به ‌ناوی خوای به‌خشنده‌ی میهره‌بان. 

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

له‌چک و سه‌رپۆشی ئافره‌تی موسوڵمان به‌شێکه‌ له‌ باڵاپۆشه‌که‌ی(الحجاب)، که‌واته‌ ده‌بێت مه‌رجه‌کانی حیجابی تێدا بێت، وه‌ک ئه‌وه‌ی ته‌واوی سه‌ر و مل و گه‌ردنی داپۆشێ، هه‌تاوه‌کو ڕاده‌ی ده‌می کراسه‌که‌ی(باڵاپۆشه‌که‌ی)، نابێت شاف بێت و مووه‌کانی سه‌ری یاخوود گه‌ردنی لێوه‌ دیار بێت، نابێت ڕه‌نگێک یان دیمه‌نێکی سه‌رنڕاکێشه‌ری هه‌بێت، نابێت شاز بێت و له‌ نێو کۆمه‌ڵگادا سه‌رنجی بۆ بدرێ... 

ئه‌گه‌ر له‌سه‌ر فراوانی هه‌تاوه‌کو ده‌می باڵاپۆشه‌که‌ی داپۆشێ و باڵاپۆشه‌که‌شی شه‌رعی بێت، به‌وه‌نده‌ دروسته‌ و پێکاوێتی، به‌ڵام باشتره‌ له‌چکه‌که‌ی درێژبووبێته‌وه‌ سنگیشی داپۆشیبێت، هه‌تاوه‌کو زیاتر داپۆشراو و شارراوه‌ بێت له‌ جاوی خه‌ڵکی. خوای گه‌وره‌ ده‌فه‌رموێ... َولْيَضْرِبْنَ بِخُمُرِهِنَّ عَلَى جُيُوبِهِن...َّ[النور:٣١]. ئیبن که‌ثیر-ڕه‌حمه‌تی خوای لێ بێت- له‌ ته‌فسیری ئه‌م ئایه‌ته‌دا وته‌یه‌کی گه‌وره‌مان سه‌عیدی کوڕی جوبه‌یر-ڕه‌حمه‌تی خوای لێ بێت- ده‌هێنێته‌وه‌ که‌ ده‌فه‌رموی: "وَلْيَضْرِبْنَ وَلْيَشْدُدْنَ " بِخُمُرِهِنَّ عَلَى جُيُوبهنَّ " يَعْنِي عَلَى النَّحْر وَالصَّدْر فَلَا يُرَى مِنْهُ شَيْء". واته‌/ با سه‌رپۆشه‌کانیان ته‌واو توند بکه‌ن له‌سه‌ر ده‌می کراسه‌کانیان، واته‌ بیده‌ن به‌سه‌ر مل و سنگیاندا به‌ جۆرێک هیچێکیان لێ نه‌بینرێ. 

ئه‌وه‌ش که‌ هه‌ندێ خوشک ده‌یکات به‌وه‌ی هه‌ندێ له‌ پرچی پێشه‌وه‌ی ده‌رده‌خه‌ن یاخوود ته‌نها سه‌ریان داده‌پۆشن و گه‌ردن و سنگیان وه‌ده‌رده‌خه‌ن، پێی ناوترێ حیجاب و سه‌رپۆش، خوای گه‌وره‌ هیدایه‌تی هه‌موو لایه‌ک بدات، ئامین. 

خوای گه‌وره‌ش زاناتره ‌(جل وعلا).‌ 

وصلى الله على نبینا محمد وعلى آله وصحبه وسلم. 

- - - - - - - - - - - - - - - - - - - - - - - - - - - - - - - - - 

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.