به ‌ناوی خوای به‌خشنده‌ی میهره‌بان. 

سوپاس و ستایش بۆ په‌روه‌ردگار، دروود و ڕه‌حمه‌ت له‌ ‌پێغه‌مبه‌ری ئازیز (صلی الله‌علیه‌ وسلم) و هه‌روه‌ها له‌ ئال و یارانی. 

کراوات(بۆینباخ) و ڕیشی پرۆفیسۆری، نه‌ریت و شێوازێکی ئیسلامی نییه‌، هه‌رچی کراواته‌ به‌ستنی حه‌رام نییه‌(مه‌گه‌ر ئه‌وه‌یان له‌ شێووه‌ی خاج ده‌چێت) ئه‌گه‌رچی نه‌به‌ستنی باشتره‌ چونکه‌ له‌ سوننه‌تی پێغه‌مبه‌رمان(صلى الله عليه وسلم) نه‌بووه‌ شتێک له‌ ملی ببه‌ستێ، وه‌کو نه‌ریتی میلله‌تیش، ئیسلام ڕه‌چاوی عورف و عاده‌تی میلله‌تانی کردووه‌، به‌ستنی کراواتیش ئه‌گه‌ر وه‌کو نه‌ریتی ئێستای میلله‌تێک بێت که‌ له‌ ناویان ده‌ژی، بۆت هه‌یه‌ وه‌ک ئه‌وان بپۆشی و ده‌رکه‌وی ئه‌گه‌ر پێچه‌وانه‌ی شه‌ریعه‌تی ئیسلامه‌که‌ نه‌بیته‌وه، هه‌رچی حه‌ڵاڵ و حه‌رامه‌ دیاره‌ و ئه‌وه‌ش لێی بێ ده‌نگ بووه‌ بۆمان ڕه‌وایه‌. 

ڕیشی پرۆفیسۆری، ئه‌مه‌یان جائیز نییه‌، چونکه‌ ئێمه‌ی موسوڵـمان واجبه‌ له‌سه‌رمان ڕیشمان بهێلینه‌وه‌ و ده‌ستکاری نه‌که‌ین، مه‌گه‌ر ڕوخسارمان بشێوێنێ، له‌و حاڵه‌ته‌ش جائیزه‌ له‌ دوای گرتنی مشتێک کورت بکرێته‌وه‌، که‌واته‌ ڕیشهێشتنه‌وه‌ عیباده‌ته‌ و دیاری کراوه‌ بۆیه‌ بۆ ئێمه‌ نییه‌ شێوازی نوێ یان له‌ چاولێکه‌ری خه‌ڵكانی ناموسوڵمان بیهێڵێنه‌وه‌.. 

ئه‌گه‌ر که‌سێ بیزانێ و بیکات چۆنه‌؟ ئه‌گه‌ر ئینکاری ڕاستی و فه‌رمانی خوا بکات، پێێ کافر ده‌بێ و له‌ موسوڵمانیطی ده‌چێته‌ ده‌ر.، به‌ڵام ئه‌گه‌ر بڕوای وابێ فه‌رمانی خوا هه‌قه‌ و واجبه‌ وه‌ڵامدانه‌وه‌ی به‌ڵام ئه‌و که‌سه‌ له‌به‌ر حه‌زی خۆی بیتاشێ یان شێوه‌یه‌کی تری بۆ داڕێژێ ئه‌وا گوناهباره‌ و سه‌رپێچی خوای کردووه‌، واته‌ هه‌ر موسوڵمانه‌ به‌ڵام ده‌که‌وێته‌وه‌ ویستی خوا، ئه‌گه‌ر له‌ قیامه‌ت لێی خۆش بێت یان سزای بدات.

خوای گه‌وره‌ش زاناتره ‌(جل وعلا).‌ 

وصلى الله على نبینا محمد وعلى آله وصحبه وسلم. 

- - - - - - - - - - - - - - - - - - - - - - - - - - - - - - - - - 

لیژنه‌ی وه‌ڵامدانه‌وه‌ی پرسیاره شه‌رعییه‌کان/‌ ده‌نگی ئیسلام.