه‌وانه‌یش له‌ پێناوی پاره‌یه‌ک و نسیبێکی دونیایی نووشته‌ و سیحر به‌ ناوی دوعاوه‌ ده‌رهه‌ق به‌ خه‌ڵکی داماو و بێتاوان ئه‌نجام ئه‌ده‌ن، بێباوه‌ڕن و له‌ ئیسلام ده‌رچوون و پێویسته‌ تۆبه‌ بکه‌ن و واز بهێنن له‌و فاڵ و جادوویانه‌ی کردوویانه‌ به‌ تایبه‌تی که‌ له‌ ژێر ناوی خوا و قورئان و دوعاوه‌ ڕایده‌په‌ڕێنن، تاوانێکی زۆر گه‌وره‌یه‌ و شایه‌نی سزای سه‌خت و هه‌ڕه‌شه‌ی تووڕه‌یی خودایه‌. 

به‌ڵام ئایا بۆچی جادوو و سیحر کاریگه‌ری ده‌کات و مه‌به‌ستی شه‌ڕخوازان و ناپاکان ده‌پێکێت!؟ وه‌ڵامه‌که‌ی ئاسانه‌؛ ئه‌وه‌یه‌ سیحر و جادووش وه‌کو هه‌موو شه‌ڕێکی تر خوای گه‌وره‌ دروستی کردووه‌ هه‌رچه‌نده‌ ڕازی لێ نییه‌ به‌کار ببرێ، به‌ ویستی خوا کاریگه‌ری ده‌کات ئه‌گه‌رچی فه‌رمانیشی پێ ناکات، حیکمه‌تی هه‌بوونی شه‌ڕیش بۆ ئه‌وه‌یه‌ مرۆڤه‌کان خۆیانی لێ بپارێزن به‌و قه‌ڵغان و به‌رپه‌رچانه‌ی دیسان خوا دروستی کردوون، ژیانیش که‌ جێی تاقیکردنه‌وه‌یه‌ ده‌بێت شه‌ڕ و خێریشی تێدا بێت بۆ ئه‌وه‌یه‌ به‌و په‌ڕی ئازادی خۆمان هه‌ڵبژاردن بکه‌ین و ڕێگای خۆمان هه‌ڵبژێرین، هه‌روه‌کو چۆن که‌سێکی شه‌ڕانگێز بۆ ئه‌وه‌ی مه‌به‌ستی خۆی بهێنێته‌ دی له‌ به‌رامبه‌ری که‌سێکدا، ده‌چێت په‌نا ده‌باته‌ به‌ر که‌سانی تری وه‌کو خۆی شه‌ڕخواز، ئه‌وجا یان له‌به‌رئه‌وه‌یه‌ هاوباوه‌ڕ و هاومه‌به‌ستن له‌و دژایه‌تییه‌ یان پاره‌ و ته‌ماعێکیان دراوه‌تێ، سیحریش هه‌ر وایه‌، پیاوێکی جادوو چه‌ند جنۆکه‌ و شه‌یتانێکی له‌به‌ر ده‌ستدایه‌، له‌ به‌رامبه‌ر ته‌ماعێکی دونیایی یان هێنانه‌دی مه‌به‌ستی شه‌ڕخوازانه‌ی خۆیان په‌نا ده‌به‌نه‌ به‌ر ئه‌و جنۆکانه‌ و شه‌ڕو ئاژاوه‌ و فیتنه‌ و ئاشووب بڵاوده‌که‌نه‌وه‌ له‌ناو ئاده‌میزاده‌کان. ئه‌مه‌ش هه‌م ئاواتی هه‌ردوولایانه‌ له‌ جادووگه‌ران و شه‌یتانه‌کان له‌لایه‌ک هه‌میش مه‌به‌ستی ئاده‌مییه‌ ناپاک و شه‌ڕخوازه‌کانه‌. 

خوای گه‌وره‌ش بۆ ئه‌وه‌ی مافی ئازادی هه‌ڵبژاردن و ئیراده‌ بداته‌ هه‌موو لایه‌ک له‌م ژیانه‌ له‌به‌رئه‌وه‌یه‌ وه‌سیله‌ و ئامرازی داوه‌ته‌ لایه‌نی شه‌ڕ هه‌روه‌کو چۆن به‌خشیوێتی به‌ لایه‌نی خێریش.. به‌ ڕه‌حم و میهره‌بانی خۆیشی هیدایه‌تی لایه‌نی خێر ئه‌دات بۆ ئه‌نجامدانی خێره‌کانیان، خۆ ئه‌گه‌ر بۆشیان نه‌هاته‌ ئه‌نجام، له‌به‌ر هه‌بوونی نییه‌تی پاک و ئیراده‌ی ڕاسته‌قینه‌یان پاداشته‌که‌یان هه‌ر بۆ ده‌نووسێ. به‌ڵام هه‌موو کات و جارێکیش کار و مه‌به‌ستی شه‌ڕخوازان به‌ ئه‌نجام ناگه‌یه‌نێ ئه‌گه‌رچی ئیراده‌شیان بۆی هه‌یه‌ و هه‌وڵیشی بۆ ئه‌ده‌ن چونکه‌ به‌ شه‌ڕی ئه‌وان ڕازی نییه‌، به‌ تایبه‌تیش له‌و حاڵه‌تانه‌ی خێرخوازان هۆکاری پاراستن و چاره‌سه‌ری به‌کار ده‌به‌ن.. 

بۆ چاری سیحریش وه‌کو هه‌موو نه‌خۆشییه‌ک له‌ پێشدا خۆپاراستن له‌پێشتره‌ وه‌ک له‌ چاره‌سه‌ری! خۆپارێزیش به‌ ئیمانی پته‌و و یادی شه‌و و ڕۆژانه‌ی خوا و پێشی خه‌وتن. ئه‌گه‌ر تووشبوونیش هاته‌دی ئه‌وا ڕوقیه‌ی شه‌رعی بۆ ئه‌نجام ده‌درێ، سیحریش جۆرارجۆره‌ و چاره‌سه‌ریشی به‌پێی جۆری جادووه‌که‌ ده‌گۆڕێت. 
باشترین و خێراترین ڕێگاش به‌وه‌ ده‌بێت بچیته‌ لای که‌سێکی شاره‌زای خواناس، که‌ توانای دیاریکردنی جادووه‌که‌ی هه‌بێ، له‌گه‌ڵ جۆری جادووه‌که‌، چونکه‌ وه‌کو هه‌موو نه‌خۆشیه‌ک ئه‌گه‌ر ده‌رمانی خۆی بۆ دابین نه‌کرێ شیفایه‌که‌ی مه‌حاڵ ده‌بێت یان زیاتری پێ ده‌چێت. 

ئه‌گه‌ر که‌سێکی وه‌هاش ده‌ست نه‌که‌وێ که‌ ته‌نها به‌ قورئان و فه‌رمووده‌ و دوعا دروسته‌کان چاره‌سه‌ری ده‌کات، ئیتر ته‌نها پشت به‌ خوا ده‌به‌ستی و گوێ له‌ قورئان و ئایه‌ته‌کانی ڕوقییه‌ ده‌گیرێت، بۆماوه‌ی مانگ و ڕه‌نگه‌ زیاتر له‌گه‌ڵ نێزیکبوونه‌وه‌ی زیاتر له‌ خوای گه‌وره‌ و زیادکردنی عیباده‌ت و شه‌ونوێژ و پاڕانه‌وه‌، هه‌تاوه‌کو به‌سه‌ر جنۆکه‌ و شه‌یتانه‌کان زاڵت ده‌کات و ده‌یانبه‌زێنیت. 
ئه‌گه‌ر له‌ بگه‌ڕێی به‌شی پرسیار و وه‌ڵام وشه‌ی سیحر یان جادوو بنووسی وه‌ڵامی زۆرتر و زانیاری زیاترت ده‌ستده‌که‌وێ..

خوای گه‌وره‌ش زاناتره ‌(جل وعلا).‌ 
وصلى الله على نبینا محمد وعلى آله وصحبه وسلم. 
- - - - - - - - - - - - - - - - - - - - - - - - - - - - - - - - - 
لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.