دەنگی ئیسلام‌

دراوسێیەکمان کاری خراپ دەکات من چی بکەم و چۆن نەسیحەتی بکەم؟

سلاوی خواتان لی بیت ماوه‌ی سالیکه‌ ماله کوردیک دراوسیمانه‌ زور خوشحال بووم به‌لام دوای ده‌ستی کرد به‌ سوعبه‌ت و ده‌ستبازی له‌گه‌ل میرده‌که‌م. پیشتریش هه‌ر زوور سوعبه‌تی ئه‌ کرد له‌گه‌ل میرده‌که‌م . هه‌ولم دا بوی روون بکه‌مه‌وه‌ که‌ جوان نی یه‌ له‌ گه‌ل پیاوی پیگانه ‌وا بکه‌ی به‌لام به‌ منی ووت تو دلت پیسه‌ قه‌یچێکا توش له‌گه‌ل میرده‌که‌ی من وا بکه‌ .له‌دوای ئه‌وه‌ هه‌ولم دا خومی لی دوربخه‌مه‌وه‌ هه‌ر خه‌ریکی به‌زمی خۆیه‌تی میرده‌که‌شی ئاگای لێیه‌تی به‌لام نه‌یئه‌وێرا هیچ بکات . من پێم وت حه‌ز ناکه‌م وابکه‌یت له‌گه‌ڵ مێرده‌که‌م دوای سه‌یرم کرد پیاوی بێگانه‌ ئه‌چێته‌ لای هه‌‌ تا ٢ی شه‌و چووم له‌به‌ر خوا له‌به‌ر مانگی ره‌مه‌زان نه‌سیحه‌ تم کرد. مێرده‌که‌م ئێستا بۆی ده‌رکه‌وتووه‌ هه‌ر قسه‌ی له‌گه‌ڵ ناکات. ژنه‌که ‌زانی که‌ من زانیومه‌ له‌گه‌ڵ مێرده‌که‌م، دواین شه‌و مێرده‌که‌ی هێنا بۆ ماڵمان گوایه‌ چاودێری ده‌که‌ین، مێرده‌که‌ی ئه‌یوت ژنه‌که‌م سه‌ربه‌سته‌ چی ئه‌کا، به‌ڵام من هه‌ر زۆرم پێ ناخۆشه‌‌ که‌ ئه‌وانه‌ ده‌بینم له‌به‌ر دراوسێیه‌تی هه‌روه‌ها ژنه‌که‌ش نوێژ ئه‌کا، به ‌ڕای به‌ڕێزتان چی ئه‌فه‌رموون که ‌ئه‌م جاره‌ش پێی بڵێم که‌ ئه‌وه‌ هه‌ڵه‌یه‌ هه‌رچه‌نده‌ش مێرده‌که‌ی سه‌ربه‌خۆی کردووه؟

گۆڕینی فۆنت

وەڵام - ژمارەی پرسیار 703

به ‌ناوی خوای به‌خشنده‌ی میهره‌بان.

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی.

بۆ‌ وه‌ڵامی پرسیاره‌که‌ی به‌ڕێزتان:

ده‌توانین له‌م خاڵانه‌دا وه‌ڵامی پێویستت بده‌ینه‌وه‌:

١- به‌ر له‌ هه‌موو شتێک پێویسته‌‌ ئه‌م دوانه‌ که‌ بوونه‌ته‌ دراوسێتان بیانناسن! به‌ بۆچوونی ئێمه‌ ئه‌و دوانه‌ یه‌کێکن له‌مانه‌ی خواره‌وه‌:

-- ڕه‌نگه‌ ئه‌م دوانه‌ هه‌ر له‌ بنچینه‌دا ژن و مێرد نه‌بن، چونکه‌ به‌و ڕه‌فتارانه‌یان وادیاره‌ هه‌رچی غیره‌ت و پاکییه‌ تێیاندا نه‌ماوه‌..

-- یاخود ئه‌م دوانه‌ ژن و مێردن به‌ڵام به‌ زۆر هۆکار غیره‌تیان له‌سه‌ر یه‌کتری نه‌ماوه‌ بۆ ئه‌وه‌ش خۆیان فریو بده‌ن ناوی ئازادی و کراوه‌یی لێ ئه‌نێن! له‌و هۆکارانه‌؛ پیاوه‌که‌ ئه‌و حاڵه‌ته‌ی پێ خۆشه‌، نایه‌وێ ڕه‌وشت و پیرۆزییه‌ک هه‌بێ ڕێگای لێ بگرێ، بیه‌وێ خۆی هه‌موو شتێک بکات له‌به‌رئه‌وه‌ ڕێگای داوه‌ به‌خێزانیشی وه‌کو خۆی سه‌ربه‌ست بێ و وه‌کو دوو ئه‌وروپی ڕه‌فتار بکه‌ن.

-- یاخود هه‌ر له‌سه‌ره‌تای دروستکردنی ژیانیانه‌وه‌ له‌سه‌ر ئه‌وه‌ ڕێک که‌وتوون به‌و جۆره‌ خێزان بن، به‌ داخه‌وه‌ ئێستاکه‌ له‌ناو کوردا زۆرێک له‌م نمونه‌ قێزه‌ونانه‌ هه‌یه‌ و به‌دی ده‌کرێ.

له‌ هه‌موو ئه‌م حاڵه‌تانه‌دا باشترین بڕیار بۆ ئێوه‌ ئه‌وه‌یه‌ خۆتان دوور بگرن له‌ هه‌ردووکیان چونکه‌ ئه‌وان نقوومی شه‌هه‌وات و نه‌فامی بوون و ئه‌سته‌مه‌ به‌ ئێوه‌ بێنه‌وه‌ ده‌رێ!! به‌ پێچه‌وانه‌وه‌شه‌وه‌ ئه‌و ئاگره‌ی ئه‌وانی تێ که‌وتوون ئێوه‌ش ده‌سووتێنێ..

٢- ئێوه‌ی موسوڵمانیش پێویسته‌ زۆر ئاگاداری یه‌کتر بن، غیره‌تان له‌سه‌ر یه‌کتر هه‌بێ، ئه‌و وشانه‌ ته‌نها بۆیاخه‌ و دیکۆره‌ که‌ ده‌وترێ دڵپیسیی یاخود کراوه‌یی و ئازادی و سه‌ربه‌ستی.. ئه‌وانه وشانێکن شه‌یتان ده‌یڕازێنێته‌وه‌ له‌سه‌ر مرۆڤه‌کان هه‌تاوه‌کو له‌ په‌نایه‌وه‌ تووشی داوێنپیسی و هه‌ڵوه‌شانه‌وه‌ی خێزان و فه‌سادی کۆمه‌ڵگای لێ بکه‌وێته‌وه‌.. به‌ هیچ جۆرێک ڕێگا مه‌ده ئه‌و ئافره‌ته‌ نزیک بێته‌وه‌ له‌ مێردت! به‌ڵکو له‌گه‌ڵ مێردیشت توندی بنوێنه‌ که‌ نابێت ڕووی بداتێ و ڕێگا بدات لێی نزیک بێته‌وه‌..‌ خوا ده‌زانێت ئه‌وانه‌ مه‌رامیان ئه‌وه‌ نییه‌ ژیان له‌ ئێوه‌ بشێوێنن و له‌ خشته‌تان به‌رن.

جێی سه‌رنجه‌ که‌ ده‌بێ ئێوه‌ له‌به‌ر خاتری دڵی یه‌کتر هاوکار و هاوده‌م بن له‌ ڕووبه‌ڕووبوونه‌وه‌ی ئه‌م مه‌ترسییه‌ له‌ سه‌ر ژیانتان، چونکه‌ به‌ دواکه‌وتنی هه‌ر لایه‌کتان بۆ هه‌نگاوه‌ شه‌یتانییه‌کانی ئه‌و ئافره‌ت و پیاوه‌ شیرازه‌ی خێزانیتان تێک ده‌دا و دڵه‌ڕاوکێ و دڵپیسیی و نه‌مانی متمانه‌ له‌ نێوانتان ده‌ڕوێنێ.. مرۆڤیش به‌ زۆری به‌ هۆی هاوڕێ و دراوسێ و ده‌وروپشتییه‌وه‌ ده‌گۆڕێ و تووشی لادان ده‌بێت.

٣-- مه‌رج نییه‌ وته‌ی ئه‌و ئافره‌ته‌ که‌ ده‌ڵێ نوێژ ده‌که‌م ڕاست بێت، ڕه‌نگه‌ ویستبێتی به‌و بانگه‌شه‌یه‌ گوایه‌ نوێژ ده‌کات لێتان نزیک بێته‌وه‌ یان نیشانی تۆی بدات که‌ ئه‌وه‌تا ئه‌ویش نوێژ ده‌کات به‌ڵام ئازادیشه‌.. به‌ڵام خوای گه‌وره‌ ده‌فه‌رموێإن الصلاة تنهى عن الفحشاء والمنکر.. واته‌/ نوێژێک که‌ ڕاسته‌قینه‌ و سه‌نگی هه‌بێت ئه‌وه‌یه‌ خاوه‌نه‌که‌ی له‌ گوناه و خراپه‌ دوور بخاته‌وه‌..

به‌ڵام ده‌کرێ ئێوه‌ی به‌ڕێز بۆ دواجار له‌ باسی موسوڵمانێتی ڕاسته‌قینه‌ و گه‌وره‌یی نوێژه‌وه‌ جارێکی تر قسه‌ی له‌گه‌ڵ بکه‌یته‌وه‌، ئامۆژگاری بکه‌ی که‌ ئه‌وه‌ی ئه‌و ده‌یکات ئه‌و خوایه‌ی نوێژی بۆ ده‌کات پێی قه‌بووڵ نییه‌ و تاوانی تێکه‌ڵی له‌گه‌ڵ پیاوانی تر و کردنی زینا بۆ ئافره‌تی به‌ مێرد له‌لای خوا زۆر قورسه‌، له‌ دونیادا به‌ردباران ده‌کرێ هه‌تاوه‌کو مردن و له‌ قیامه‌تیش ئه‌گه‌ر تۆبه‌ی نه‌کردبوو له‌ ئاگری دۆزه‌خ ئه‌نرێ و سزا ده‌درێ.. دڵی خۆتی بۆ بکه‌وه‌ ئه‌و قسانه‌ی له‌ دڵه‌وه‌ پێ بڵێ، بۆی ڕوون بکه‌وه‌ که‌ ئه‌و ژیانه‌ به‌ناوئازادییه‌ ژیانی تێدا نییه‌ و به‌ڵکو مردن و تیاچوونه‌‌، ته‌نانه‌ت ئه‌گه‌ر له‌ داخی مێرده‌که‌ی خۆی تووشی ئه‌و بێ شوره‌یی و ژیانه‌ سووکه‌ کردووه‌(بوون به‌ ئامێری ئاره‌زووی پیاوان) ڕێگای چاره‌سه‌ر نییه‌، تۆڵه‌ به‌و شێوه‌یه‌ ناکرێته‌وه‌.. به‌ڵکو گه‌ڕانه‌وه‌ بۆلای خوا و تۆبه‌ی یه‌کجاری و په‌یوه‌ندی پته‌وکردن له‌گه‌ڵ خوای پاک و به‌خشنده‌ بۆ هه‌موو. ژیانی ڕۆح و ڕاحه‌تی دڵه‌کان ته‌نها له‌ یادی خوا و پاکی و به‌ندایه‌تییه‌ بۆ خوای په‌روه‌ردگاری هه‌موو مه‌خلووقاته‌کان. یادی بێنه‌وه‌ که‌ ئه‌گه‌ر له‌به‌ر بێهیوایی تووشی ئه‌و حاڵه‌ته‌ هاتووه‌ هێشتا خوا به‌ڕه‌حمه‌ و گوناهه‌کانی گه‌وره‌تر نه‌بوون له‌ به‌زه‌یی خوای میهره‌بان، مادام هێشتا نه‌مردووه‌ و مۆڵه‌تی تۆبه‌ و په‌شیمانی ماوه‌ له‌گه‌ڵ گه‌ڕانه‌وه‌ بۆ ژیانی شه‌رم و حه‌یا و ژیانی له‌گه‌ڵ خوابوون..

پێی بڵێ ئه‌گه‌رچی تۆ به‌رده‌وام له‌سه‌ر ئه‌و حاڵه‌ته‌ت ناگه‌یته‌ خۆشی و ئۆقره‌ی ده‌روونی و به‌ پێچه‌وانه‌وه‌ ناخت لۆمه‌ت ده‌کا و له‌ داهاتووش له‌ دوای تێپه‌ڕینی ته‌مه‌ن ئاوڕدانه‌وه‌ ژانت ئه‌داتێ و به‌رده‌میشت تیاچوون و ونبوونه‌ و ته‌نیاییش چاره‌نووست..

خوای گه‌وره‌ش زاناتره ‌(جل وعلا).‌

وصلى الله على نبینا محمد وعلى آله وصحبه وسلم.

- - - - - - - - - - - - - - - - - - - - - - - - - - - - - - - - -

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.

ژمارەی بینین 649