به ‌ناوی خوای به‌خشنده‌ی میهره‌بان. 

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

به‌ڵێ له‌ قه‌ده‌ری خوایه‌ و بڕاوه‌ته‌وه‌ له‌ پێش دروستبوونمان کێ له‌ مرۆڤه‌کان زه‌ماوه‌ند ده‌که‌ن و کێشیان به‌ ڕه‌به‌نی ده‌مێننه‌وه‌، ئه‌وانه‌ش بۆیه‌ک ده‌بن و هه‌موو ژیان و جموجووڵی تریش هه‌مووی کێشراوه‌ و به‌و جۆره‌ ده‌بێت که‌ خوا نووسیوێتییه‌وه‌.. ئێمه‌ش وه‌کو باوه‌ڕدار ده‌بێت باوه‌ڕمان هه‌بێت به‌و قه‌ده‌ره‌ و هیچ دوودڵیشمان نه‌بێت ئه‌گینا بڕوانه‌بوون به‌ قه‌ده‌ر ئیمان هه‌ڵه‌ده‌وه‌شێنێته‌وه‌.. 

به‌ڵام ئه‌م باسه‌ ڕوونکردنه‌وه‌ی پێویسته‌ هه‌تاوه‌کو دڵمان پێی ئارام بێ و له‌ حه‌قیقه‌تی قه‌ده‌ر تێ بگه‌ین.. 

وه‌کو کرده‌وه‌کانمان خوای گه‌وره‌ زانیوێتی ئێمه‌ چی ده‌که‌ین له‌ پێش ئه‌وه‌ی دروستیشمان بکات، ئه‌وجا به‌و عیلمه‌ی خۆی و دوای ئه‌وه‌ش ویستی لێ بووه‌ ئێمه‌ ئه‌و کرده‌وانه‌مان لێ ده‌رکه‌وێ ئیتر بۆی نووسیووین که‌ ئێمه‌ وا ده‌که‌ین و وا ده‌بین.. که‌واته‌ ئه‌وه‌ حوکمی خوا نییه‌ له‌سه‌رمان له‌ کردنی شتێک یان نه‌کردنی یاخوود له‌و شتانه‌ی پرسیارمان له‌سه‌ر ده‌کاته‌وه‌، به‌ڵکوو ته‌واو ڕه‌زامه‌ندی و ئیراده‌ی خۆمانی تێدایه‌ و به‌ زۆریی خودا نییه‌! 

ئه‌وه‌ش که‌ په‌یوه‌ندی نییه‌ به‌ خودی هه‌وڵ و ویست و کرداری ئێمه‌وه‌، هه‌ر خوا دایڕشتووه‌ که‌ ده‌بێت وا ڕووبدات به‌ڵام خوای گه‌وره‌ لێپرسینه‌وه‌مان له‌سه‌ر ناکات له‌سه‌ریان چونکه‌ به‌ ده‌ستی ئێمه‌ نییه‌ و نه‌بووه‌.. 

ژنهێنان و هاوسه‌رگیرییش داوایه‌کی شه‌رعییه‌ و که‌سێک به‌بێ عوزر بڕیار بدات ژن نه‌خوازێ یان شوو نه‌کات گوناهبار ده‌بێت و چونکه‌ له‌ فه‌رمانی خوا و سووننه‌تی پێغه‌مبه‌ر(صلى الله عليه وسلم)لایداوه‌.. پاشان ئێمه‌ خۆ نازانین چی نووسراوه‌ و بڕیار دراوه‌ هه‌تاوه‌کو دڵنیا بین ئه‌گه‌ر هه‌ر به‌ بێ ژن و خێزان ده‌مێنینه‌وه‌ بۆیه‌ هه‌وڵ نه‌ده‌ین و له‌ خۆوه‌ به‌بێ هیچ بناغه‌یه‌ک بڵێین خوا بۆ منی نه‌نووسیوه‌ هاوسه‌رم ببێت، په‌نا ئه‌گرین به‌ خوا ئه‌وه‌ له‌ نه‌فامی و جهله‌ به‌ دین و ئیمان و قسه‌کردنه‌ له‌سه‌ر نادیار و په‌نهانی خوا(الغيب).. 

کاتێک پێغه‌مبه‌ری خوا(صلى الله عليه وسلم) به‌ هاوه‌ڵه‌کانی فه‌رموو: هه‌موو شتێک بڕاوه‌ته‌وه‌ و دیاریکراوه‌، ئه‌وانیش فه‌رموویان: ئه‌ی که‌واته‌ ئیش و هه‌وڵ بۆچی؟! فه‌رمووی: کار و هه‌وڵی خۆتان بکه‌ن چونکه‌ هه‌ر که‌سه‌ و ئه‌وه‌ی بۆ ئاسان ده‌کرێ که‌ بۆی دروست بووه‌.. که‌واته‌ له‌مه‌وه‌ موسوڵمان ده‌بێت ته‌واو هه‌وڵی خۆی بدات بۆ هێنانه‌دی هه‌موو ئاوات و خواسته‌کانی، به‌ڵام ده‌بێت بڕواشی وابێت ته‌نها ئه‌وه‌ی ده‌بێته‌ به‌ش که‌ بۆی بڕاوه‌ته‌وه‌.. ئاوات و خواسته‌کانیش هه‌ندێکیان به‌بێ هۆکار و هێندێکی تریان به‌ هۆکار خوای گه‌وره‌ ئه‌یدات، هه‌ندێ شت له‌ ڕوواڵه‌ت به‌بێ هۆ نایه‌ته‌ جێ، وه‌کو ڕۆزی په‌یداکردن و بوون به‌ زانایی، هه‌وڵی ده‌وێ، به‌ڵام شتیش هه‌یه‌ به‌بێ هه‌وڵ خوای ئه‌یداته‌ هه‌ندێ له‌ به‌نده‌کانی، ڕه‌نگه‌ به‌بێ هه‌وڵ ڕۆزیی ڕۆژێک یان چه‌ند ڕۆژێک بداته‌ که‌سێک، وه‌ک ئه‌وه‌ی ئاگای له‌ خۆ نییه‌ و خێرێکی بۆ دێته‌ ماڵه‌وه‌ و چه‌ند ڕۆژێک له‌سه‌ری ده‌ژی، به‌ڵام به‌ گشتی ڕۆزیی په‌یداکردن به‌ هه‌وڵ و ئاره‌قه‌ ڕشتنه‌، ژنهێنانیش وایه‌، ڕه‌نگه‌ خه‌ڵک بوو ئاگایشی لێ نییه‌ خه‌کانێکی تر هه‌وڵی هاوسه‌رگیریی بۆ ئه‌ده‌ن و وه‌ختێک ده‌زانێت ته‌نها بڵێ ڕازیم و هه‌موو شت ئاماده‌ کراوه‌، خه‌ڵكی تریش هه‌یه‌ وه‌کو تۆ ماندوو ده‌بێ و هێشتا نه‌گه‌یشتۆته‌ ئه‌نجام.. 

بۆیه‌ ئێمه‌ لێره‌دا ئامۆژگاری ئێوه‌ ده‌که‌ین به‌وه‌ی سه‌بر بگرن له‌به‌رده‌م قه‌ده‌ری خوا، هه‌وڵی خۆتت داوه‌ و به‌رده‌وامیش به‌ و گومان له‌ خوا و قه‌ده‌ریش مه‌که‌ نه‌وه‌ک شه‌یتان فریوت بدات و تووشی گوناهت بکات.. بڕوات وا بێت که‌ هه‌موو ئه‌وانه‌ی چوییته‌ دوایان له‌ به‌شی تۆ نه‌بوون، هه‌ر ئه‌وه‌ت بۆ دانراوه‌ که‌ نووسراوه‌ به‌ڵام نایدۆزیته‌وه‌ هه‌تا هه‌وڵ نه‌ده‌ی چونکه‌ دڵنیاش نیت به‌بێ هه‌وڵی تۆ دێت، ئه‌گه‌ر بتزانیبایه‌ ئێمه‌ش ده‌مانووت خۆت ماندوو مه‌که‌ خۆی دێت! بۆیه‌ کرده‌ بیت باشتر و خوازیاره‌ نه‌وه‌ک نه‌کرده‌ی په‌شیمان! 

دوعا و پاڕانه‌وه‌ش کاری خۆی هه‌یه‌ و له‌ بیریشت بێت که‌ خوا باشتر ده‌زانێت چی بۆ به‌نده‌کانی باشه‌ و ئه‌وه‌ش که‌ به‌نده‌ هه‌وڵی خۆی ئه‌دا و ڕازیشه‌ به‌ قه‌ده‌ری خوا پاداشتی له‌سه‌ر وه‌رده‌گرێ و عیباده‌ته‌، ئێمه‌ش کارمان له‌ دونیا عیباده‌ت و ڕازیبوونه‌ به‌ خوایه‌تی خوا له‌سه‌رمان. 

خوای گه‌وره‌ش ده‌فه‌رموێلا تیأسوا من روح الله واته‌/ بێهیوا مه‌به‌ن له‌ ڕه‌حمه‌تی خوا..

خوای گه‌وره‌ش زاناتره ‌(جل وعلا).‌ 

وصلى الله على نبینا محمد وعلى آله وصحبه وسلم. 

- - - - - - - - - - - - - - - - - - - - - - - - - - - - - - - - - 

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.