به ‌ناوی خوای به‌خشنده‌ی میهره‌بان. 

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

خوشكی به‌ڕێزمان سه‌ره‌تا پیرۆزباییت لێده‌که‌ین له‌سه‌ر ئه‌و بڕیاره‌ت که‌ بڕیاری باڵاپۆشیت داوه‌ و هیوادارین دوایین بڕیار بێ و لێی په‌شیمان نه‌بیته‌وه‌! بزانه‌ باڵاپۆشیی شه‌ره‌ف و ڕێزه‌ بۆ ئافره‌تان و ده‌یانپارێزێ له‌ چاوپیسان و پیاوانی دڵنه‌خۆش و مه‌رامپیسان، ئه‌وانه‌ی به‌ناوی مافی ئافره‌ته‌وه‌ کردوویانن به‌ مایه‌ی ڕابواردن و ئامرازی بازرگانی سه‌رمایه‌داران، سه‌ره‌تا ئه‌وه‌ت پێ ده‌ڵێین ئایا ده‌زانی تۆ فه‌رمانی کێت جێبه‌جێ کردووه‌!؟ فه‌رمانی خوای په‌روه‌دگاری دروستکه‌ر و ڕۆزیده‌رت، ئه‌وا خوایه‌ی هه‌رچی نیعمه‌ت و چاکه‌یه‌ک هه‌یه‌ له‌ تۆدا به‌خششی ئه‌وه‌، ئه‌گه‌ر تۆی به‌ڕێز ته‌نها بیر له‌و ڕاستییه‌ بکه‌یته‌وه‌ و هه‌ست به‌و خوایه‌ بکه‌یت ئیتر هه‌رچی توانج و قسه‌ی خه‌ڵكییه‌ گوێی پێ ناده‌ی و کارت تێ ناکات! پاشان ئه‌وه‌ بزانه‌ گاڵته‌پێکردن و سووکایه‌تی پێکردنی ناحه‌زان و بێباوه‌ڕان هه‌ر بۆ تۆ نییه‌ و نه‌بووه‌! هه‌رچی موسوڵمان و به‌نده‌ی ڕاسته‌قینه‌ی خوا بووبێ ڕۆژێک له‌ ڕۆژان ئه‌وه‌ی پێ کراوه‌ که‌ به‌ تۆی به‌ڕێز کراوه‌.. بگره‌ زیاتریش، ئه‌وه‌تا خۆشه‌ویستمان پێغه‌مبه‌ر(صلى الله عليه وسلم) پێیان ده‌ووت شێت و جادوو، له‌لای که‌عبه‌وه‌ له‌ سوجده‌دا بوو ناوسکی وشتریان هێنا ڕشتیانه‌ سه‌ر پشتی و ئه‌وجا هه‌موویان قاقایان لێ ئه‌دا و ئه‌ویش له‌ سوجده‌دا مابوو. یاخود پێیان دووت دوابڕاو له‌به‌رئه‌وه‌ی منداڵی کوڕی نه‌بوو یان بۆی نه‌ده‌مایه‌وه‌ و ده‌مردن.. 

هه‌موو پێغه‌مبه‌ران-سه‌لامی خوایان لێ بێت- له‌گه‌ڵ پیاوچاکان و به‌نده‌کانی خوا به‌جۆرێک یان زیاتر سووکایه‌تییان پێ کراوه‌، ئه‌وه‌ش نامۆ نییه‌! به‌ڵکو تاقیکردنه‌وه‌یه‌ و پێی به‌هێز ده‌بین ئه‌گه‌ر خۆڕاگر بین و پاداشتی له‌سه‌ر وه‌رده‌گرینه‌وه‌ له‌ به‌هه‌شتی به‌ریندا، ئایا ده‌زانی ئه‌گه‌ر له‌وه‌ش ناخۆشتر و به‌ئازارتر ببینی له‌به‌ر ئیسلام و باڵاپۆشییه‌که‌ت هیچ شوێنه‌وارێکی نامێنێ وه‌ختێ ده‌چیته‌ به‌هه‌شته‌وه‌، قیامه‌تیش ڕۆژی تۆڵه‌ و گه‌ڕانده‌نه‌وه‌ی مافه‌کانه‌، دڵنیابه‌ ئه‌وانه‌ له‌و دونیا له‌سه‌ر ئه‌ژنۆ چۆک ده‌ده‌ن و په‌شیمان ده‌بن به‌ڵام هیچ شتێک دادیان نادات له‌وه‌ش زیاتر ئه‌وسا تۆ پێیان پێده‌که‌نیفَالْيَوْمَ الَّذِينَ آمَنُوا مِنَ الْكُفَّارِ‌ يَضْحَكُون[المطففين:٣٤]. 

دوا ئامۆژگارییمان ئه‌وه‌یه‌ ئارام بگره‌ و دڵنیاییت هه‌بێ له‌وه‌ی خوای گه‌وره‌ پله‌وپایه‌ت به‌رز ده‌کاته‌وه‌ له‌ هه‌ردوو دونیا ئه‌گه‌ر له‌به‌ر ڕه‌زامه‌ندی ئه‌و هه‌موو قه‌ده‌رێک قه‌بووڵ ده‌که‌یت، ئه‌و ئازارانه‌ش حیساب بکه‌ و نییه‌ت هه‌بێت که‌ له‌به‌ر خوایه‌ و ڕازیت بۆ ئه‌وه‌ی چاوت ڕوون بێت به‌ سه‌رکه‌وتن و دڵیشت ئارامی وه‌رگرێ به‌ ئیمان. ئه‌وه‌ش له‌ یاد مه‌که‌ ئه‌وه‌ی تۆ ئه‌نجامت داوه‌ دروست و هه‌قه‌ و ئه‌وه‌ی ئه‌وانیش گومڕایی و تاریکییه‌ و ڕۆژێک دێت خۆزگه‌ ده‌خوازن هه‌ر خۆڵ بوونایه‌إِنَّا أَنذَرْ‌نَاكُمْ عَذَابًا قَرِ‌يبًا يَوْمَ يَنظُرُ‌ الْمَرْ‌ءُ مَا قَدَّمَتْ يَدَاهُ وَيَقُولُ الْكَافِرُ‌ يَا لَيْتَنِي كُنتُ تُرَ‌ابًا[النبأ:٤٠] واته‌: به‌ڕاستی ئێمه ئێوه‌مان ئاگادار کردووه له‌وه‌ی که سزایه‌کی نزیک به‌ڕێوه‌یه‌، ئه‌و ڕۆژه ڕۆژێکه که ئاده‌میزاد سه‌یری ده‌ستپێشخه‌ری خۆی ده‌کات، خوانه‌ناسیش ده‌ڵێت.. خۆزگه هه‌ر خاک بوومایه (ئاوا زیندوو نه‌کرامایه‌ته‌وه و گیرم نه‌خواردایه‌).

خوای گه‌وره‌ش زاناتره ‌(جل وعلا).‌ 

وصلى الله على نبینا محمد وعلى آله وصحبه وسلم. 

- - - - - - - - - - - - - - - - - - - - - - - - - - - - - - - - - 

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.