به ‌ناوی خوای به‌خشنده‌ی میهره‌بان. 

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

ئایه‌ته‌کانی باڵاپۆشیی و له‌چک ده‌توانیت له‌م وه‌ڵامه‌ بخوێنته‌وه‌ ٣٦٩٨ ، ده‌رباره‌ی زۆره‌ملێش له‌ ئه‌نجامدانی باڵاپۆشیی و له‌چک، له‌ پێشتر بوو ئه‌و داوایه‌ پێشی ماره‌کردن و گواستنه‌وه‌ لێت بکردایه‌ وه‌کو مه‌رج بۆ ژیانی هاوسه‌رییتان، چونکه‌ پۆشاکی شه‌رعی بۆ ئافره‌تان فه‌رمانێکی خواییه‌ و نه‌پۆشینی ڕه‌تکردنه‌وه‌یه‌تی و هه‌روه‌ها له‌سه‌ر مێردیش پێویسته‌ ڕازی نه‌بێت خێزانه‌که‌ی سافیره‌ و ڕووت و نیوه‌ڕووت بێت! 

له‌ حاڵه‌تی ئه‌وه‌ش ئه‌گه‌ر ئیلتیزامی خۆت یان پێداچوونه‌وه‌ت و بیرکردنه‌وه‌ت له‌ دوای ژیانی خێزانی بووه‌، ده‌کرێت بۆ ماوه‌یه‌ک(هه‌رچه‌ندێک بخایه‌نێت) که‌ هیوای خێر و خۆبه‌ده‌سته‌وه‌دانی بۆ فه‌رمانی خوا تێدا ببینیت، چاوه‌ڕێی بکه‌یت و ئارامی له‌سه‌ر بگریت، له‌و ماوه‌یه‌ش به‌ زمانی شیرین و نیشاندنی خۆشه‌ویستی و چاکه‌کردن له‌گه‌ڵی و ئامۆژگاریکردنی، دڵی نه‌رم بکه‌یت و ڕازی بکه‌یت به‌ فه‌رمانه‌کانی خوا، هاوکات پێکه‌وه‌ گوێبیستی قورئان و وتاری په‌روه‌رده‌یی و ئیمانی بن و به‌ڵكو هاموشۆ و ئاماده‌بوونی وانه‌ی ئایینی و که‌سانی له‌ خوا نێزیک بکه‌ن، به‌و هیوایه‌ی گۆڕانی به‌سه‌ردا بێت و بتوانێت ئه‌و فه‌رمانه‌ خواییه‌ جێبه‌جێ بکات. 

حیجاب و باڵاپۆشیی له‌ فه‌رمانه‌کانی خوایه‌، باوه‌ڕنه‌بوون پێی کافربوونه‌ به‌ڵام باوه‌ڕت هه‌بێ به‌ فه‌رزێتی به‌ڵام جێبه‌جێی نه‌که‌یت، ته‌نها گوناهێکی گه‌وره‌یه‌ و خاوه‌نه‌کی کافر ناکات. هه‌روه‌ها له‌ گوناهی هه‌موو ئه‌وانه‌ش به‌شداره‌ که‌ تووشی نه‌زه‌ر و تاوان ده‌بن به‌هۆیه‌وه‌، ئه‌مه‌ جگه‌ له‌ سه‌رپێچی مێردی، چونکه‌ سه‌رپێچی مێرد له‌ تاعه‌تی خوادا دیسان تاوانێکی تره‌. 

له‌ کۆتایی؛ له‌ دوای هیوابڕان و نائومێدی بۆت دروسته‌ له‌سه‌ر ئه‌نجامنه‌دانی ئه‌و فه‌رمانه‌ خواییه‌ ته‌لاقی بده‌یت، چونکه‌ به‌ڕاستی سفوریی تاوانێکی قێزه‌ون و مایه‌ی سووکایه‌تییه‌ بۆ ئافره‌ت و بۆ مرۆڤ، ئیتر چۆن که‌سێک بتوانێت بۆ هه‌تاسه‌ر به‌و شێوه‌یه‌ بمێنێته‌وه‌.

خوای گه‌وره‌ش زاناتره ‌(جل وعلا).‌ 

وصلى الله على نبینا محمد وعلى آله وصحبه وسلم. 

- - - - - - - - - - - - - - - - - - - - - - - - - - - - - - - - - 

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.