دەنگی ئیسلام‌

من کچێکی دیندارم و هاوڕێیکەی کوڕی دیندارم هەیە شەرعیە هاوڕێیەتیەکەمان؟

سه‌لامى خواى گه‌وره‌تان لێبێت به‌ڕێزان به‌ڕێزان من هاورێكى كوڕم له‌ڕێى ئه‌نترنێته‌وه‌ ناسیوه‌ بۆ ماوه‌ى 5 مانگه‌ به‌س سوپاس بۆ خوا تا ئێسته‌ كه‌سمان نه‌وكه‌وتوینته‌ هیچ تاوانێك كه‌ خواى گه‌وره‌ پێى ناخوش بێت، به‌ڵام كه‌ڵك له‌ یه‌ك وه‌رده‌گرین بۆ ئیمانه‌كه‌مان ئیش و كارى ڕوژانه‌مان، هه‌ندى جاریش به‌ تێل قسه‌ ده‌كه‌ین به‌س زۆرجار من پێى ده‌ڵێم باواز بهێنن له‌م هاوڕێیه‌تیه‌مان به‌س ئه‌و ده‌ڵێت ئێمه‌ هیچ شتێكى خراپمان نه‌كردووه‌ كه‌ خواى گه‌وره‌ لێمان زویر بێت، سوپاس بۆ خوا ئه‌ویش كه‌سێكى ئیمانداره‌، ئیتر نازانم من گوناهبار ده‌م؟ زۆرجار ئه‌و پرسیاره‌ لام دروست ده‌بێت، تۆ بڵێى خواى گه‌وره‌ لێم زویر نه‌بێت؟ یان گوناهبار نه‌بم؟ سوپاستان ده‌كه‌م بۆ وه‌ڵامدانه‌وه‌ى چونكه‌ زۆر دوودڵ بووم وه‌ ئه‌گه‌ر وازى لێبێنم چۆن بتوانم به‌ چ ڕێگایه‌ك؟ خواى گه‌‌وره‌ پاداشتان بداته‌وه‌.

گۆڕینی فۆنت

وەڵام - ژمارەی پرسیار 647

به ‌ناوی خوای به‌خشنده‌ی میهره‌بان.

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی.

بۆ‌ وه‌ڵامی پرسیاره‌که‌ی به‌ڕێزتان:

خوشکی به‌ڕێزمان ئه‌وه‌ بزانه‌ که‌ هاوڕێیه‌تی نێوانی کوڕ و کچ له‌ ئیسلامدا نییه‌ و به‌تاڵه‌، هۆیه‌که‌شی ئه‌وه‌یه‌ که‌ خوای گه‌وره‌ باشتر ده‌زانێت چی لێ ده‌که‌وێته‌وه‌ له‌ گوناهه و لادان و نائارامی تاک و کۆمه‌ڵگا و بڵاوبوونه‌وه‌ی فه‌سادی و نائۆقره‌یی. ئه‌و ڕاستییه‌ش ئێستا هه‌موو به‌چاو ده‌یبینین و که‌س ناتوانێت نکۆڵی لێ بکات..

خوای گه‌وره‌ش نه‌یفه‌رمووه‌ که‌ ئه‌گه‌ر هاتوو نییه‌تان پاک بوو یان مه‌به‌ستان خێر بوو، قه‌یناکه‌ هاوڕێیه‌تی بکه‌ن! تێکه‌ڵی و پێکه‌وه‌ بوونی نێر و مێ به‌ده‌ر له‌ خوشک و برایه‌تی و ژن و مێردایه‌تی و هه‌ندێ چاورچێوه‌ی دیاری کراو، ئه‌وه‌ی تری هه‌مووی حه‌رامه‌..

پاساوی فێربوونی زانست و سوودوه‌رگرتن نابێته‌ هۆکاری ڕێگه‌دان به‌و په‌یوه‌ندییه‌ ناڕه‌وایه‌، ڕاسته‌ بۆ ئافره‌تان هه‌یه‌ له‌لای مامۆستایه‌کی پیاو فێری زانستی به‌سوود ببن، به‌ڵام ئه‌وه‌ له‌ قاڵبی خۆیدا و به‌ مه‌رجی خۆی، یه‌کێک له‌و مه‌رجانه‌ ئه‌وه‌یه‌ که‌ نابێت به‌ته‌نیا دووان بێت، واته‌ مامۆستایه‌ک و ئافره‌تێک چونکه‌ ده‌بێته‌ خه‌ڵوه‌ت و تێکه‌ڵی.. شه‌یتانیش له‌ سه‌ره‌تاوه‌ بێگومان به‌و ناوه‌وه‌ دێته‌ نێوانتان، گوایه‌ ئه‌مه‌ بۆ خێره‌، به‌ڵام ئایا ده‌زانی کۆتاییه‌که‌ی به‌ره‌و کوێ ده‌ڕوات!؟

که‌واته‌ هه‌رچی زووه‌ ئه‌و په‌یوه‌ندییه‌ کۆتایی پێ بهێنن، ئه‌گه‌ر مه‌به‌ستی تریش هه‌یه‌ له‌و په‌یوه‌ندییه‌ وه‌کو مه‌به‌ستی هاوسه‌رگیریی، با له‌ ده‌رگای خۆیه‌وه‌ بێته‌ پێش لێت و ڕێگای ماره‌کردن و خێزانداریی هه‌ڵبژێرن. ئه‌مانه‌ش بخوێنه‌وه‌ مه‌ترسی چاتکردن و ٧٣١ .

خوای گه‌وره‌ش زاناتره ‌(جل وعلا).‌

وصلى الله على نبینا محمد وعلى آله وصحبه وسلم.

- - - - - - - - - - - - - - - - - - - - - - - - - - - - - - - - -

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.

ژمارەی بینین 867