به ‌ناوی خوای به‌خشنده‌ی میهره‌بان. 

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

باسه‌که‌ی ئێوه‌ خوشکی به‌ڕێز دوو لایه‌نه‌؛ یه‌که‌میان ئه‌گه‌ر هیوایه‌ک هه‌بێ یان چاره‌سه‌رێک، دووه‌میان؛ خوانه‌خواست ئه‌گه‌ر هیچ هیوایه‌ک نه‌بوو ئامۆژگاری چییه‌؟ 

سه‌باره‌ت به‌ خاڵی یه‌که‌م ئه‌گه‌ر لێیه‌وه‌ ده‌ست پێ بکه‌ین ئه‌وه‌یه‌ که‌ ئێوه‌ نابێت وازوو بێ ئومێد و خۆبه‌ده‌سته‌وه‌ بده‌ن، باشتر وایه‌ ئه‌وه‌ی له‌سه‌رتانه‌ یان له‌ ئه‌ستۆتاندایه‌ هه‌وڵی بۆ بده‌ن و درێخی نه‌که‌ن! بۆ نمونه‌ ئه‌گه‌ر نووقسانییه‌ک هه‌یه‌ له‌ تۆدا یان مێردت و چاره‌سه‌رییش هه‌یه‌، پێویسته‌ بڕۆن به‌ ده‌مییه‌وه‌ و ئه‌نجامی بده‌ن چونکه‌ له‌ جوانی و ته‌واوی پشتبه‌ستن به‌خوا ئه‌وه‌یه‌ هۆکار و ئه‌وه‌ی له‌ ده‌ستدایه‌ ئه‌نجامی بده‌ی ئه‌وجا پشت به‌ خوای گه‌وره‌ ببه‌ستی، وه‌کو جوتیارێک چۆن زه‌وییه‌کی ده‌کێڵێ و بژاری ده‌کات و پاشان تۆ ده‌چێنێ و ئه‌وجا ئاوی ده‌دات و ئیتر دوای هه‌موو شتێک ده‌یداته‌ ده‌ستی خوای گه‌وره‌ و به‌ته‌مای ڕه‌حمی ئه‌وه‌. 

له‌ هۆکاره‌ گرنگه‌کان نزیکبوونه‌وه‌یه‌ له‌ خوا، ڕه‌نگه‌ له‌ ئه‌نجامی گوناهێک له‌ تۆوه‌ یان مێردت، سزای منداڵنه‌بوون درابێ به‌سه‌رتان، به‌ڵگه‌شمان له‌ قورئانه‌، ئه‌وه‌تا خوای گه‌وره‌ له‌ سه‌ر زمانی پێغه‌مبه‌ر نوحه‌وه‌-سه‌لامی خوای لێ بێت- که‌ به‌ قه‌مه‌که‌ی ده‌فه‌رموێ: پێم وتن داوای لێخۆشبوون بکه‌ن، خوای گه‌وره‌ لێبورده‌یه‌، بارانی به‌لێزمه‌تان له‌ ئاسمانه‌وه‌ بۆ ده‌بارێنێ و پێتان ده‌به‌خشێ ماڵ و سامان و کوڕانی زۆر و باخ و کانیاوتان بۆ ده‌ره‌خسێنێ..فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا* ُرْسِلِ السَّمَاءَ عَلَيْكُم مِّدْرَارًا * وَيُمْدِدْكُم بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا[نوح:١٠-١٢]. 

ئه‌وه‌ش به‌ عه‌مه‌لی تاقیکراوه‌ته‌وه‌، که‌سانێک هه‌بوون خۆیان سوێند ده‌خۆن و ده‌ڵێن له‌ نیوه‌ی شه‌وان هه‌ڵده‌ستاین ته‌نها داوای لێخۆشبوون و ئیستیغفارمان ده‌کرد هه‌تاوه‌کو خوای گه‌وره‌ منداڵمان پێ بدات، ده‌ڵێن دوای چه‌ند مانگێک مژده‌ی منداڵمان پێ ده‌درا، ئه‌وه‌ش هه‌ر له‌م ڕۆژانه‌ی ئێستامان ڕوویداوه‌! 

هه‌روه‌ها به‌خشش و نیعمه‌ته‌کانی خوا زیاد ده‌کات ئه‌گه‌ر شوکرانه‌ی خوا بکرێ(الحمدلله یان الشکر لله‌) یاخود زیادکردنی عیباده‌ت وه‌کو زۆرکردنی نوێژ به‌تایبه‌تی شه‌ونوێژ.. هه‌روه‌ها پاڕانه‌وه‌ی تاریکی شه‌و و کاتی سوجده‌کان.. ئه‌وه‌ش بۆ ئه‌و که‌سانه‌شه‌ که‌ دکتۆره‌کان ئیزنیان داون و به‌پێی پشکنین و زانست منداڵیان نابێت!! هه‌روه‌ها چوون بۆ حه‌ج و پاڕانه‌وه‌ له‌لای به‌رده‌ ڕه‌ش و له‌لای که‌عبه‌ی پیرۆز، ئه‌وه‌ش تاقی کراوه‌ته‌وه‌، به‌تایبه‌تی له‌وێ ئاوی زه‌مزه‌م هه‌یه‌، که‌ پێغه‌مبه‌ری خوا(صلى الله عليه وسلم) له‌باره‌وه‌ی فه‌رموویه‌تی: بۆ هه‌ر مه‌به‌ستێک بخورێته‌وه‌ ده‌یپێکێ و حاسڵی ده‌کات، بۆیه‌ له‌وێ له‌ کاتێکی پیرۆزه‌ که‌ وه‌ختی حه‌جه‌، له‌ جێیه‌کی موباره‌که‌ که‌عبه‌ و عه‌ره‌فه‌ی لێیه‌، ئاوی زه‌مزه‌میش ده‌رگای قه‌بووڵی دوعایه‌.. 

ئه‌مانه‌ بکه‌ن و په‌له‌ش مه‌که‌ن، چونکه‌ خوای گه‌وره‌ داوای که‌سێک وه‌ڵام ناداته‌وه‌ ئه‌گه‌ر په‌له‌ی بێت، له‌ باتی ئه‌وه‌ یادی زه‌که‌ریا پێغه‌مبه‌ر وئیبراهیم بکه‌نه‌وه‌-سه‌لامی خوایان لێ بێت- که‌ چؤن له‌ ته‌مه‌نی پیریدا منداڵی وه‌کو یه‌حیا و ئیسماعیل و ئیسحاق پێیان به‌خشرا، هه‌مووشیان بوونه‌ پێغه‌مبه‌ر. 

خاڵی دووه‌م؛ ئه‌گه‌ر له‌ دوای هه‌وڵی ته‌واو و پاڕانه‌وه‌ی زۆر و ئیستیغفار هه‌ر منداڵ نه‌هات، ئامۆژگاری ئه‌وه‌تان ده‌که‌ین که‌ ده‌بێت سه‌بر له‌به‌ری قه‌ده‌ری خوا بگرن و ڕازی بن به‌و به‌شه‌ی پێتان بڕاوه‌، چونکه‌ له‌ ڕازی بوون به‌ ویست و قه‌ده‌ری خوا، خوا لێتان ڕازی ده‌بێ و پاداشتێکتان ئه‌دا له‌ قیامه‌ت که‌ زۆر پێ ڕازی ده‌بن و بگره‌ دڵخۆشیش ده‌بن له‌وه‌ی له‌ دونیا منداڵتان پێ نه‌درابوو.. ئه‌وه‌ش ده‌ڵێین که‌ ده‌بێ بڕواتان وا بێت ڕه‌نگه‌ خێر بۆ ئێوه‌ له‌وه‌دایه‌ منداڵتان نه‌بێت، هه‌روه‌کو چؤن خێر بۆ ئه‌و دایک و باوکه‌ پیره‌ی زه‌مانی حه‌زره‌تی خدر وابوو منداڵه‌که‌یان بمرێ، چونکه‌ ئه‌گه‌ر گه‌وره‌ بووایه‌ ده‌بوونه‌ ئازار بۆ دایک و باوکی و بۆ خۆشی ده‌چووه‌ ئاگره‌، به‌ڵام که‌ به‌ منداڵی مرد، چووه‌ به‌هه‌شت و دایک و بابیشی ئه‌گه‌رچی ناڕه‌حه‌تبوون به‌ مردنی، به‌ڵام پاداشتیان بۆ نووسرا له‌سه‌ر سه‌بریان و له‌ دونیاش تووشی ئازار نه‌بوون به‌ده‌ستی منداڵه‌که‌یان.. ئه‌مه‌ چیرۆکێکی پڕ په‌نده‌ له‌ سوره‌تی(الکهف) بگه‌ڕێوه‌ سه‌ری و سوودی لێ ببینه‌.. 

له‌ یادت بێت که‌ ژیانی دونیا هه‌مووی تاقیکردنه‌وه‌یه‌، یه‌کێک به‌ نه‌بوونی منداڵ، ئه‌وی تر هه‌یه‌تی و پێوه‌ی ده‌ناڵێ، یه‌کێکی تر به‌ نه‌خۆشی، ئه‌وی تر به‌ ده‌وڵه‌مه‌ندی، یه‌کی تر به‌ ده‌سته‌ڵات، ئه‌وی تر به‌ جوانی، ناشرینی، که‌مئه‌ندامی، شوونه‌کردن، یان شوو ده‌کات مێردی باش نابێت، ئیتر هه‌ریه‌که‌ و به‌چه‌ند حاڵه‌تێک ده‌بێت تاقی بکرێته‌وه‌ و تا سه‌رئه‌نجام له‌ ڕۆژی دوایی به‌رئه‌نجامی هه‌ڵوێسته‌کانمان وه‌ربگرینه‌وه‌..

خوای گه‌وره‌ش زاناتره ‌(جل وعلا).‌ 

وصلى الله على نبینا محمد وعلى آله وصحبه وسلم. 

- - - - - - - - - - - - - - - - - - - - - - - - - - - - - - - - - 

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.