دەنگی ئیسلام‌

ئایا گۆشتی مارکێته‌کانی ئه‌وروپا حه‌ڵاڵن بۆ ئێمه‌ بیخۆین؟

ئێمه خێزانێكين له ده‌ره‌وه‌ى وڵات ده‌ژين، ته‌نها پرسيارم ئه‌وه‌يه ئايا ئه‌و گوشته‌ى لێره له‌ ماركێته‌كان هه‌يه جا چ گۆشتى مريشك بێت يان هی حه‌يوان حه‌ڵاڵه بيخۆين؟

گۆڕینی فۆنت

وەڵام - ژمارەی پرسیار 286

به ‌ناوی خوای به‌خشنده‌ی میهره‌بان.

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی.

بۆ‌ وه‌ڵامی پرسیاره‌که‌ی به‌ڕێزتان:

زانایان ده‌فه‌رموون ئه‌سڵ له‌ گۆشتدا حه‌رامبوونه‌ مه‌گه‌ر به‌ڵگه‌یه‌ک هه‌بێت حه‌ڵاڵی بکات، ئه‌وه‌ش که‌ گۆشتی گیانداران حه‌ڵاڵ ده‌کات ئه‌وه‌یه‌ که‌ ده‌بێت گیانداره‌که‌ خودی خۆی له‌ شه‌رعی ئیسلامدا حه‌ڵاڵ بێت خواردنی پاشان به‌ڕێگه‌ی ئیسلامی سه‌رببڕێت(پێش گیانده‌رچوونی له‌ملییه‌وه‌ ده‌ماره‌کانی خوێن و هه‌ردوو بۆری هه‌وا و سورێنچکی ببڕێت) یان ئه‌گه‌ر گۆشته‌که‌ سه‌ربڕوای ئه‌هلی کیتاب بێت(جووله‌که‌ و گاوره‌کان).

به‌ڵام لێره‌دا کێشه‌ هه‌یه‌، ئه‌ویش ئه‌وه‌یه‌ که‌ ئایا جووله‌که‌ و گاورانی ئه‌مڕۆ گیانداره‌کان سه‌رده‌بڕن یاخوود ده‌یمرێنن!؟

هه‌رچی جووله‌که‌یه‌ به‌ڵێ وه‌کو جارانیان هه‌ر له‌سه‌ر په‌یڕه‌وی دینی خۆیان گیاندار سه‌رده‌بڕن له‌پێش گیانده‌رچوونیان، به‌ڵام له‌سه‌ربڕینی گاوران(مه‌سیحییه‌کان) کێشه‌ و دوودڵی هه‌یه‌، ئه‌وان مریشک به‌ ته‌وژمێکی کاره‌با مردارده‌که‌نه‌وه‌ پاشان په‌ڕوباڵی ده‌که‌ن و هێشتا ملی هه‌ر وه‌ک خۆی ماوه‌ته‌وه‌ و ئه‌وجا سه‌ری ده‌بڕن. بۆ گیانداره‌ چوارپێیه‌کانیش(مه‌ڕ و مانگا و ...) به‌کاره‌با یاخوود گولله‌یه‌ک(ناویان ناوه‌ گولله‌ی به‌زه‌یی) ئه‌و گیانداره‌ ده‌ته‌زێنن که‌ گومانی ئه‌وه‌ی لێده‌کرێت گیانیان پێ ده‌ربچێت له‌پێش ئه‌وه‌ی سه‌ری ببڕن!

بۆیه‌ له‌به‌ر ئه‌و حاله‌ته‌ ناتوانین فه‌توا بده‌ین به‌وه‌ی که‌ گۆشتی ئه‌و گیانه‌وه‌رانه‌ی که‌ به‌و شێوه‌ ده‌کوژرێته‌وه‌ حه‌ڵاڵ بن بۆ موسوڵمانان، چونکه‌ به‌و پێیه‌ ده‌بنه‌ مرداره‌وه‌بوو و ئه‌وه‌ش به‌پێی ده‌قی قورئان حه‌رام ده‌بێتإِنَّمَا حَرَّمَ عَلَيْكُمُ الْمَيْتَةَ وَالدَّمَ وَلَحْمَ الْخِنزِير...[البقرة:173].

بۆ زیاتر خوێندنه‌وه‌ش سه‌یری ئه‌و وه‌ڵامه‌ش بکه‌ http://www.dangiislam.org/faq/741/catid/17/ .

خوای گه‌وره‌ش زاناتره ‌(جل وعلا).

وصلى الله على نبینا محمد وعلى آله وصحبه وسلم.

-------------------------------------------------------------------

لیژنه‌ی وه‌ڵامدانه‌وه‌ی پرسیاره‌ شه‌رعییه‌کان/‌ ده‌نگی ئیسلام.

ژمارەی بینین 9189