به ‌ناوی خوای به‌خشنده‌ی میهره‌بان. 

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

گۆشتی ریوی ناخوری له‌به‌رئه‌وه‌ی گۆشتخۆر و به‌ که‌ڵبه‌یه‌(انیاب)، پێغه‌مبه‌ر(صلى الله عليه وسلم) ده‌فه‌رموێت" نهى النبي صلى الله عليه وسلم عن أكل كل ذي ناب من السباع ، وكل ذي مخلب من الطير " متفق علیه. واته‌/ پێغه‌مبه‌ری خوا(صلى الله عليه وسلم) ڕێگری کرد له‌ خواردنی گۆشتی هه‌موو گیاندارێکی گۆشتخۆری به‌که‌ڵه‌به له‌ دڕنده‌کان، هه‌روه‌ها هه‌موو به‌نینۆکێکی باڵنده‌(ئه‌وانه‌ش که‌ گۆشتخۆرن).‌ 

ئه‌وه‌ ڕای ئه‌بووحه‌نیفه‌ و ڕای به‌ناوبانگی ئیمام ئه‌حمه‌د و هه‌روه‌ها عه‌مری کوڕی دینار و زوهری و ئیبن مونذیر(ڕه‌حمه‌تی خوا له‌ هه‌موویان بێت) ، به‌ڵگه‌شیان بۆ ئه‌وه‌، ڕێوییان له‌گه‌ڵ دڕنده‌ به‌ که‌ڵبه‌کان ناساندووه‌. ئیمام مالیکیش-ڕه‌حمه‌تی خوای لێ بێت- به‌ ناباشی(مکروه‌)ی داناوه‌، به‌ڵام ئیمامی شافیعی و تاووس و قه‌تاده‌ و ئه‌بووثه‌ور و له‌یث و ئیبن عویه‌ینه‌ و ڕیوایه‌تێک له‌ عه‌تائه‌وه‌-ڕه‌حمه‌تی خوایان لێ بێت- به‌ حه‌ڵاڵیان ناساندووه‌، هۆیه‌که‌شی ئه‌وه‌یه‌ که‌ ده‌فه‌رموون ڕیوی ڕاسته‌ به‌ که‌ڵبه‌یه‌، به‌ڵام له‌و گیانداره‌ دڕندانه‌(السباع) نییه‌ که‌ به‌ناوبانگن وه‌کو شێر و گورگ و پڵینگ و ...تاد. هه‌روه‌ها له‌و گیندارانه‌شه‌ که‌ فیدیه‌ی ده‌بێت بۆ بدرێت ئه‌گه‌ر له‌ ناوچه‌ی حه‌ره‌م(که‌عبه و ده‌روبه‌ری) یاخوود کاتی ئیحرام به‌ستن بۆ حه‌ج و عومره‌ ئه‌گه‌ر ڕاوبکرێت. 

بابه‌ته‌که‌ خیلافییه‌ و ده‌کرێت له‌ دووی هه‌ردوولا بڕؤین، به‌ڵام بۆ نه‌مانی خیلاف و دڵنه‌وایی له‌ پێشتره‌ نه‌خورێت، چونکه‌ له‌ بنچینه‌دا گۆشت حه‌رامه‌ مه‌گه‌ر به‌ڵگه‌یه‌ک هه‌بێت حه‌ڵاڵی بکات. 

سه‌باره‌ت به‌ قورمه‌ش له‌ ڕاستیدا نه‌مانزانی چی ده‌گه‌یه‌نێت هه‌تاوه‌کو فه‌توای له‌ باره‌وه‌ بده‌ین! 

خوای گه‌وره‌ش زاناتره ‌(جل وعلا).‌ 

وصلى الله على نبینا محمد وعلى آله وصحبه وسلم. 

- - - - - - - - - - - - - - - - - - - - - - - - - - - - - - - - - 

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.