دەنگی ئیسلام‌

باڵاپۆشی ته‌واو داواکراوه‌ هه‌موو کات له‌ ده‌ره‌وه‌ی ماڵ.؟

سڵاوی خوای گه‌وره‌تان لێبێت. پرسیاره‌که‌م هه‌یه‌، داواتان لێ ده‌که‌م وه‌ڵامم بده‌نه‌وه‌. من کچێکی موحاجه‌به‌م له‌ ده‌ره‌وه‌ی وڵات ده‌ژیم ماوه‌ی٨ ساڵه‌، ئێستا له‌‌ نه‌خۆشخانه‌یه‌کی ئه‌م وڵاته‌ کار ئه‌که‌م به‌ڵام له‌به‌ر گه‌رمی جلی کاره‌که‌م ناتوانم له‌چکه‌که‌م وه‌کو پێویست قه‌پات بکه‌م، به‌ڵکوو وای ده‌که‌م به‌س پرچم داده‌پۆشێ، ئایا جائیزه‌ یا حیجابه‌که‌م دروسته‌؟ تکایه‌ وه‌ڵامم بده‌نه‌وه‌، تێبینی له‌ ده‌ره‌وه‌ی کار من حیجابی ته‌واوم، تکایه‌ وه‌ڵام سوپاستان ده‌که‌م.

گۆڕینی فۆنت

وەڵام - ژمارەی پرسیار 372

به ‌ناوی خوای به‌خشنده‌ی میهره‌بان.

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی.

بۆ‌ وه‌ڵامی پرسیاره‌که‌ی به‌ڕێزتان:

خوشکی به‌ڕێزمان؛ خوای گه‌وره‌ زیاتر به‌هێز و پابه‌ندتان بکات به‌ ئیمان و ئایینه‌که‌تانه‌وه‌، بزانن ڕه‌زامه‌ندی خوا له‌ پێش هه‌موو شت و به‌رژه‌وه‌ندییه‌که‌وه‌یه‌، چونکه‌ ئێمه‌ خوای گه‌وره‌ دروستی کردووین و بۆ کارێگی گه‌وره‌ ئه‌ویش په‌رستنی خۆیه‌تی و له‌گه‌ڵ ئاوه‌دانکردنه‌وه‌ی دونیا به‌ دادوه‌ری ئیسلام. ڕۆزی و نان و ئاویش هه‌تا له‌ ژیان بین هه‌ر ده‌مێنێ و که‌س به‌شی ئێمه‌ ناخوات و له‌ هی خۆشمان زیاتر نابه‌ین!

لێره‌دا چه‌ند خاڵێک هه‌یه‌:

* ئایا کاری ئێوه‌ ناچارییه‌ به‌پێی شه‌رع یاخوود پێویستیت به‌وه‌ نییه‌ کار بکه‌ی؟ له‌ ئیسلامدا وایه‌ که‌ ئافره‌ت کار ناکات مه‌گه‌ر له‌ حاڵه‌تی ناچاری نه‌بێت، وه‌ک ئه‌وه‌ی مێردی نییه‌ و باوک و گه‌وره‌یه‌کی نییه‌ سه‌رپه‌رشتی بکات و پێویستییه‌کانی دابین بکات. یان بێوه‌ژنه‌ و هه‌تیوی به‌سه‌ر که‌وتووه‌،...هتد.

ئه‌مه‌ مانای وا نییه‌ که‌ ئافره‌ت هه‌ر له‌ ماڵ بمێنێ! یاخوود خوێند نه‌کات، به‌ڵکوو ته‌نها له‌ به‌رژه‌وه‌ندی ئافره‌ته‌ و داخوازی خوای په‌روه‌ردگاری هه‌موو گه‌ردوونه‌.

* هه‌روه‌‌ها ئافره‌ت بۆی هه‌یه‌ کار بکات به‌ ڕه‌زامه‌ندی باوکی یان مێردی ئه‌گه‌ر ناچاریش نه‌بوو، به‌ڵام به‌مه‌رجێک دوور بێت له‌ ناشه‌رعی و گوناه و سه‌رپێچی و تێکه‌ڵاوی.

ئه‌مه‌ی ئێوه‌ش ئه‌گه‌ر هه‌ر یه‌کێکیانه‌ له‌م دوو خاڵه‌، پێویسته‌ له‌سه‌رت شه‌رعییه‌تی جل و به‌رگ و حیجابت بپارێزی و له‌ پێویست نه‌ترازێی. مه‌گه‌ر به‌ دڵنیاییه‌وه‌ شوێنه‌که‌ ته‌نها ئافره‌تی لێ بێ و پیاو نه‌یگاتێ، له‌و حاڵه‌ته‌دا جائیزه‌ هه‌ندێ شوێنت وه‌کو ئه‌وه‌ی باسی ده‌که‌ی ده‌رکه‌وێت.

تێبینی ئه‌وه‌شت ده‌که‌ین که‌ ئه‌گه‌ر له‌ حاڵه‌تی ناچاریش بیت، پێویسته‌ به‌رده‌وام له‌ دووی دۆزینه‌وه‌ی کارێکی تر بیت به‌و هیوایه‌ی باشتر و گونجاوتر بدۆزیته‌وه‌ و سه‌رپێچی خوای گه‌وره‌ی تێدا نه‌که‌ی.

خوای گه‌وره‌ش زاناتره ‌(جل وعلا).‌

وصلى الله على نبینا محمد وعلى آله وصحبه وسلم.

- - - - - - - - - - - - - - - - - - - - - - - - - - - - - - - - -

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.

ژمارەی بینین 765