به ‌ناوی خوای به‌خشنده‌ی میهره‌بان. 

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

ئاڵتوون و ئاوریشم بۆ پیاوان حه‌رامه‌ و بۆ ئافره‌تان ئاساییه‌، "أحل الذهب و الحرير لأناث أمتي و حرم على ذكورها" أخرجه‌ السيوطي و صححه‌ الألباني. واته‌/ حه‌ڵاڵ کراوه‌ ئاڵتوون و ئاوریشم بۆ ئافره‌تانی ئوممه‌ته‌که‌م و حه‌رامکراوه‌ له‌سه‌ر پیاوانی. 

سه‌باره‌ت به‌ ئاڵتوون وا ده‌ڵێن که‌ ده‌زگای به‌رگری له‌ش بێهێز ده‌کات(خرۆکه‌ سپییه‌کان ده‌کۆژێ و که‌م ده‌کاته‌وه‌) به‌ڵام بۆ ئافره‌تان به‌هێزی ده‌کات.. هه‌رچی ئاوریشمیشه‌ ڕه‌نگه‌ له‌به‌رئه‌وه‌یه‌ ڕێگه‌یه‌ بۆ تووشبوون به‌ لووتبه‌رزی و له‌خۆباییبوون و خوابیرچوونه‌وه‌، به‌ڵام بۆ ئافره‌تان مایه‌ی جوانییه‌ له‌ کاتێکدا ڕازاوه‌یی بۆ ئه‌وان له‌ پێشه‌ و شایسته‌یه‌. ئیبن قه‌ییمیش-ڕه‌حمه‌تی خوای لێ بێت- ئیشاره‌تی به‌وه‌ داوه‌ که‌ مادام ئه‌و شتانه‌ بۆ ئافره‌تان ڕه‌خساوه‌، ئه‌گه‌ر له‌لایه‌ن پیاوه‌وه‌ به‌کاربێن، له‌ پیاوه‌تی و که‌سایه‌تی پیاوان که‌م ده‌کاته‌وه‌ و سیفاتی ئافره‌تان وه‌رده‌گرن.. 

هه‌ندێ پشکنین و لێکۆڵینه‌وه‌ پزیشکیش ده‌ریانخستووه‌ که‌ ئاڵتوون به‌ تێپه‌ڕینی کات هه‌ندێ له‌ گه‌رده‌کانی ده‌گوێزرێته‌وه‌ بۆ ئه‌و شته‌ی له‌سه‌ری ده‌که‌وی یان به‌ری که‌وتووه‌، ئه‌مه‌ش وا ده‌کات پیاوان تووشی هه‌ندێ نه‌خۆشی بکات له‌وانه‌ نه‌خۆشی(Alzheimer) که‌ نه‌خۆشییه‌کی ده‌ماخه‌ و توانای بیرکردنه‌وه‌ و فێربوون که‌مده‌کاته‌وه‌ به‌ڵکوو سه‌رده‌کێشێ بۆ شێتی و تووڕه‌بوون. به‌ڵام ئافره‌تان به‌ حوکمی ئه‌وه‌ی چینێکی چه‌وری له‌ ژێری پێستیان هه‌یه‌، کارلێکردنی ئاڵتوونه‌که‌ له‌گه‌ڵ خوێن و مادده‌کانی نێوی ئاده‌میزاد ناکات. 

شایه‌نی باسه‌؛ موسوڵمان نابێت له‌ دوای حیکمه‌ت و هۆکاره‌کانی حه‌رامی و حه‌ڵاڵی له‌ فه‌رمانه‌کانی خوای گه‌وره‌وه‌ بێت.. به‌ڵکوو ئه‌وه‌ له‌ ئه‌ده‌ب نییه‌ به‌رامبه‌ری خوا یان له‌ لاوازی ئیمانه‌(مه‌به‌ستمان ئێوه‌ی به‌ڕێز نییه‌!) چونکه‌ ئێمه‌ ده‌بێت سه‌ره‌تا خوا بناسین، خوای گه‌وره‌ش وه‌کو ڕۆژی ڕووناک دیاره‌ و هه‌ستی پێ ده‌که‌ین له‌ دروستکراوه‌کانییه‌وه‌، له‌ جێ ده‌ست و کارزانی و لێزانی له‌ ئه‌و بوونه‌وه‌ره‌ی پێکی هێناوه‌. پاش ئه‌وه‌ که‌ خوای گه‌وره‌مان ناسی، ئیتر ناشایسته‌یه‌ بڵێین ئه‌ی خوایه‌ بۆچی ئه‌مه‌ت حه‌رام کردووه‌!؟ ناکرێ بزانین!؟ نه‌خێر ئه‌وه‌ شه‌ریعه‌تی خوایه‌، خوای گه‌وره‌ مافی خوایه‌تی هه‌یه‌ به‌سه‌رمانه‌وه‌، بۆی هه‌یه‌ حه‌ڵاڵ و حه‌راممان له‌سه‌ر بسه‌پێنێ، بۆیه‌ ئێمه‌ پێویسته‌ له‌ پێش پرسیاری بۆچی، دڵمان ته‌واو ئارام بێ و گومانمان نه‌بێ له‌ حیکمه‌ت و کارجوانی خوای گه‌وره‌، ئیتر ئه‌گه‌ر له‌ دوای ئه‌وه‌ش حیکمه‌ته‌کانمان بینییه‌وه‌، ئه‌وا حه‌تمه‌ن دڵمان به‌ دین و شه‌ریعه‌تی خوا زیاتر خۆش ده‌بێت، وه‌کو ئه‌وه‌ی ئێشتا ده‌رده‌که‌وێ خوای گه‌وره‌ بۆچی ڕیبای لێ حه‌رام کردووین، به‌و ده‌رده‌ کوشنده‌ ئابوورییه‌ی ئێستای جیهاندا بۆمان ده‌رده‌که‌وێ که‌ هێشتا له‌ سه‌ره‌تای ئه‌و تێكشکانه‌ن، ئه‌وانه‌ ڕیبایان کرد خوای گه‌وره‌ش جه‌نگی له‌گه‌ڵ به‌رپاکردوون، که‌سیش نازانێت که‌ی و له‌کوێوه‌ خوای گه‌وره‌ بۆیان ده‌چێت. 

خوای گه‌وره‌ش زاناتره ‌(جل وعلا).‌ 

وصلى الله على نبینا محمد وعلى آله وصحبه وسلم. 

- - - - - - - - - - - - - - - - - - - - - - - - - - - - - - - - - 

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.