به ‌ناوی خوای به‌خشنده‌ی میهره‌بان. 

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

سه‌له‌فی مانای که‌سێکه‌ شوێنی په‌یام و بۆچوونی پێشنانی چاکمان بگرێ، پێشینانیش مه‌به‌ست پێی ئه‌و چه‌رخه‌ ده‌گرێته‌وه‌ که‌ له‌ سه‌رده‌می پێغه‌مبه‌ره‌وه‌(صلى الله عليه وسلم) ده‌ستپێده‌کات و به‌ سه‌رده‌می شوێنکه‌وته‌ی شوێنکه‌وتوون(تابعي تابعین) دوایی دێت، ئه‌وانه‌ی پێغه‌مبه‌ری خوا(صلى الله عليه وسلم) له‌ فه‌رمووده‌ی" خير القرون قرني ثم الذين يلونهم ثم الذين یلونهم"دا ده‌ستی بۆ ڕاکێشاون. 

ئێمه‌ پێمان باش نییه‌ موسوڵمان ناو بۆ خۆی دابنێ و حه‌ز بکات پێوه‌ی بناسرێته‌وه‌، هه‌رچه‌نده‌ ئه‌وه‌ باشه‌ی تێدا هه‌یه‌، به‌ڵام له‌ بوونی په‌رته‌وازیی و ئه‌و بۆچوونپه‌رستییه‌ی وه‌کو ئه‌مڕۆدا، زیانی زیاتر له‌ سوود، ئه‌و به‌خۆی ده‌ڵێ سه‌له‌فی و ئه‌ویتر به‌ خه‌له‌فی ده‌بینێ و هه‌ریه‌که‌ و کۆمه‌ڵه‌ش به‌ بۆچوونی خۆی سامه‌ و به‌وه‌ش که‌وتوونه‌ توانجلێدان و ناشرینکردنی یه‌کدی به‌ جۆرێک دۆستی ناڕه‌حه‌ت و دۆژمنی خۆشحاڵکردووه‌. ڕاستی ئه‌وه‌یه‌ هه‌موو بڵێین ته‌نها موسوڵمانین. 

پاشان ئه‌گه‌ر سه‌له‌فی بریتی بێ ته‌نها له‌ ناو، ئه‌وا ده‌بێت به‌ هه‌رچی شیعه‌ش هه‌یه‌ بڵێین ئالوبه‌یتی پێغه‌مبه‌ر(صلى الله عليه وسلم) چونکه‌ ئه‌وانیش بانگه‌شه‌ی ئه‌وه‌ ده‌که‌ن، دیسان به‌ جووله‌که‌ش بڵێین ئه‌وان کوڕان و خۆشه‌ویستانی خوان چونکه‌ خۆیان وا ده‌ڵێن!! له‌به‌رئه‌وه‌ به‌ بۆچوونی ئێمه‌ له‌وه‌ ناشریتنتر و سووکتر نییه‌ که‌سێک بانگه‌شه‌ی هه‌ق بۆلای خۆی بکات و بۆخۆیشی له‌سه‌ر باتڵ بێت! هه‌ر که‌س بوو، ده‌بێته‌ گومڕاکه‌ر و سه‌ر له‌خه‌ڵکی ده‌شێوێنێ!.. 

له‌ ڕاستیدا؛ ئێمه‌ وه‌کو ئه‌م ماڵپه‌ڕه‌ ڕێز و پێزانینمان هه‌یه‌ به‌رامبه‌ر هه‌موو که‌س و کۆمه‌ڵێک که‌ بۆ خوا خزمه‌ت ده‌کات، بڕواشمان وایه‌ هه‌موو لایه‌ک به‌هێنده‌ی په‌یوه‌ستی به‌ هه‌قه‌وه‌ له‌ خوا نێزکه‌ و پێکاوێتی، به‌هێنده‌ی که‌موکوڕی و لادانیشیان دوورن له‌ پێکان و ڕاستییه‌وه‌. که‌موکوڕی و ناته‌واویی و لادانه‌کانیش ئه‌گه‌ر بڕوایان پێیه‌تی، له‌ ڕوانگه‌ی بیروباوه‌ڕه‌وه‌ پێوانه‌ ده‌کرێن، ئه‌گه‌ر هه‌ڵگری بیدعه‌ و په‌یامی کوفری بوون، ئه‌وا خێرییان تێدا نییه‌ و له‌ دوای ئاگادارکردنه‌وه‌، ده‌بێت لێیان دوورکه‌وتنه‌وه‌ بکرێ، ئه‌وه‌ش به‌ ده‌ستی خۆیان نییه‌ و له‌ ژێر فشارن و به‌ پێی ئیجتیهادی خۆیان هه‌ڵوێستییان بۆ هه‌ڵبژاردووه‌، له‌سه‌ریان ئه‌ژمار ناکرێ به‌ گومڕایی و لادان(إنحراف). 

نوقسانی و لادانی ئه‌و کۆمه‌ڵ و تاکانه‌ هه‌ر کامیان بێت، به‌و شێوه‌یه‌ به‌رهه‌ڵستی لێ ناکرێ و چاک نابێ وه‌کو ئه‌وه‌ی ئه‌و به‌ناوسه‌له‌فییانه‌ به‌رنامه‌یانه‌! ئێستا ئیسلامی له‌ زۆربه‌ی دونیادا ڕه‌زاقورس و له‌که‌دار بوون، ئه‌ویش هێندێکی به‌هه‌ڵه‌ و نواندنی هه‌ڵوێستی سه‌قه‌ت و ناله‌باری که‌سان و کۆمه‌ڵانێک که‌ بۆ ئیسلام ده‌جوڵێن، ئه‌وه‌ی تریشی به‌ پیلان و ڕاگه‌یاندنی دوژمنانه‌. له‌م واقیعه‌دا؛ کاری کارزان و لێزانه‌کان ئه‌وه‌یه‌ ئه‌و شێواوی و په‌ڵانه‌ لابه‌رن و ڕووی موسوڵمانان سه‌رله‌نوێ دره‌وشاوه‌ بکه‌نه‌وه‌‌، نه‌وه‌ک له‌لایه‌ن خۆمانه‌وه‌ هێنده‌ی تر ئه‌و ڕوو شێوێنراوه‌ قێزه‌ونتر بکرێ! 

له‌ ڕاستیدا به‌ناوسه‌له‌فییانیش، بار له‌سه‌ر ڕابوون گرانتر و ڕێگا درێژتر ده‌که‌نه‌وه‌، ئه‌وان جوانی خۆیان له‌ ناشرینی غه‌یری خۆیان ده‌بینن، ده‌بوو وابکه‌ن هه‌ر بۆ خۆیان جوان بن، وه‌کو پێغه‌مبه‌ران ڕه‌فتار بکه‌نوَإِنَّا أَوْ إِيَّاكُمْ لَعَلَى هُدًى أَوْ فِي ضَلَالٍ مُّبِينٍ[سبأ:٢٤].واته‌/ پێیان بڵێ؛ ئێمه‌ یان ئێوه‌ لایه‌کمان له‌سه‌ر هیدایه‌تین یاخوود گومڕایییه‌کی دیار. 

ئه‌وه‌ ئه‌ده‌بی بانگه‌واز و گفتوگۆیه‌، قورئان فێرمان ده‌کات، جوان نییه‌ به‌ بێباوه‌ڕێک بڵێی تۆ گومڕاییت و منیش له‌سه‌ر دروستم(صواب)، ئه‌گه‌ر وابڵێی چۆن گوێت لێ ده‌گرێ!؟ ئه‌وه‌ به‌رامبه‌ری بێباوه‌ڕێک، ئه‌ی ده‌بێت چی بنوێنی له‌به‌رامبه‌ری برای خۆت!؟ له‌ ڕاستیدا ئه‌و برایانه‌ش هه‌ر له‌سه‌ره‌تای بانگه‌وازیانه‌وه‌ به‌ هێرش و توانجلێدان و گومڕاکردن و ته‌کفیری کۆمه‌ڵێک له‌ بانگخوازان و زانایان و پیاوانی ڕابوون ده‌ستیان پێکرد، به‌ پێچه‌وانه‌شه‌وه‌ وازیان هێنا بوو(به‌ ئێستاشه‌وه‌) له‌ کوفر و عه‌لمانییه‌ت و هیچ به‌رهه‌ڵستیی و ڕاوه‌ستانێکیان نییه‌ له‌گه‌ڵ بیری بێئایینی و بێڕه‌وشتی. ئه‌وان لێیان سه‌لامه‌تن و موسوڵمانانیش به‌ده‌میانه‌وه‌ به‌ئازارن. ئه‌وانه‌ که‌ پێیان ده‌ڵێن باشه‌ بۆچی له‌به‌رامبه‌ری ده‌سته‌ڵاداران هیچ ناڵێن و ڕه‌خنه‌ ناگرن، ده‌ڵێن ئه‌وانه‌ وه‌لی موسوڵمانان و نابێت له‌ناو خه‌ڵکی ئابڕوو ببرێن، به‌ڵکوو به‌ ته‌نیا ئامۆژگاری بکرێن، ئه‌و ڕه‌فتاره‌ جوانه‌ له‌گه‌ڵ عه‌لامییه‌ت و زۆرداران ده‌نوێنن، به‌ڵام له‌گه‌ڵ موسوڵمانانی ناکه‌ن! ده‌بوو ئه‌وانه‌ ئه‌گه‌ر کۆمه‌ڵ و حیزب نین، ده‌مارگیر نه‌بن به‌و ڕاده‌یه‌، به‌ڵکوو چاکساز(مصلح) بن ته‌نها په‌یامی هه‌قی پێشینان وه‌بیر ئه‌و کۆمه‌ڵ و که‌سایه‌تییانه‌ بخه‌نه‌وه‌ که‌ به‌ نه‌یاری خۆیانی ده‌بینن! 

کاری موسلیح به‌وجۆره‌یه‌ نه‌وه‌ک بیانه‌وێ به‌شیان ببێ، هه‌رچیش ده‌مارگیریی هه‌بوو له‌سه‌ر بۆچوونی خۆی، ئه‌وا به‌شی هه‌یه‌ و بۆخۆی ده‌سته‌یه‌که‌، با هه‌ر هاواریش بکات من حیزب نیم! 

به‌ڵام له‌گه‌ڵ ئه‌مانه‌ش خه‌ڵکانی تر هه‌ن به‌ڕاستی له‌ خه‌می په‌یامی پێشینانن، بانگه‌شه‌ی بۆ ده‌که‌ن به‌بێ ئه‌وه‌ش له‌ موسوڵمانان بخوێنن و خۆیان خه‌ریک بکه‌ن به‌ عه‌یبه‌کانییانه‌وه‌. ئه‌وانه‌ جێگه‌ی ڕێز و خۆشه‌ویستی و گوێبۆگرتنن له‌وه‌ی هه‌قه‌ و پاڵپشته‌ به‌ قورئان و سوننه‌ت و ڕۆشنایی تێگه‌شتنی پێشینان. پێویستیشه‌ هه‌مووان به‌و جۆره‌ بین. 

حیزبیش له‌ زماندا؛ مانای کۆمه‌ڵێک له‌ خه‌ڵکی که‌ بیرێکی تایبه‌ت کۆیان بکاته‌وه‌. 

ئه‌مانه‌ش له‌ ڕاستیدا حیزبن و هه‌موو هه‌قیش له‌لایان کۆنه‌بۆته‌وه، وه‌کو هه‌موو لایه‌کی تر به‌رنامه‌ و بۆچوون و ئامانجی تایبه‌تی خۆیان هه‌یه‌.. زۆر جه‌خت ده‌که‌نه‌وه‌ له‌وه‌ی که‌ ته‌نها! خۆیان له‌سه‌ر ڕێبازی سه‌له‌فن و به‌بێ ئه‌وه‌ش شێخه‌ خواناسه‌کانی سه‌رده‌میش ئاگایان لێ بێت، لکاندوویانن به‌ خۆیانه‌وه‌ و خۆیانی پێ ڕه‌نگ جوان ده‌که‌ن! 

خوای گه‌وره‌ هیدایه‌تی هه‌موو لایه‌ک بدات، ئامین.

خوای گه‌وره‌ش زاناتره ‌(جل وعلا).‌ 

وصلى الله على نبینا محمد وعلى آله وصحبه وسلم. 

- - - - - - - - - - - - - - - - - - - - - - - - - - - - - - - - - 

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.