به ‌ناوی خوای به‌خشنده‌ی میهره‌بان. 

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

سه‌ره‌تا داوای دامه‌زراوی و به‌هێزی ئیمان و شاره‌زابوونت له‌ خوا بۆ ده‌که‌ین، ئه‌رکی ئێستات ئه‌وه‌یه‌ له‌ سه‌ر ئارامی و بێ هه‌ڵه‌شه‌یی زیاتر هه‌وڵی ناسینی خوا و شاره‌زایی له‌ ئیسلام بکه‌ی، په‌له‌ش مه‌که‌ له‌ که‌سانێک که‌ نه‌فام و ساده‌ن، به‌ زمانی شیرین و لێزانی له‌گه‌ڵیان بدوێ، ئه‌گه‌ر به‌ گوێشیان نه‌کردی په‌له‌یان لێ مه‌که‌ و لێێان تووڕه‌ مه‌به‌، به‌ڵام بێهیوا و ده‌سه‌وسانیش مه‌به‌، ئه‌گه‌ر هه‌ر به‌ گویان نه‌کردی تۆ ئه‌رکی خۆت به‌رامبه‌ریان ئه‌نجام داوه‌ و بۆ خۆیان به‌رپرسیارن له‌لای خوا، به‌ڵام توره‌بوونت له‌ دایکت گوناهی گه‌وره‌یه‌ و نادروسته‌، خوای گه‌وره‌ ڕآزی نه‌بووه‌ ئۆفیان لێ بخوێن وبێزارییان له‌سه‌ر ده‌رببڕین ئه‌ی چۆن ڕازییه‌ لێیان تووره‌ بین. ئێمه‌ش ته‌نها ڕاگه‌یاندنمان له‌سه‌ر ئه‌وه‌ی به‌ گوێمان نه‌کات به‌ تایبه‌تی له‌ که‌سوکاری له‌ خۆت گه‌وره‌تر، زۆرمان له‌سه‌ریان نییه‌ و ده‌بێت به‌ ئارام بین. 

ڕه‌نگه‌ ئه‌و چاکسازیی و تێگه‌یشتنه‌ کاتی زۆری بوێ و کاتیش به‌شێکه‌ له‌ چاره‌سه‌ری، گرنگ مامه‌ڵه‌ی نه‌رم و پڕ خۆشه‌ویستییه‌ له‌گه‌ڵیان، به‌ڵکوو خوای گه‌وره‌ به‌هۆی تۆوه‌ هیدایه‌تی هه‌موویان بدات بۆ ڕێگای ڕاست.

خوای گه‌وره‌ش زاناتره ‌(جل وعلا).‌ 

وصلى الله على نبینا محمد وعلى آله وصحبه وسلم. 

- - - - - - - - - - - - - - - - - - - - - - - - - - - - - - - - - 

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.