به ‌ناوی خوای به‌خشنده‌ی میهره‌بان. 

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

ئەوەی لە گۆشت لێمان حەرامکراوە؛ گۆشتی بەراز و هەموو گۆشتخۆرێکی بەکەڵبە لە ئاژەڵان و دەنووک چەماوە بۆ خوارەوە لە باڵندەکان و گۆشتی مردارەوەبوو(ئەوەی پێشی سەربڕین گیانی دەرچووبێت) لەو گیاندارانەی لە وشکایی دەژیین و هەروەها ئەوەش بۆ بەدەر لە خوا سەربڕابێت.. خوای گەورە دەفەرموێت إِنَّمَا حَرَّمَ عَلَيْكُمُ الْمَيْتَةَ وَالدَّمَ وَلَحْمَ الْخِنزِيرِ وَمَا أُهِلَّ بِهِ لِغَيْرِ اللَّـهِ ۖ فَمَنِ اضْطُرَّ غَيْرَ بَاغٍ وَلَا عَادٍ فَلَا إِثْمَ عَلَيْهِ ۚ إِنَّ اللَّـهَ غَفُورٌ رَّحِيمٌ[البقرة:١٧٣] واتە: خوای په‌روه‌ردگار ته‌نها مرداره‌وه بوو و خوێن و گۆشتی به‌راز و ئه‌و ماڵاتانه‌ی كه ناوی غه‌یری خوایان له‌كاتی سه‌ربڕیندا له‌سه‌ر هێنراوه‌، حه‌رامی كردووه لێتان، جا ئه‌گه‌ر كه‌سێك پێویستی ناچاری كرد به‌خواردنیان بێ زیاده‌ڕه‌وی و له سنوور ده‌رچوون، ئه‌وه هیچ گوناهێكی له‌سه‌رنییه‌، به‌ڕاستی خوا زۆر لێخۆشبوو به به‌زه‌یی و دلۆڤانه‌(تەفسیری ئاسان). 

هەروەها خواردنی دەستی بێباوەڕان(ئەوانەی سەری دەبڕن) حەرامە بۆ ئێمە جگە لە سەربڕاوی دەستی خاوەن کتێبەکان(وەک جوولەکە و گاورەکان) تەنها مەرجی ئەوەی تێدایە مردارەوەبوو نەبێت و سەبڕین و خواردنەکەیان پەیوەندی نەبێت بە بۆنەیەکی ئایینی یاخود بۆنەیەکی حەرام(جەژن و ئاهەنگی حەرامیان)، ئەو دوانەی لێ دەربچێت دروستە سەربڕوایان بخۆین بەڵام ئەوەیە لە پێشی خواردنیان ناوی خوای لێ دەهێنین(وتنی بسم الله). 

خوای گەورە سەبڕاوی دەستی ئەوانی بۆ حەڵاڵ کردووین وەک بەزەییەک بەرامبەریان بۆ ئەوەی زیاتر لێمان نزیک بن و بەهۆیەوە موسوڵمان بن و ڕزگاریان بێت لەو کوفر و شیرکەی تێیدان. چونکە لە خواردن و تێکەڵبوون و مامەڵەکردن لەگەڵیان نزیک دەبنەوە و گوێیان لە ئیسلام دەبێت و ڕەوشتی موسوڵمانەکان دەبینن و ڕاستییان بۆ دەردەکەوێت.. 

خوای گه‌وره‌ش زاناتره ‌(جل وعلا).‌ 

وصلى الله على نبینا محمد وعلى آله وصحبه وسلم. 

- - - - - - - - - - - - - - - - - - - - - - - - - - - - - - - - - 

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.