به ‌ناوی خوای به‌خشنده‌ی میهره‌بان. 

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

تووشبوون به‌ زۆری پێکه‌نین ئه‌گه‌ر ناڕێکی و نووقسانی پله‌ی ژیریی(وه‌کو هه‌ندێ شێت هه‌یانه‌) له‌گه‌ڵدا نه‌بێت نه‌خۆشی ده‌روونی نییه‌، ڕه‌نگه‌ له‌ ئه‌نجامی کات به‌سه‌ربردنێکی زۆر له‌ نوکته‌ و گاڵته‌کردن و هاوڕێیه‌تی که‌سانی له‌و جۆره‌ و ته‌ماشاکردنی دیمه‌نه‌ پێکه‌نینه‌کان تووشی ببێت. گومانێ تێدا نییه‌ یه‌کێک بۆ ماوه‌یه‌کی زۆر خه‌ریکی ئه‌و بوار و بابه‌تانه‌ بێت که‌سایه‌تێیه‌کی شۆخباز و توانجده‌ر و قه‌شمه‌ری لێ ده‌رده‌چێت یاخود ئه‌گه‌ر نه‌یتوانی ببێته‌ که‌سایه‌تییه‌کی وه‌ها بۆ خۆی کاریگه‌ر ده‌بێت پێیان و تووشی پێکه‌نینی زۆر ده‌بێت!! 

چاره‌سه‌ری ئه‌وه‌ له‌وه‌دایه‌ له‌و بازنه‌ و ژیانه‌ دوورکه‌ویته‌وه‌، ئه‌گه‌ر نه‌وتوانی کتوپڕ، هێواش هێواش، هاوڕێیه‌تی که‌م بکه‌وه‌ له‌گه‌ڵ ئه‌وانه‌ی پێکه‌نینت دێت پێیان یاخود له‌گه‌ڵیان ته‌ماشای ئه‌و دیمه‌ن و فلیم و شانۆیانه‌ مه‌که‌ ده‌تخاته‌ پێکه‌نین و له‌ مێشکتدا ده‌مێنێته‌وه‌، له‌ هه‌مان کاتیش واچاکه‌ ئه‌و بۆشاییه‌ی بۆت دروست ده‌بێت پڕی بکه‌یته‌وه‌ به‌ کاری چاکه‌ و بونیاتنان، وه‌کو خوێندنه‌وه‌، کارکردن، گوێگرتن و سه‌یرکردنی بابه‌ته‌ ئیسلامییه‌کان، به‌ تایبه‌تی ئه‌و کتێب و وتار و بابه‌تانه‌ی خوای گه‌وره‌ت پێ ده‌ناسێنێت، هه‌روه‌ها یادی مردن و قیامه‌ت و خه‌می خۆئاماده‌کردن بۆ ڕؤژی دوایی، پێغه‌مبه‌ری خوا(صلى الله عليه وسلم) فه‌رموویه‌تی " لو تعلمون ما أعلم لضحكتم قليلا ، ولبكيتم كثيرا" رواه‌ البخاري ومسلم، واته‌؛ ئه‌گه‌ر ئه‌وه‌تان ده‌زانی من ده‌یزانم، که‌م پێده‌که‌نین و زۆر ده‌گریان! زانایان ده‌فه‌رموون؛ مه‌به‌ستی له‌ ناڕه‌حه‌تیی و مه‌ینه‌تییه‌کانی ژیانی دوای مردن و ڕۆژی دوایی و ئاگری دۆزه‌خه‌، که‌ ئایا خوای گه‌وره‌ چی ئاماده‌ کردووه‌ بۆ بێباوه‌ڕان و سه‌رپێچیکاران! له‌ فه‌رمووده‌یه‌کی تردا هاتووه‌ ده‌فه‌رموێت" إِنِّي أَرَى مَا لَا تَرَوْنَ وَأَسْمَعُ مَا لَا تَسْمَعُونَ ، أَطَّتْ السَّمَاءُ وَحُقَّ لَهَا أَنْ تَئِطَّ ، مَا فِيهَا مَوْضِعُ أَرْبَعِ أَصَابِعَ إِلَّا وَمَلَكٌ وَاضِعٌ جَبْهَتَهُ سَاجِدًا لِلَّهِ ، وَاللَّهِ لَوْ تَعْلَمُونَ مَا أَعْلَمُ لَضَحِكْتُمْ قَلِيلًا ، وَلَبَكَيْتُمْ كَثِيرًا ، وَمَا تَلَذَّذْتُمْ بِالنِّسَاءِ عَلَى الْفُرُشِ ، وَلَخَرَجْتُمْ إِلَى الصُّعُدَاتِ تَجْأَرُونَ إِلَى اللَّهِ" أخرجه‌ الترمذي وحسنه الألباني. واته‌؛ من هه‌ندێ شت ده‌بینم ئێوه‌ نایبینن و هه‌ندێ شت ده‌بیستم و ئێوه‌ نایبستن، ئاسمان ده‌نگی لێوه‌ هات و هه‌قیشێتی ده‌نگی لێوه‌ بێت! جێگای چوار په‌نجه‌ی تێدا نابینیته‌وه‌ مه‌گه‌ر مه‌لائیکه‌یه‌ک نێچه‌وانی داناوه‌ و سوجده‌ی تێدا بردووه‌ بۆ خوا! سوێند به‌خوا ئه‌گه‌ر ئه‌وه‌ ده‌زانن من ده‌یزانم، که‌م پێده‌که‌نین و زۆر ده‌گریان، و هه‌رگیز چێژتان له‌ ئافره‌ت وه‌رنه‌ده‌گرت له‌ جێگه‌کانتان(جێی خه‌و) و ده‌ڕؤیشتن بۆ چؤڵاییه‌کان و هاناتان ده‌برد بۆ خوا و لێی ده‌پاڕانه‌وه‌ هه‌تا تووشی سزای خۆتان نه‌کات و ڕه‌حمتان پێ بکات. 

له‌به‌رئه‌وه‌شه‌ نه‌بیستراوه‌ له‌ پێغه‌مبه‌ری خوا(صلى الله عليه وسلم) هه‌رگیز قاقای پێکه‌نینی لێدابێت! له‌ ڕاستیدا هه‌ر ده‌بێت به‌نده‌ی خوا به‌و جۆره‌ بێت، ئێمه‌ که‌ مردنێک قه‌رزارین و هه‌موومان ساتێک دێت ده‌مردن، سه‌ڕه‌ڕای ئازاری مردن و سامناکیی کێ مسۆگه‌ره‌ له‌ خۆی له‌ سزای گۆڕ و دواتریش له‌ سزای ئاگری دۆزه‌خ ڕزگاری بێت هه‌تاوه‌کو له‌ ئێستاوه‌ پێکه‌نین و به‌ که‌یف بین!!؟ مردن و سزای گۆڕ شیرینی ژیانی نه‌هێشت و هیچ مانایه‌کی بۆ دونیا نه‌هێڵاوه‌، ئیتر به‌چی دڵ خۆشبکه‌ین!؟ ئه‌گه‌ر بیرێک له‌و فه‌رمووده‌یه‌ بکه‌ینه‌وه‌ زیاتر بارمان گران ده‌کات، ئه‌وه‌تا ئاسمانه‌کان قورس بوون و نرکه‌یان لیوه‌ دێت له‌به‌ر زۆری مه‌لائیکه‌ و ئه‌نجامدانی عیباده‌ت و نوێژ و سوجده‌ و پاڕانه‌وه‌، ئه‌وان زۆر له‌ خوای گه‌وره‌ ده‌ترسن و خه‌نده‌یان نه‌ماوه‌ له‌ کاتێکدا سزا و دۆزه‌خیان بۆ ئاماده‌ نه‌کراوه‌، سزا و پاداشت بۆ ئێمه‌ی ئاده‌میزاده‌، به‌ڵام به‌ داخه‌وه‌ نه‌ به‌گۆڕین بۆ گه‌یشتن به‌ ڕه‌زامه‌ندی خوا و پاداشته‌که‌ی، نه‌ ترساو و ڕاکردووشین له‌ سزایه‌کانی، هه‌ر ده‌ڵێی بۆ ئێمه‌ دروست نه‌کراوه‌!! 

برای به‌ڕێزمان ئه‌گه‌ر به‌ڕاستی بیرێک له‌م ڕاستییانه‌ بکه‌ینه‌وه‌ و دووریش بکه‌ویته‌وه‌ له‌و ناوه‌نده‌ی دڵی مرۆڤ فریو ده‌دات، پێکه‌نینت که‌م ده‌بێته‌وه‌ و به‌پێچه‌وانه‌وه‌ گریانت زۆر ده‌بێت و لێبڕاو ده‌بیت بۆ گه‌یشتن به‌ دونیا نه‌بڕاوه‌.. ئه‌وه‌ش بزانه‌ زۆری پێکه‌نین دڵ ده‌مرێنێت" لا تكثروا الضحك فإن الضحك تميت القلب"، دڵیش ئه‌گه‌ر مرد ئیتر جۆشی نامێنێ و له‌ به‌رد ڕه‌قتری لێ به‌سه‌ر دێت، هیچ کاریگه‌ری لێ ناکرێت به‌ ئایه‌ته‌کانی خوا و هه‌ڕه‌شه‌کانی.. ئه‌وه‌ش مایه‌ی خه‌ساره‌تمه‌ندی و تیاچوونی ڕاسته‌قینه‌یه‌. 

دوعا و پاڕانه‌وه‌ش زۆر بکه‌ به‌ڵکو خوای گه‌وره‌ دوورت بخاته‌وه‌ له‌و حاڵه‌ته و بۆ خۆتیش هه‌وڵ بده‌ له‌ ژیانی پێکه‌نینی زۆر و کۆمیدیا دوورکه‌ویته‌وه‌، به‌ ئومیدی ئه‌وه‌ی به‌ ماوه‌یه‌کی که‌م گۆڕانێکی به‌رچاو له‌ ژیانت به‌دی بکه‌یت.

خوای گه‌وره‌ش زاناتره ‌(جل وعلا).‌ 

وصلى الله على نبینا محمد وعلى آله وصحبه وسلم. 

- - - - - - - - - - - - - - - - - - - - - - - - - - - - - - - - - 

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.