سەرەتا   |    دەربارە   |    پەیوەندی   |    دەستەی نوسەران   |    من نحن   |    اتصل بنا
       
  مێردەكەم سێ بەسێ تەڵاقی لێ خواردووم كە كارێك نەكەم، ئایا گەر ئەو كارە بكەم تەڵاقەكەی دەكەوێت.؟
سه‌لامی خواتان لێبێت من پرسیارێکی گرنگم هه‌یه‌ من پیاوه‌که‌م سێبه‌سێ ته‌لاقی لێخواردوم ئه‌گه‌ر رته‌له‌فۆن بۆ خوشکه‌زاکه‌ی بکه‌م و قسه‌ی له‌گه‌ڵ بکه‌م، ئێستا من نازانم چی بکه‌م ئه‌ترسم ته‌له‌فۆن بکات و نه‌زانم ئه‌وه‌ و ته‌لاقه‌که‌م بکه‌وێ یان چۆن تێی بگه‌یه‌نم شتێکی وا هه‌یه‌ ته‌له‌فۆن مه‌که‌ مناڵه‌کانم کوردێیه‌که‌یان باش نییه‌ هه‌تا واتێی بگه‌یه‌نن نه‌بێته‌ کێشه‌ چونکه‌ ئه‌لێره ‌نییه ‌و له‌ وڵاتێکی تره‌ ئه‌و له‌ ته‌مه‌نی کوڕه‌که‌مه‌ من نه‌ک ئه‌و هه‌موویانم خۆش ده‌وێ که‌چی نازانم بۆچی له ‌خۆیه‌وه‌ دڵی لێی به‌گومان بووه‌، نازانم یانی قه‌ت ئاگاداری نه‌کردووم که‌ حه‌زی لێ ناکا یان بگره ‌زۆر له‌گه‌ڵیشی قسه‌ی ئه‌کرد که ‌من ژن خاڵی ئه‌وم بێگومان به‌یه‌ک ناشێین هه‌تا له‌گه‌ڵ خاڵی بم! ئێستا من چی بکه‌م که‌ ماڵوێران نه‌بم، (٥) مناڵم هه‌یه ‌و(١٧) ‌ساڵه ‌من هاوسه‌ری ئه‌وم، خراپترین ڕۆژم له‌گه‌ڵی برده‌سه‌ر قه‌ت ڕۆژێک بیرم له‌وه‌ نه‌کرده‌وه‌ جیا ببمه‌وه‌ ئه‌گه‌ر خوشکه‌زاکه‌ی به‌مه ‌بزانێ کاره‌سات ڕوو ئه‌دات! ئاخر چۆن من بڵێم خاڵت گومانی لێته‌ که ‌به ‌هه‌زاران جار به‌دایه‌ بانگی کردووم چونکه ‌ئه‌و دایکه‌ی نه‌بووه‌ تۆزێک سۆزی باتێ؟ چي بکه‌م له‌به‌ر خوا ڕێگه‌ چاره‌یه‌کم بۆ دانێن.. ئه‌و وا سوێندی خواردووه‌ ئه‌گه‌ر من ته‌له‌فۆنی بۆ بکه‌م و قسه‌ی له‌گه‌ڵ بکه‌م سێ به‌سێ ته‌ڵاقی بکه‌وێ، ئایا ئه‌گه‌ر ئه‌و بیکات ئه‌که‌وئ؟ یان نا‌زانم ئه‌گه‌ر‌ جوابی ده‌مه‌وه‌ ئه‌که‌وێ؟ یان زۆر جار ئه‌و نوکه‌م بۆ ئه‌کات منیش نوکه‌ی بۆ ده‌که‌م‌ یان له‌گه‌ڵی بنوسم به‌چات به‌بێ قسه‌کردن یان ئه‌گه‌ر ڕۆژێک هات بۆ ماڵمان ئه‌وه‌یان چۆن؟ جوابێکی ئه‌م کێشه‌یه‌م به‌نه‌وه ‌تکایه،‌ وه‌ ئه‌وه‌ش بزانن له‌کاتی توڕه‌بوونا بوو ئیتر نازانم به‌ڕێزتان چ حاڵه‌تێکی تووڕه‌ی مه‌رجی گرێبه‌ست هه‌ڵه‌وه‌شێنێته‌وه؟ ‌ زۆرسوپاستان ئه‌که‌م ئه‌گه‌ر به‌ په‌له‌ ‌جوابه‌که‌م بده‌ن.. خوا جه‌زاتان باته‌وه..‌
گۆڕینی فۆنت
وەڵام - ژمارەی پرسیار 1366

به ‌ناوی خوای به‌خشنده‌ی میهره‌بان. 
سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

بۆ‌ وه‌ڵامی پرسیاره‌که‌ی به‌ڕێزتان:

ئه‌وه‌ی مێرده‌که‌ت کردوویه‌تی ته‌ڵاقی گرێدراوه‌(المعلق) ، ئه‌وه‌یه‌ که‌سێک ته‌ڵاقی خێزانه‌که‌ی ده‌به‌ستێته‌وه‌ به‌ کردنی یان نه‌کردنی شتێک، ئه‌وجا ئه‌گه‌ر ئه‌و شته‌ هاته‌دی ئیتر ته‌ڵاقه‌که‌ ده‌که‌وێ... تۆ ناتوانی یه‌ک لایه‌نه‌ ئه‌م کێشه‌یه‌ چاره‌سه‌ر بکه‌ی، ده‌بێت هه‌ر له‌گه‌ڵ مێردی به‌ڕێزت بگه‌نه‌ ئه‌نجام.. ئێمه‌ که‌ نازانین مێردی به‌ڕێزت هه‌قێتی له‌و مه‌سه‌له‌یه‌ یان نا به‌ڵام تۆ ده‌بێت به‌ گوێی بکه‌ی له‌به‌ر ته‌ڵاقه‌که‌ و له‌به‌ر دڵی مێردیشت، هه‌ر هیچ نه‌بێت هه‌تاوه‌کو ماوه‌یه‌ک دڵی هێور ده‌بێته‌وه‌ و ڕای خۆی ده‌گۆڕێت.. باشتر وایه‌ به‌ زوویی له‌گه‌ڵ ئه‌و(مێردت) دابنیشی و بۆی ڕوون بکه‌یته‌وه‌ که‌ تۆ به‌ گوێی ده‌که‌ی و دڵی ناشکێنی و ده‌ته‌وێ دڵنیایی بده‌یتێ له‌و باره‌یه‌وه‌، چۆنی ده‌وێ وا ده‌که‌ی، ئه‌وجا پێی بڵێ که‌ ده‌شبێت چارێک بدۆزێته‌وه‌ ئه‌گه‌ر نایه‌وێت ته‌ڵاقه‌که‌ بکه‌وێ، چونکه‌ ئه‌و خۆی گرێیداوه‌ بۆیه‌ ده‌بێت کارئاسانیشت بۆ بکات، پێی بڵێ که‌ نابێت ئه‌و کێشه‌یه‌ به‌ نیوه‌چڵی به‌ جێ بهێڵێ و له‌سه‌ر شانی تۆ به‌ ته‌نها هه‌ڵیبگرێ! ده‌بێت ئه‌و خۆی به‌ کوڕه‌که‌ بڵێ یان به‌ خوشکی خۆی که‌ با بۆ ماوه‌یه‌ک کوڕه‌ نه‌یه‌ته‌ ماڵتان و ته‌له‌فۆن نه‌کات، ئیتر به‌ هه‌ر ڕێگه‌یه و به‌هانه‌یه‌ک که‌ هه‌ردووکتان له‌سه‌ری ڕێک بکه‌ون. بۆی ڕوون بکه‌وه‌ که‌ چۆن ده‌گونجێ ئه‌و خۆی ڕێگا له‌ خوشکه‌زاکه‌ی نه‌گرێ له‌ سه‌ردانتان یاخوود ته‌له‌فۆنکردن و بۆ تۆش نه‌بێت وه‌ڵام بده‌یته‌وه؟!‌.. ئه‌ی ئه‌گه‌ر ئه‌و ته‌له‌فۆنی کرد و تۆش نه‌تزانی ئه‌وه‌؟ یان بۆچی تۆ خه‌جاڵه‌ت و خه‌تابار بکات له‌وه‌ی به‌بێ هیچ ڕوونکردنه‌وه‌یه‌ک په‌یوه‌ندیت داببڕێ له‌گه‌ڵ خوشکه‌زاکه‌ی، چۆن ده‌بێت ئیحراجت بکات له‌و پچڕاندنه‌!؟ بۆیه‌ ده‌بێت ئه‌و خۆی چاره‌سه‌رت بۆ ببینێته‌وه‌، یان ئه‌وه‌تا ده‌بێت له‌ بڕیاڕه‌که‌ی په‌شیمان بێته‌وه‌، یان ئاسانی بکات بۆت، وه‌ک ئه‌وه‌ی بڵێ ئه‌گه‌ر ئه‌و ته‌له‌فۆنی کرد قه‌یناکه یان ئه‌گه‌ر هاته‌ ماڵت ده‌سته‌ڵاتت نییه‌ له‌ قسه‌کردن. 

بۆیه‌ ئه‌گه‌ر ئه‌و گۆڕانکاری بکات له‌ بڕیاره‌که‌ی ئیتر ئاسانی بۆ تۆ دروست ده‌بێت، دڵنیاشی بکه‌ که‌ تۆ قسه‌ و ته‌له‌فۆنی له‌گه‌ڵ ناکه‌ی یان چات و هاوشێوه‌ی.. پێویسته‌ تۆ دڵنیایی بکه‌یته‌وه‌ له‌وه‌ی به‌ قسه‌ی ده‌که‌یت و دڵی ڕاده‌گری و ڕه‌زامه‌ندی ئه‌وه‌ت له‌ هه‌موو شتێک لا گرنگتره‌. بێگومانیش ده‌بێت به‌ گوێی بکه‌ی. 

ئه‌گه‌ر دانیشتن و به‌ له‌سه‌رخۆیی کێشه‌که‌تان باس کرد، دڵنیا بن ده‌گه‌نه‌ چاره‌سه‌ری، به‌ڵکوو ئه‌گه‌ر هه‌ر سوور بوو، بۆ خۆی به‌ کوره‌که‌ بڵێ یان به‌ دایکی که‌ ئه‌وت لێ دوور بخاته‌وه‌. به‌ڵام له‌ خراپترین باردا ئه‌گه‌ر باره‌که‌ وه‌کو ئێستا مایه‌وه‌، ئه‌وا تۆ ده‌بێت قسه‌ی له‌گه‌ڵ نه‌که‌ی هه‌تاوه‌کو خوا ده‌رگات لێ ده‌کاته‌وه‌ و ئه‌و سوێن و ته‌ڵاقه‌ گرێدراوه‌ی ده‌شکێنێت. 

ئه‌گه‌ر هه‌تا ئه‌و کاته‌ش ته‌له‌فۆنی کرد و زانیت ئه‌وه‌، وه‌ڵام مه‌ده‌وه‌، ئه‌گه‌ر نه‌تزانی ئه‌وه‌ و ته‌له‌فۆنت هه‌ڵگرت با یه‌ک جار ئه‌و قسه‌ بکه‌ت، که‌ زانیت ئه‌وه‌ ته‌له‌فۆن دابخه‌وه‌، هه‌موو ئه‌م گرانی و ئه‌سته‌میانه‌ش بۆ مێردت باس بکه‌‌ هه‌تا بزانێ کارێکی هه‌ڵه‌ی کردووه‌ که‌ به‌نیوه‌چڵی ئه‌و کێشه‌یه‌ی هه‌ڵواسیوه‌. 


خوای گه‌وره‌ش زاناتره ‌(جل وعلا).‌ 
وصلى الله على نبینا محمد وعلى آله وصحبه وسلم. 
- - - - - - - - - - - - - - - - - - - - - - - - - - - - - - - - - 
لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.


  ژمارەی بینین 1041

  • زۆرترین بینراو
  • نوێترین بابەت
Top
Facebook YouTube Twitter Instagram