به ‌ناوی خوای به‌خشنده‌ی میهره‌بان. 

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

بۆچوونی ئێمه‌ وایه‌ سه‌ره‌تا به‌ڵگه‌ی بێگومانیی له‌سه‌ر ئه‌و تاوانانه‌ی ئاماده‌ بکه‌ی، وه‌ک ئه‌وه‌ی له‌و منداڵ و کچۆڵانه‌ و زڕخوشکانه‌ی نێزیک بیته‌وه‌ هه‌تا قه‌ناعه‌تیان پێ بکه‌ی دڵی خۆیان بۆ تۆ یان که‌سێکی موسوڵمانی شاره‌زا که‌ له‌ ناو ئه‌و بنه‌ماڵه‌یه‌دا ناسراو بێت بکه‌نه‌وه‌، وایان لێ بکرێ شه‌رم و ترس نه‌یانگرێ و ئه‌و ڕاستییانه‌ بدرکێنن.. پاشان پێیان بوترێ له‌ دوای ئه‌وه‌ی دڵیان ئارام بێته‌وه‌ که‌ تووشی ناڕه‌حه‌تی نابن و هه‌وڵ ئه‌درێ ڕزگار بکرێن له‌و ده‌ستدرێژییانه‌، ئه‌وجا ئه‌و تاوانباره‌ بانگ بکرێ له‌لای یه‌ک دوو برای به‌ ته‌مه‌نی و موسوڵمانی شاره‌زا یان هه‌ر له‌ ناو خزمه‌کان یه‌ک دوو پیاو ماقوڵیان دانیشتنی له‌گه‌ڵ بکرێ و هه‌رچیش باس ده‌کرێ تۆمار بکرێ به‌ ڤیدیۆ یاخود به ده‌نگ، له‌ پێشدا بۆی ڕوون بکرێته‌وه‌ که‌ ئێوه‌ هه‌موو نهێنییه‌کان ده‌زانن و ده‌شتوانن ئابڕووی به‌رن و له‌ناو خزمان و هاوڕێکانی ڕیسوای بکه‌ن، به‌ڵام وه‌کو دوایین مۆڵه‌ت و شانسی چاکسازیش بۆ خۆی هه‌رچی کردووه‌ بۆی ده‌پۆشن به‌ مه‌رجی ئه‌وه‌ی به‌ هیچ شێوه‌یه‌ک جارێکی تر ئه‌و ده‌ستدرێژییانه‌ دووباره‌ نه‌کاته‌وه‌.. 

پاشان ئامۆژگاری بکه‌ن به‌وه‌ی با له‌ خوا بترسێ و ڕێگای تۆبه‌ و گه‌ڕانه‌وه‌ بگرێته‌ به‌ر، چونکه‌ خوای گه‌وره‌ لێی ناگه‌ڕێ هه‌تا سه‌ر زوڵم و سته‌م له‌گه‌ڵ خوشک و برا و برازایه‌کانی خۆی بکات، به‌ڵکوو په‌رده‌ی له‌سه‌ر هه‌ڵده‌ماڵێ و ڕیسوای دونیا و قیامه‌ت ده‌بێ، سه‌ره‌ڕای ئه‌و دوژمنایه‌تی و شه‌ڕ و ئاژاوانه‌ی ده‌ینێته‌وه‌ له‌ناو ئه‌و خێزان و بنه‌ماڵه‌یه‌.. وه‌ له‌باتی ئه‌وه‌ ڕوو بکاته‌ خوا و تۆبه‌ی نه‌سوح بکات و ژیانی پاکیی هه‌ڵبژێرێ، پاشان نه‌بێت پێشه‌نگی پیس و ناشرین له‌به‌رده‌م برا و خوشك و ئه‌وانه‌ی ته‌عدایان لێ ده‌کات، به‌ به‌رده‌وامی له‌سه‌ر ئه‌و کاره‌ی ڕێگای فه‌سادی و به‌دڕه‌وشتی ده‌خاته‌ سه‌رپشت بۆ ئه‌و منداڵانه‌ و له‌ ئێستاوه‌ ڕایان ده‌هێنێ له‌سه‌ر ژیانی ڕیسوایی و سووکیی و ده‌یانخاته‌ به‌ر ئاره‌زوومه‌ندان و شه‌ڕواڵپیسان، چۆن ئه‌وه‌ی پێ قه‌بووڵ ده‌بێ ئه‌و بێگوناهانه‌ ڕابهێنێ له‌سه‌ر سووکیی و به‌دڕه‌وشتی، له‌ ئێستاوه‌ په‌رده‌ی حه‌یا و غیره‌تیان له‌به‌ر ده‌ماڵێ و فێری به‌دڕه‌وشتی و نزمایه‌تییان ده‌کات!!؟ 

ئه‌مه‌و سه‌ڕه‌ڕای ئه‌وه‌ی کاریگه‌ری ئه‌و تاوان و ده‌ستدرێژییانه‌ هه‌تاوه‌کو مردن له‌سه‌ریان ده‌مێنێته‌وه‌، یان دوای تێپه‌ڕینی چه‌ند ساڵێک چۆن ڕووی دێ ئه‌و خوشک و برا و که‌سانه‌ی ببینێ و بیاندوێنێ که‌ ڕۆژانێک بۆ هه‌وا و ئاره‌زووی پیسی خۆی هه‌ڕه‌شه‌ی لێکردوون و کردوونی به‌ قوربانی شه‌هوه‌ته‌کانی!!؟ 

بیترسێنن به‌ سزای خوا و ڕیسوابوونی له‌ناو خه‌ڵک، پێی بڵێن که‌ چی تر له‌و دڕندایه‌تییه‌ی بێ ده‌نگ نابن، بۆیه‌ یان ئه‌وه‌یه‌ به‌ ڕاستی تۆبه‌ بکات و خۆی بگۆڕێ، ڕێگایه‌ ئه‌وه‌ش گرتنی هاوڕێی موسوڵمان و چوون بۆ مزگه‌وت و به‌ره‌و خواچوونه‌، یان ئه‌وه‌یه‌ با سه‌ری خۆی هه‌ڵبگرێ و بڕوات ئه‌گینا له‌گه‌ڵ هه‌ستکردنێکی که‌میش له‌به‌رده‌وامی و سووربوونی له‌سه‌ر ئه‌و فاحیشانه‌ ئێوه‌ ڕیسوای ده‌که‌ن و دونیای لێ تاڵ ده‌که‌ن.. 

خوای گه‌وره‌ هیدایه‌تی بدات به‌ڵکوو هه‌موو ئیسراحه‌تی لێ بکه‌ن و که‌سیش تووشی کێشه‌ و ئاژاوه‌ نه‌بێت.

خوای گه‌وره‌ش زاناتره ‌(جل وعلا).‌ 

وصلى الله على نبینا محمد وعلى آله وصحبه وسلم. 

- - - - - - - - - - - - - - - - - - - - - - - - - - - - - - - - - 

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.