به ‌ناوی خوای به‌خشنده‌ی میهره‌بان. 

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

وتنی هه‌ق و ئامۆژگاریکردن پێویسته‌ هه‌موو موسوڵمانێک بیکات. کردنی حه‌رامێک یان گوناهێک نابێته‌ ئه‌وه‌ی بکه‌ره‌که‌ی ئامۆژگاری خه‌ڵکی له‌سه‌ر نه‌کات، به‌ڵام ئه‌وه‌یه‌ خۆی زیاتر گوناهبار ده‌کات له‌وه‌ی ئامۆژگاری خه‌ڵكی ده‌کات و خۆی له‌ بیرکردووه‌، حاڵی وه‌کو که‌سێک وایه‌ ببێته‌ پردێک بۆ به‌هه‌شت و خۆیشی به‌سه‌ر دۆزه‌خه‌وه‌ ببرژێت! یان وه‌ک چرایه‌ک، مۆمێک بۆ خه‌ڵكی ڕووناکی بدات و خۆیشی بسوتێنیت! موسوڵمان ده‌بێت له‌ پێشا خۆی ڕزگار بکات ئه‌وجا خه‌می خه‌ڵکی بخوات بۆ قیامه‌ت و سه‌رفرازی دواڕۆژ.. خوای گه‌وره‌ به‌ نه‌وه‌ی ئیسرائیلییه‌کان ده‌فه‌رموێأَتَأْمُرُونَ النَّاسَ بِالْبِرِّ وَتَنسَوْنَ أَنفُسَكُمْ وَأَنتُمْ تَتْلُونَ الْكِتَابَ أَفَلاَ تَعْقِلُونَ[البقرة:٤٤] واته‌/ ئایا ئێوه‌ فه‌رمان به‌ خه‌ڵکی ده‌که‌ن هه‌تا ئیمان بهێنن و چاکه‌ بکه‌ن، به‌ڵام خۆتان له‌ بیر ده‌که‌ن(باوه‌ڕ ناهێنن به‌ ئیسلام و پێغه‌مبه‌ره‌که‌ی) له‌ کاتێکدا کتێبی خوا ده‌خوێننه‌وه‌ و شاره‌زان، ئایا بۆچی ژیر نابن و تێناگه‌ن؟ پاشان فه‌رمانکردنی خه‌ڵکی به‌ چاکه و ڕێگرییان له‌ خراپه‌ به‌ڵام بۆ خۆت به‌ پێچه‌وانه‌وه‌ ڕه‌فتار بکه‌ی، خوای گه‌وره‌ تووڕه‌ ده‌کاتَا أَيُّهَا الَّذِينَ آَمَنُوا لِمَ تَقُولُونَ مَا لَا تَفْعَلُونَ* كَبُرَ مَقْتاً عِندَ اللَّهِ أَن تَقُولُوا مَا لَا تَفْعَلُونَ‌[الصف:٢ و٣]. 

له‌ دواڕۆژیش که‌سانێک ده‌بینرێن له‌ دۆزه‌خ و ده‌ناسرێنه‌وه‌ له‌لایه‌ن دۆزه‌خییه‌کان، که‌ ئه‌وان له‌ دونیادا ئامۆژگاری چاکه‌ی خه‌ڵکیان کردووه‌ و ڕێگرییان کردوون له‌ خراپه‌، به‌ڵام وا ئێستا له‌گه‌ڵیانن له‌ دۆزه‌خ، کاتێک پرسیاریان لێ ده‌کرێ که‌ بۆچی لێره‌ن(دۆزه‌خ)؟! له‌ وه‌ڵامدا ده‌ڵێن؛ چونکه‌ ئێمه‌ ئه‌وه‌ی به‌ ئێوه‌مان ده‌ووت بۆ خۆمان به‌ پێچه‌وانه‌ی قسه‌کانی خۆمان ڕه‌فتارمان ده‌کرد.. ناو سکیان هاتۆته‌ده‌ر و له‌ به‌ردێک ئاڵاوه‌ و ئه‌وانیش له‌ تاو ئازار ده‌تلێنه‌وه‌ به‌ ده‌وریدا به‌ وێنه‌ی گوێدرێژێک که‌ چؤن له‌ ده‌وری ئاشێک ده‌گه‌ڕێ(خوا په‌نامان بدات)، سزای وتاربێژه‌کانی ئوممه‌تی ئیسلامیش ئه‌وانه‌ی ڕێی چاکه‌ نیشانی خه‌ڵكی ده‌ده‌ن و بۆ خۆیان نایکه‌ن یاخوود به‌ ناوی دینه‌وه‌ سه‌ر له‌ خه‌ڵكی ده‌شێوێنن، ئه‌وه‌یه‌ که‌ لێوه‌کانیان به‌ ئاسنی ئاگرین ده‌بڕڕی و وه‌ختێ دێته‌وه‌ دووبره‌ ده‌بڕڕێته‌وه‌." عن ثمامة أن أنس بن مالك قال‏:‏ قال رسول الله صلى الله عليه وسلم‏: أتيت ليلة أسري بي على قوم تقرض شفاههم بمقاريض من نار كلما قرضت وفت.‏ قلت‏:‏ ‏(‏من هؤلاء يا جبريل‏)‏‏؟‏ قال‏:‏ ‏هؤلاء خطباء أمتك الذين يقولون ولا يفعلون ويقرؤون كتاب الله ولا يعملون‏" 

به‌ڵام لێره‌دا ئه‌و هه‌موو هه‌ڕه‌شه‌یه‌ مانای ئه‌وه‌ نییه‌ ئێمه‌ له‌ که‌سێکی له‌و جۆرانه‌ نه‌سیحه‌ت و هه‌ق وه‌رنه‌گرین! ڕاستی له‌ هه‌موو که‌س وه‌رده‌گرین، وه‌ باشتره‌ بیریان بخه‌ینه‌وه‌ چونکه‌ مسوڵمان ئاوێنه‌ی موسوڵمانه‌ و ده‌بێ که‌موکوڕییه‌کانی به‌ شێوه‌یه‌کی باش نیشان بداته‌وه‌ هه‌تاوه‌کو بیانبینێ و چاکیان بکات.. یان ڕه‌نگه‌ ئه‌و خۆی له‌ بیر کردووه‌ و ئادخستنه‌وه‌ش پێویست و چاکه‌یه‌، یان ڕه‌نگه‌ شتێک به‌ حه‌رام نابینێ و له‌و مه‌سه‌له‌یه‌ نه‌زانه‌... خوای گه‌وره‌ هیدایه‌تی هه‌موو لایه‌ک بدات، ئامین.

خوای گه‌وره‌ش زاناتره ‌(جل وعلا).‌ 

وصلى الله على نبینا محمد وعلى آله وصحبه وسلم. 

- - - - - - - - - - - - - - - - - - - - - - - - - - - - - - - - - 

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.